Milli komanda
Canni De Byazi: “Son vaxtlar işlərimiz yaxşı gedir”
Futbol üzrə Azərbaycan milli komandasının baş məşqçisi Canni De Byazi səfərdə Moldova yığmasına qarşı keçirəcəkləri yoxlama oyunundan əvvəl fikirlərini bölüşüb.
Futbolinfo.az xəbər verir ki, italiyalı mütəxəssis bu gün baş tutan mətbuat konfransında bunları söyləyib:
“Seçmə mərhələyə 122 gün qalıb. Qarşıdakı iki yoxlama oyunu seçmə mərhələ öncəsi inam qazanmaq baxımından bizim üçün vacibdir. Həyatda irəliyə getmək üçün nəyisə çox istəməli, inkişaf etməlisən. Bu, sabitlik baxımından da önəmlidir. Gördüyünüz kimi həmişə Bakıdayam, bütün oyunları izləyirəm. Hazırda düşərgədə 26 futbolçu var. Bu oyunçular bizə seçmə mərhələdə kömək edə bilərlər. Millinin qapısı hamı üçün açıqdır. Amma bağlana da bilər. Son vaxtlar işlərimiz yaxşı gedir. Buna görə sevinirəm”.
O, yığmaya dəvət alan futbolçulardan Emin Mahmudovla Riçard Almeydanı digər futbolçulara nümunə göstərib: “Yadınızdadırsa, Emin əvvəl çox oynamırdı. Amma onunla söhbətdən sonra əsas heyət üzvünə çevrildi. Almeydaya gəlincə, əvvəl düşünürdüm ki, daha çox gənclərə şans verməliyəm. Lakin gördüm ki, Riçard meydanda can qoyur. Braziliyadan olsa da, daha çox azərbaycanlıdır. Kim millidə oynamaq istəyirsə, düzgün nümunə olmalıdır”.
66 yaşlı baş məşqçi 2021-ci ilin yayında baş tutan yoldaşlıq oyununda 0:1 hesabıyla uduzduqları Moldova yığmasından revanş almaq barədə düşünmədiklərini söyləyib: “Dünən uşaqlara dedim ki, 17 ay öncə burada uduzmuşduq. Onda yanaşma yaxşı deyildi. İstəyim odur ki, meydana qələbə üçün çıxaq. Qarşıda bizi 2 maraqlı oyun gözləyir. Meydanda bütün gücümüzü ortaya qoymalıyıq”.
De Byazi heyəti gec açıqlamasının səbəbini də izah edib: “Ölkə çempionatında son oyunlar ötən həftə olub. Bundan sonra dərhal heyəti açıqladıq. Əksər futbolçularımız yerli liqada çıxış edir. Bu mənada heyəti tez açıqlamağın mənası yox idi”.
Noyabrın 16-da Kişinyovdakı “Zimbru” stadionunda baş tutacaq Moldova – Azərbaycan matçına Bakı vaxtı ilə saat 21:00-da start veriləcək.
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?