“Bu təəssüf doğurur, amma keçmişlə yaşamaq olmaz” – “Sabah”ın futbolçusu

“Sabah”ın yarımmüdafiəçisi Elvin Camalovun futbolinfo.az saytına müsahibəsi

• Hazırda təlim-məşq toplanışına yığışmısız. Toplanış necə keçir?
• Masazırda hazırlıqlara başlamışıq. Toplanış yaxşı keçir. Məşqçilərin verdiyi tapşırıqlar üzərində işləyirik. Ab-hava əladır.
• Avrokuboklara gedə bilmədiyiniz üçün hardasa komandada məyusluq, üzüntü hiss olunmur?
• Ötən mövsüm artıq geridə qalıb. Keçmişlə yaşamaq lazım deyil, gələcəyə baxmalıyıq. Əlbəttə ki, son turda Konfrans Liqasına vəsiqəni əldən verməyimiz təəssüf doğurur. Ancaq bunu indi düşünmək lazım deyil. Qarşıdakı mövsümə köklənməliyik.
• Komanda yenidən formalaşır, gedənlər var və yenilər gəlir. Hər kəs düşünür ki, “Sabah” növbəti ilə “Qarabağ”a rəqib olacaq. Sənin fikirlərin necədir?
• Çempionatda bütün komandalar bir-birinə rəqibdir. Azarkeşlərin, medianın komandamız haqqında müsbət fikirlər deməsi sevindiricidir. Əlimizdən gələni edəcəyik ki, ümidləri doğruldaq.
• Bildiyin kimi komanda sayı 10-a çıxıb. Lakin yeni gələnlər böyük ehtimal autsayder kimi davam edəcəklər. Səncə, onların zəif olması güclülər üçün daha çox xal yığmaq fürsəti yaradacaq? Belə deyək ki, mükafatçılar sırasına düşmək istəyənlər bundan istifadə edəcəklər?
• Komanda sayının artması çox yaxşıdır. Üstəlik, bu mövsümdən Gəncə və Tovuz kimi bölkələrə səfərlər olacaq. Ən azından Premyer Liqamıza bu rəng qatacaq. Çətin və maraqlı mövsüm bizi gözləyir.
• Namik Ələsgərov gözlənilmədən “Sabah”a gəldi. Onun komandaya böyük xeyir verəcəyini düşünürsən?
• Namik Ələsgərov ölkənin ən istedadlı oyunçularından biridir. Milli komandamızın da üzvüdür. Onun gəlişinin “Sabah”a çox xeyir verəcəyini düşünürəm.
• Komandadan hansı oyunçunun getməsinə daha çox üzüldün?
• Ayrılıqlar futbolun bir parçasıdır və heç bir futbolçu hansısa komandada əbədi deyil. Gedənlərə gələcəkdə uğurlar arzu edirəm.
• “Sabah” çempionluq üçün mübarizə apara biləcək, yoxsa düşünürsən ki, ancaq yuxarı pillələr üçün oynayacaq?
• Bizim əsas məqsədimiz hər oyunumuza qələbə üçün çıxmaq və turnir cədvəlində mümkün qədər yüksək pillələlrdə qərarlaşmaqdır. Buna necə nail olacağımızı isə oyunlar göstərəcək.

CAVAD