Ölkə futbolu
Elxan Məmmədovun biznes imperiyası
AFFA-nın icraçı vitse-prezidenti Elxan Məmmədovun Parisə qaçması ilə iş bitmir. Onun Azərbaycan futboluyla bütün əlaqələrini kəsmək lazımdı. Futbolumuza zəli kimi daraşan və qopmaq istəməyən ətrafı, dost-tanışı, qohumları təmizlənməyənə kimi hansısa inkişafa ümid etmək yersizdi.
Ölkənin əksər stadionlarında Məmmədovun kadrları iş başındadı. Milyonların “yuyulduğu” Bakı Olimpiya Stadionu, “Dalğa Arena” da daxil olmaqla bütün arenalarda “təmizlik” aparmaq lazımdı.
Dövlətin pulu ilə şəxsi kanalına çevirdiyi “CBC Sport”un həm rəhbərliyi, həm də strategiyası dəyişməli, kanalın bir şəxsə yox, ümumi futbol xidmət etməsi təmin olunmalıdı.
AFFA-nın bütün milli komandalar üçün toplanışlarını, xaricə səfərlərini bir şirkət təşkil edir və Elxan Məmmədova məxsusdu.
Müxtəlif tədbirlərin təşkilində baş rolda olan ketrinq şirkətləri, top, forma və başqa inventarların təminatçısı olan şirkətlər araşdırılmalıdı.
Futbolumuzda illərdi xidmət göstərmək adıyla milyonlar dağıdan bu şirkətlər ya Məmmədovundu (başqasının adına olsa da), ya da yaradılan şəraitin qarşılığnda ona haqq ödəyirlər. Təkcə xarici toplanışları təşkil edən şirkətin illik xidmət haqqından qazancının 3 milyon manatdan çox olduğunu nəzərə alsaq, görün, bu şəxslər futboldan nələr qazanır? Elxan bəyin yağlı tikəni əldən verməmək üçün illərdi çabalaması bununla bağlıdı.
Məmmədovun ən böyük biznesi qazonla bağlıdı. İlk öncə işə süni örtük salınmasıyla, onların dəyişdirilməsi, qulluq edilməsi ilə məşğul olan “AqroSport” (bu şirkətin adı söz-söhbətlər üzündən dəfələrlə dəyişdirilib, amma rəhbərlik və işçi heyəti eynilə qalıb) son illər təbii örtük monopoliyasını da ələ alıb. Ölkənin əksər arenalarına bu şirkət qulluq edir, beynəlxalq qurumlardan bu məqsədlə ayrılan pullar eyni cibə gedir. Təkcə AFFA-nın balansında olan idman qurğularına hər il 10 milyon manata yaxın vəsait ayrılır və bu büdcədə rəsmən göstərilir.
Təsəvvür edin, Qəbələdəki 8 meydançanın saxlanma pulunu AFFA cəmi bir meydançasına ayırır. Bu fakt özü saxtakarlığın, pulyemə mexanizminin miqyasını göstərməyə kifayətdi. Məmmədov başqa şirkətləri futbola yaxın buraxmır, rəqabət sayəsində xərclərin azalmasına, keyfiyyətin yüksəlməsinə imkan vermir. Beləcə milyonlar mənimsənir, rahat qazanc əldə edilir.
Bu insanlar o qədər həddi aşıb ki, bəzi stadionların qazonunu bilərəkdən xarab edirlər. Arenalara qulluq edən şirkət keçən il Sumqayıtdakı “Kapital Bank Arena”nın qazonunu xüsusi dərmanla yararsız hala gətirmiş, sonra isə yenidən təmir etdirilməsi üçün pul ayrılmasına nail olmuşdu. Keyfiyyətsiz işə görə hesabat istəyən yoxdu, dövlətin maliyyəsini dağıtmaq, ciblərinə doldurmaq üçün hər varianta əl atırlar.
Bütün bu məsələlər araşdırılmalı, Məmmədovun biznes imperiyası çökdürülməlidi. Parisdə, FIFA-nın qoltuğu altında, təhlükəsizlik çətiri altında özünə yer edən bu adamın eyni əməllərə davam etməsinin qarşısı alınmalıdı.
FƏRİD
- Ölkə kuboku2024-02-09 20:56
“Qarabağ”ın yarımfinaldakı rəqibi “Neftçi” oldu
- Milli komanda2024-02-08 21:39
Millətlər Liqası: Azərbaycan yığmasının rəqibləri bəlli oldu
- Milli komanda2024-02-09 11:01
“Azərbaycanla bağlı pis xatirələrimiz var”
- Ölkə futbolu2024-02-09 08:00
2023-də yatıb qalmış “Səbail”, Musayevsiz “dirilən” “Sabah”