Cəlal Hüseynov: “Rəqiblər oyunumuzu analiz etdilər”

“Şamaxı”nın müdafiəçisi Cəlal Hüseynovun futbolinfo.az saytına müsahibəsi

– “Şamaxı” turnir cədvəlinin son pilləsindədir. Səncə, Premyer Liqadakı mövqeyinizi qoruya biləcəksiz?

– İstəməzdik ki, bu cür olsun. Son pilləyə yuvarlanmaq planlara daxil deyildi. Təbii ki, sona qədər mübarizə aparacağıq. Arzumuz budur ki, tam gücümüzü toplayıb Premyer Liqada qalaq.

– Son matçda “Neftçi” ilə heç-heçə etdiniz. Bu, sizə qarşıdakı iki oyun üçün motivasiya olacaqmı?

– Motivasiya deməzdim, biz hər oyuna qələbə üçün çıxırıq. Rəqibləri ayırmırıq. “Neftçi” ilə matç da onlardan biri idi. Çalışdıq, xal qazandıq. Qarşıdakı iki matçda da bunu etməyə çalışacağıq.

– “Şamaxı” 4-cü dövrənin əvvəlinə qədər yaxşı çıxış edirdi. Sonra nə baş verdi ki, yüksəlişi qoruya bilmədiniz?

– Bilirsiz ki, gənclərdən qurulmuş komandayıq. Futbolda belə hallar olur. Bəzi təcrübəli futbolçular olsa da, Premyer Liqada güclü, heyətində legioner olan komandalara qarşı oynayırıq. Elə matçlarımız olub ki, çox yaxşı oynamışıq. Mübarizə aparırıq, davam edir. 4-cü dövrənin əvvəlinə qədər çox yaxşı idik, amma sonradan rəqiblər oyunumuzu analiz etdilər, “tutdular”.

– Son turda “Səbail”lə üz-üzə gələcəksiz. Düşünürsən ki, o həlledici matç olacaq?

– Sona 2 tur qalıb və maksimumu etməyə çalışacağıq. Ola bilər ki, Premyer Liqada qalmaq üçün hər şey son turda aydın olsun, elə ola bilər ki, heç ovaxta qalmasın. Yenə də hazırlaşacağıq. Ən yaxşısını etməyə hazırıq. İstər “Qəbələ”, istər “Səbail” ilə oyunda qalib gəlməyə çalışacağıq.

– Mövsüm sona çatır sən də icarə əsasında “Şamaxı”dasan. “Zirə”yə qayıdacaqsan?

– Açığı, bu barədə heç bir şey düşünməmişik. Mövsüm bitməyib, burada başa çatmamış missiyam var. Ondan sonra düşünəcəyik. Bütün fikrim “Şamaxı” ilədir.

– Sənə xaricdən təkliflər olduğu deyilir. Doğrudurmu?

– Bəli, var. Ən böyük istəyim xaricdə oynamaq, legioner həyatı yaşamaqdır. Maraq göstərən klublar olsa da, ciddi, real yanaşma yoxdur. Təklif ciddi olsa da, hər şeyi analiz edəcəyik. Təkcə bir addımı yox, növbətisini də düşünəcəyik. Çünki perspektivə, gələcəyə baxmaq lazımdır. Bu dəqiqə mənim inkişaf dövrümdür, elə yerə getməliyəm ki, daha yaxşı gələ bilim.

– Portuqaliyadan “Benfika” söhbəti var idi. O necə oldu?

– Belə bir maraq var idi. 2 il bundan öncə. Sonra pandemiya düşdü, gedə bilmədim. Mənə dedilər ki, səni izləyəcəyik. Ondan sonra bir xəbər yoxdur.

CAVAD