Cabbarovla Abdullayevin birgə izləməsi üçün müqayisəli VİDEO

İqtisadiyyat naziri Mikayıl Cabbarov müavini Rövnəq Abdullayevi yanına çağırmalı və təqdim etdiyimiz bu epizodu birlikdə izləməlidilər. Yox, nəticə dəyişməyəcək, Konfrans Liqasına “Sabah”ın yox, “Qəbələ”nin gedəcəyi zatən rəsmiləşib. Sadəcə, cənab nazir AFFA prezidentinə HƏR ŞEYİ gördüyünü anlatmalıdı.

Bir neçə gün öncə AFFA-nın avrokuboka vəsiqə qazananların siyahısına müdaxilə etmək istədiyini təsadüfən yazmamışdıq. Klub idarəçiləri bir o qədər təcrübəli deyil, amma biz illərimizi Azərbaycan futbolunu izləməklə, onun hər üzünü müşahidə etməklə keçirmişik. Bu səbəbdən AFFA üçün arzuolunmaz sayılan 2 klubun – “Zirə” və ya “Sabah”dan birinin qitə yarışlarından kənar saxlanılması üçün qurumun hər şey edəcəyini təsadüfən vurğulamırdıq. Nəticə ortadadı.

“Zirə” özü vəziyyətdən çıxdı, “Sabah” bu tur qalib gəlib gəlsəydi, Qəbələdəki matç həlledici olacaqdı. Belədə AFFA avrokuboklara son vəsiqənin taleyinin həll olunduğu, bütün diqqətlərin yönəldiyi oyunda bəd əməllərini həyata keçirə bilməyəcəkdi. Ən yaxşısı həmin duelə kimi bütün suallara aydınlıq gətirmək, sözügedən matçı formallığa çevirmək idi. Onlar da bunu bacardılar.

“Sumqayıt”la dünənki matç barədə geniş yazmağın mənası yoxdu. Sadəcə, “Sabah”ın azlıqda qaldığı epizodla bu komandalar arasındakı əvvəlki oyunda baş vermiş oxşar anı müqayisə etmək kifayətdi. Birində “Qəbələ”yə güzəşt edilir, digərində “Sabah”a ən sərt cəza verilir. Azlıqda qalan komandanın “Sumqayıt”la görüşdə büdrəmək şansı çoxaldıldı və ssenari reallaşdı. Hətta “Sumqayıt” qol vurmasaydı belə, bunu hakimlər özü edəcək, plan yerinə yetiriləcəkdi.

İndi top Cabbarovdadı. Könlünü verdiyi, yaranmasında rolu olduğu “Sabah”ın AFFA-nın hansı çirkli oyularına qurban getdiyini anlasın, futbol təsərrüfatına rəhbərlik edən müavinindən hesab soruşsun. Bu oyun Mikayıl bəyi futbolda uğursuz göstərmək, onun futbolda söz sahibi olmasına əngəl olmaq, imicini zədələmək üçün Elxan Məmmədovun planlaşdırdığı qurğu idi. Bacardılar…

CAVAD