Ölkə futbolu
Dar-ma-da-ğın! Yunanıstanda… Əzə-əzə…
Belə qələbələrə ad qoymaq olmur. Özündən qat-qat güclü rəqibə sənə düşmən kimi baxıldığı ölkədə əzə-əzə qalib gəlməyin zövqü bir başqadır. Və əvvəlki oyunlar da göstərir ki, bu, sıradan bir hesab deyil, sistemli işin, uğurlu strategiyanın nəticəsi olan darmadağındır.
Qurban Qurbanov – sağlığında heykəli qoyulası adamdır. Məhdud heyətlə, rəqibləriylə müqayisədə həddindən artıq az büdcə ilə Avropada xarüqələr yaradır. Böyük ehtimalla avrokubokların yaz mərhələsi üçün vəsiqəni də təmin edib. Adına stadion veriləsi, mükafat təsis ediləsi biridir. 9 ildir ölkənin futbol imicini sıfırdan qurduğu komanda ilə zirvələrdə saxlayır. Və bütün bunları ölkənin futbol idarəçilərinin qısqanclığı, təzyiqləri fonunda edir.
“Qarabağ” artıq simvola çevrilir. Uzun illər qaçqınların, məcburi köçkünlərin yeganə sevinc mənbəyi olan komanda indi bütün ölkənin fəxr qaynağıdı. Futbolçusuyla, məşqçisiylə, ağıllı rəhbərliyi ilə illər boyunca çəkilən zəhmətin bəhrəsini görürük.
“Nant”ın ardınca “Olimpiakos”un da 3:0 hesabıyla məğlub edilməsi gözardı edilə bilməz. Artıq “Qarabağ” üçün ev və ya səfər oyunu yoxdur, ağdamlılar çıxdığı bütün oyunlarda diqtə edən tərəf olur. Avropa nəhəngləri üçün belə çətin səfər sayılan Yunanıstanda bu qədər rahat oynamaq… yalnız fəxr etmək lazımdır.
Düzdü, hələ mübarizə bitməyib, qarşıda daha 3 oyun var. Lakin komanda o qədər güvən verir ki, ən pis halda 3-cü yerlə Konfrans Liqasına vəsiqə qazanılacağına şübhə etmək istəmirsən. 2 ev və 1 səfər oyunu qalıb, Bakıda yenilməmək xoş sonluq üçün kifayətdir, amma Bakıda qazanılacaq qələbələr daha çoxuna ümid etməyə imkan verir.
Fantastik qələbədir. Azərbaycan futbolunun hazırkı durumunun üstündə bir səviyyə, real potensialının aynası olan uğurdur “Qarabağ”ın etdikləri. Bu sistemi, bu modeli ümumi Azərbaycan futboluna tətbiq etməyin zamanı çoxdan yetişib.
CAVAD