Emin Mahmudov “Səbail”i təkbaşına yendi

Mövsüm yarılanır, Mahmud Qurbanovun bəhanələri isə bitmir. Çempionatın ən imkanlı klublarından biri olan “Səbail” 15 tura cəmi 10 xal toplayıbsa, avrokubok zonasından 12 xal geri düşübsə, danışmaq yox, istefa ərizəsi yazmaq lazımdı. Rəhbərliyin yaratdığı əla şəraitin qarşılığında sıralanan uğursuzluğa don geyindirmək yox, qovulmadan getmək lazımdı.

Rəqibin “Neftçi” olduğunu nəzərə alsaq, bəlkə də dünənki məğlubiyyətə görə “Səbail”i qınamamalıyıq. Lakin Bayıl təmsilçisində xoş gələcəyə ümid verəcək heç nə yoxdu – komandanın oyun dəst-xətti seçilmir, hər tur dəyişən heyətdə sabitlik görünmür, ən əsası, məşqçi işindən danışa bilməyəcəyik. Öncəki turlarda qısa bir dönəmdə komanda fərqli futbol sərgiləməyə nail oldu, amma davamı gəlmədi və çətin qrafiki nəzərə alsaq, qışa kimi qalan müddətdə ilk “beşlik” xəyaldı.

Bildiyimizə görə, rəhbərlik ilk 2 dövrədən sonra 5-ci pilləni tutmağı Qurbanovun qarşısına hədəf qoyub. Buna nail olmaq mümkün deyil, ona görə də qovulmadan getmək özünəhörmət əlaməti sayıla bilər. Mahmud bəy yaxşı futbolçu olub, bəlkə yaxşı məşqçi kimi də nəvaxtsa özünü sübut edəcək, lakin indi onda heç nə alınmır. Ətrafına yığdığı menecer dəstəsi transfer zamanı onu aldadıb, o isə əsəbini futbolçulardan çıxır, klubdaxili ab-hava pozulub. Belə mühitdə uğur qazanmaq mümkünsüzdü.

“Neftçi” hələ iddialı durumdadısa, bunun səbəbi zəif rəqiblərlə oyunlarda maksimuma nail olmağa çalışması, bunu demək olar, bacarmasıdı. Komanda parlaq oynamır, rəqiblər üzərində əzici üstünlük qazanmır, lakin heyətdə olan usta futbolçular lazımi hesabı təmin edə bilirlər. Necə ki, dünən karyerasının ilk het-trikini edən Emin Mahmudovun sayəsində vacib qələbə qazandılar.

Amma “Neftçi”nin oyunu çox kövrəkdi. Dünən “Səbail” qısa zaman ərzində az qala hesabı bərabərləşdirəcəkdi. Problemlər içində çabalayan “dənizçilər” bunu edirsə, bir az dişli komanda belə epizodları bağışlamayacaq. Bakılıların heyəti çempionluğa oynamaq üçün yetərli deyil, dünən də ciddi itkilər var idi. Qışa planlaşdırılan transferlər reallaşdıqdan sonra “Neftçi”dən daha çox şey tələb olunacaq. Amma qışa kimi yüksək pillərdə qalmaq lazımdı ki, intriqa davam etsin. Bu gün qalib mühakimə olunmur, lakin növbəti turda fərqli nəticə də ola bilər.

Bu gün “Səbail” daha bir pillə enəcək. Şamaxıdakı matçın əticəsindən asılı olaraq, ya yerli komanda, ya da “Kəpəz” 7-ci yerə yüksələcək. “Neftçi”nin isə “üçlük”də qalacağı dəqiqdi.

FƏRİD