Fariz Nəcəfov: “Tələsik qərarlara ehtiyac yoxdur”

“Qəbələ” futbol komandasında gələn mövsüm üçün baş məşqçi məsələsinə aydınlıq gəlib.

Futbolinfo.az xəbər verir ki, bu barədə “Report”a klubun prezidenti Fariz Nəcəfov məlumat verib. O bildirib ki, Elmar Baxşıyev yenə komandanın sükanı arxasında olacaq.

Qeyd edək ki, yarımçıq dayandırılan 2019/20 mövsümündə 20 oyundan 19 xalla 8-ci yeri tutub və Azərbaycan Kubokunun yarımfinalınadək irəliləyib.

Hazırda komandanın istirahətə buraxıldığını bildirən klub prezidenti qarşıdakı planlardan da söz açıb:

“Yaxın günlərdə məşqçilər korpusu ilə yeni mövsümün hazırlığına dair görüşümüz olacaq. Komandadakı oyunçular və eyni zamanda hazırlığa dair qərarlar qəbul edəcəyik. Sözsüz ki, dəyişikliklər – gedən və gələn futbolçular olacaq. Uzun illərdən sonra ilk dəfə avrokuboklarda iştirak etməyəcəyik. Bu səbəbdən, tələsik qərarlar qəbul etməyə də ehtiyac yoxdur. Eyni zamanda yeni mövsümün startı ilə bağlı da konkret tarix bilinmir. Yəni hazırlıq üçün kifayət qədər vaxtımız var”.

Klubun fəaliyyətini davam etdirəcəyini də vurğulayan “Qəbələ” rəsmisi “Sadəcə məlum vəziyyətlə bağlı büdcəni formalaşdırmaq üçün çətinliklər var. İnanıram ki, lazim olan vəsaiti əldə edə biləcəyik” – deyə əlavə edib.

O, gələn mövsüm heyətdə klub akademiyasının futbolçularnın çoxluq təşkil edəcəyini də vurğulayıb: “Bununla belə tam komanda formalaşdırmaq üçün potensial yoxdur. Ona görə də hansısa mövqedə legionerin olması qaçılmazdır”.