Milli komanda
De Byazinin “Qarabağ” üslubu
İllərdi bunu deyirik, bunun üçün çalışırıq. Azərbaycanlı futbol oynaya bilir, heç kimdən istedadsız deyil. Düzgün istiqamət, düzgün strategiya, işə düzgün yanaşma və Azərbaycanı sevməyənlərin əsarətindən xilas olmaq ilə çox şeyə nail ola bilərik. Futbolun inkişafı üçün məşqçiləri, futbolçuları dəyişmək lazım deyil, futbolun başındakıların özünü, düşüncəni dəyişmək lazımdı.
Kimsə bəyənməyə bilər, amma milli komandanın ardıcıl 5 qələbə qazanması tarixdir. Bəli, bu oyunlarda qarşımıza zəif rəqiblər də çıxıb, əhəmiyyətsiz oyun olduğu üçün bütün gücünü qoymayanlar da. Amma və lakin bundan istifadə etmək özü də bir uğurdu.
Canni de Byazini böyük məşqçi saymıram, Avropada heç ortabablardan da deyil. Lakin çox ağıllıdı, o qədər ağıllı ki, ötən zaman ərzində nicat yolunu tapa bildi. Axına qarşı üzməyi tərgidib, yerli kadrlardan Qurban Qurbanov kimi istifadə etməyi öyrəndi, “Qarabağ”ın oyunçularının üstünlük təşkil etdiyi heyət qurdu, ən önəmlisi, bu komandanın oyun dəst-xəttini “kopyaladı” və qələbələri sıralayır.
Öyrənmək heç vaxt gec deyil. De Byazi 66 yaşında öyrənir və uğurlu modeli tətbiq edir. Seçmə mərhələdə çətin olacaq, lakin ən azı futbolçularda özünəgüvən yaranır. AFFA-nın səriştəsiz idarəçilərinə qulaq asmasa, davamı gələcək.
De Byazi indiyədək bunu niyə etmirdi? Çünki Elxan Məmmədovun nəfəsi hər an üstündə idi, onun göstərişlərindən, şəriki Riad Rəfiyevin tapşırıqlarından kənara çıxa bilmirdi. İndi Məmmədov Parisdən hadisələrə istədiyi kimi müdaxilə edə bilmir, təsir qüvvəsi azalıb və italiyalı daha rahat işləyir. “Sumqayıt”da oyunçu alveri ilə məşğul ola-ola klubu da süquta uğradan Rəfiyev isə öz başının hayındadı, daha klubsuz futbolçuları siyahıya saldırmır, italiyalı həqiqətən formada olanları, layiqliləri düşərgəyə dəvət edir. 14 ildi Azərbaycan futbolunu məhv edən bu adamlar və aid olduqları dəstə birdəfəlik kənara atılsa, həm ölkə futbolu, həm də milli komanda inkişaf edər.
Ona da əmin olun ki, Qurban Qurbanov millidən vaxtsız göndərilməsəydi, indi Azərbaycan yığması tamam fərqli, daha yüksək səviyyədə idi. Bir var onu “kopyalasınlar”, bir də var özü olsun. Hətta millini de Byazinin əvəzinə başqa layiqli yerli mütəxəssis çalışdırsaydı, yenə nəticə daha yaxşı olardı.
Söhbət dünənki oyunda bütün qolları “Qarabağ”lıların vurmasından getmir, heç penaltiyə səbəbkar olan rus, qırmızı vərəqə alan fars milliləşənləri də önə çəkməyin yeri yoxdu. Sadəcə, milli ruhən “Qarabağ” kimi oynayır, qalib ruhlu futbolçuların əsasını təşkil etdiyi milli məhz belə oynamalıydı. Yaxşı oynayanda nəticələr də sıralanır.
Təki de Byazi bu yoldan dönməsin, öyrənməyi, tətbiq etməyi özünə ayıb bilməsin, davam etsin. Özümüzdə Avropanın da qəbil etdiyi “Qarabağ” kimi nümunə varkən…
Musa Qurbanlının milli komandada ilk qolunu vurması da italiyalını ayıltmalıdı. Elxanlar, riyadlar gəldi-gedərdi, Azərbaycan futbolunun dünəni də, bügünü də, sabahı da bu oyun üçün can qoyanların – qurbanovların, cavadovların, diniyevlərin, sadıqovların və b. adı ilə bağlı olacaq.
VÜSAL MAHMUDOV
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-23 08:00
“Səbail” “Sabah”a uduzsa…
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”