“Evdə heç bir rəqiblə oyunda xal itirə bilmərik” – “Qəbələ”nin müdafiəçisi

“Qəbələ”nin futbolçusu Ruan Renatonun futbolinfo.az saytına müsahibəsi

• “Kəpəz”lə evdə oynadınız, amma xal itirdiniz. Bunu necə şərh edərsən?
• Həqiqətən də gözlədiyimiz nəticə olmadı. Xüsusən evdə oynayaraq heç bir rəqibə xal itirə bilmərik. Amma təəssüf ki, indi bu itirilmiş xalları bərpa etməliyik.
• Ardıcıl iki oyundur ki, xal itirirsiniz və üstəlik, bu sizdən daha zəif görünən rəqiblərinizlə matçlarda baş verir…
• Zəif komanda fikri artıq bitib və bizim düşüncəmizdə belə şeylər ola bilməz. Qarşı tərəfdə 11 futbolçu var ki, onlar da oyun günü gəlib əllərindən gələni etmək üçün çox çalışırlar. Mən inanıram ki, keçən mövsümdəki kimi “Qəbələ” uğurlarına davam edəcək və rəqiblər bizimlə matçlara həyatlarının oyunları kimi hazırlaşacaqlar. Texniki, taktiki keyfiyyətlərimiz və heyətimiz daha yaxşı olmağa imkan verir.
• “Şamaxı” və “Kəpəz” kimi komandalarla matçdakı xal itkisi sizə mənfi təsir etməyəcək?
• Düşünmürəm, məqsədimiz hər oyunu özünəməxsus bir oyun kimi düşünməkdir, səhvlərimizdən dərs alıb inkişaf etməliyik. Amma o nəticələr keçmişdə qalıb, indi diqqəti “Sabah”a vermək və hazırlaşmaq vaxtıdır. Əlimizdən gələni etməliyik.
• “Sabah”ın yaxşı mövsüm keçirdiyini nəzərə alsaq, 1 xal qənaətbəxş nəticə olar?
• “Sabah” həqiqətən də bu mövsüm çox yaxşı çıxış edir və biz onların komandasının keyfiyyətini bilirik. Amma rəqibdən asılı olmayaraq, “Qəbələ” həmişə qalib gəlmək üçün meydana çıxacaq. Biz nəyə qadir olduğumuzu bilirik və inanıram ki, bu, əla oyun olacaq. Qalib tərəfin biz olacağına ümidim böyükdür.

AĞA