Ölkə futbolu
Diniyev “Qarabağ”ı görməyəcək – “Kəpəz”i meydana Mərdanov çıxaracaq
“Kəpəz” yeni baş məşqçisini elan etməyə tələsmir. Gəncəlilər Yaşar Vahabzadənin boşaltdığı postu tutacaq şəxsi yalnız növbəti turdan sonra ictimaiyyətə təqdim edəcək.
Əslində, Qərb klubunun Şahin Diniyevə tapşırılacağı demək olar, dəqiqləşib. Təyinatın rəsmiləşməsi qalır ki, bu da “Qarabağ”la matçdan sonra reallaşacaq. Təcrübəli mütəxəssisin vaxt azlığı üzündən komandanın “sükanı arxasına” tələm-tələsik keçmək istəmədiyi deyilir. O, məğlubiyyət ehtimalının böyük olduğu ağdamlılarla Qəbələ görüşündən sonra komandanı təhvil alacaq.
Çempionla qarşılaşmada köməkçi-məşqçi Xaliq Mərdanov iş başında olacaq, Diniyevin debütü isə “Turan Tovuz”la səfər matçına təsadüf edəcək.
3-cü dəfə “Kəpəz”in baş məşçisi olacağı gözlənilən Şahin bəy bu posta yeganə namizəd olmayıb. Son ana qədər Aftandil Hacıyev və klub rəhbərlərindən Mehman Allahverdiyevin dəstəklədiyi Novruz Əzimovun təyinatı da müzakirə edilib. Hələlik Diniyevin üzərində dayanılıb. Qarşıdakı günlərdə qeyri-adi bir şey baş verməsə, gözlənilən təyinat reallaşacaq.
“Kəpəz” – “Qarabağ” oyununun turun digər matçlarından 2-3 gün öncəyə salınması təsadüfi deyil. Ağdamlılar Avropa Liqasının qrup matçı üçün Almaniyaya gedəcəyindən, Premyer Liqa oyununun daha tez oynanılmasını xahiş edib. Çünki ölkə çempionu “Frayburq”la görüşə iki gün öncədən – sentyabrın 6-da getməyi planlayıb.