“Gəncəli veteranlar bu sualı Tərlan Əhmədova ünvanlasınlar”

Qış fasiləsində “Kəpəz”dən “Şamaxı”ya keçən Əli Səmədovun futbolinfo.az saytına müsahibəsi

– “Şamaxı”ya keçidiniz necə baş tutdu?

– “Kəpəz”in əvəzedicilərində məşq edirdim. Açığı, heç bir təklifim də yox idi. “Şamaxı”nın məşqçiləri Vüqar Əsgərli və Cavid Hüseynov sağ olsunlar ki, məni komandalarında görmək istədilər. Təklif gəldi, danışıqlar apardıq. Mən də böyük məmnuniyyətlə razılığımı bildirdim. Hər ikisinə minnətdaram.

– Doğma komandanız “Kəpəz”dən ayrılmaq sizə çətin olmadı?

– Əlbəttə ki, çətin oldu. 7 il idi ki, o komandada çıxış edirdim, 4 il də kapitanlıq sarğısını daşımışam. Özüm də gəncəliyəm. Klubun ən ağır günlərində, pis vaxtlarında orada olmuşam. Ayrılmaq bir az ağır gəldi. Amma futbolda bu gün buradasansa, sabah başqa yerə keçə bilərsən. Futbol həyatı belədir. “Şamaxı”da da yaxşı atmosfer var, hər şey ürəyimcədir. Bura özümü yad hiss edəcəyim yer deyil. Mehribanlıq yüksək səviyyədədir.

– 7 il formasını geyindiyiniz komandanı bu şəkildə tərk etməyin kökündə böyük səbəb durmalıdır. Nə baş verdi ki, Tərlan Əhmədov sizi və bir neçə futbolçunu əsas heyətdən uzaqlaşdırdı?

– Başlanğıcda hər şey qaydasında gedirdi. Tərlan Əhmədov gələndən sonra da sabit oyunlarımı keçirirdim. Amma birdən-birə nəsə oldu. “Sabah”la matçdan sonra dedi ki, tapşırıqlarımı yerinə yetirmədin. Bununla da əvəzedici heyətə göndərildim. Məndən əvvəl Rauf Əliyev, sonra isə Əfran İsmayılova Elvin Yunuszadə əvəzediciyə gəldi. Mənim kimi, onlar da əsas komandadan göndərilmə səbəbini bilmədilər. Mənə hələ də maraqlıdır ki, niyə orada idim? Gəncədə məni tanıyanlar bilirlər ki, hansısa taktiki gedişi pozmağım, intizamsızlıq eləməyim mümkün deyil.

– Tərlan Əhmədov mətbuat konfransında bildirmişdi ki, istədiyi səviyyədə oynamırsınız. O qədər zəif olsaydınız, “Şamaxı” sizi istəyərdi?

– Sadəcə, mətbuata dediyi səbəb bu idi. Özü ilə də danışmışdım. Dedi ki, oyunda taktiki gedişi pozmusan, künc zərbəsi zamanı səni filan yerə qoymuşdum, orada durmamısan. Orada nə etdiyim mənə də maraqlı qalır. Bəhanə olub-olmadığını bilmirəm. Zəif çıxışa görə komandadan göndərilməyim mümkün deyil. Hamı matçlarımın videoyazılarına baxa bilər. Demirəm ki, bütün görüşləri yüksək səviyyədə keçirmişəm. “Sabah”la həmin qarşılaşmada komanda olaraq zəif oynadıq.

– “Kəpəz”in baş məşqçisi gəncəlilərə üstünlük vermək istədiyini bildirdi. Əgər belədirsə, sizə niyə yerə tapılmadı?

– Bu sualı özüm də özümə verirəm. Gəncədə sözünü demiş veteran futbolçular var. İstərdim ki, onlar bu sualı Tərlan Əhmədova ünvanlasınlar. Hər şeyi danışaraq qalmaqalla yadda qalmaq da istəmirəm. Bəlkə də beləsi xeyirlidir. “Şamaxı” mənim üçün daha yaxşı olacaq.

– Klub rəhbərliyi niyə sizə dəstək vermədi?

– Gəncə futbolunda çox insandan incikliyim var. Bu vəziyyətə düşəndə mənə dəstək verənləri də, kənara çəkilənlər də gördüm. Arxamca danışanlar da oldu. Baş məşqçi hansısa qərar verə bilər. O məni yaxşı tanımır. Lakin komandanın içində məni tanıyanlar çoxdur. İncikliyim onunla bağlıdır ki, azarkeşlərdən və bəzi insanlardan başqa çox dəstək görmədim. Deməzdim ki, klub rəhbərliyindən narazılığım var. “Kəpəz”in icraçı direktoru İlqar Nadiri ilə söhbətim oldu. Dedi ki, sənə dəstəyəm. Açığı, getməyimi istəmirdilər. İlqar müəllim demişdi ki, burada qal, hər şey yaxşı olacaq. Tərlan Əhmədov söz vermişdi ki, fevralda komandaya qayıdacağam. Düzü, qəlbim qırılmışdı, özüm də istəmirdim. “Şamaxı” variantının çıxması lap əla oldu. Burada özümü göstərmək istəyirəm.

– Mövsümün ikinci yarısı ilə bağlı hədəfləriniz nələrdir?

– Hədəf əlimizdən gəldiyi qədər turnir cədvəlinin yuxarı pillələrində qərarlaşmaqdır. “Şamaxı”nın oyunlarını mən də izləmişəm. Hər matçda artırırdılar, daha yaxşı çıxış edirdilər. Məncə, daha yuxarı yerlərə yüksələ bilərik. Hər şey öz əlimizdədir.

– Baş məşqçi dəyişikliyi olarsa, yenidən “Kəpəz”də oynayarsınız?

– Baş məşqçi dəyişikliyi olsa, bəlkə… Amma indi “Şamaxı” komandasındayam. Burada hər şey mənim üçün yaxşıdır, mehriban kollektiv var. “Şamaxı”dakı futbolçularla, məşqçilərlə çalışmaq mənə rahat gəldi. Hələ ki, başqa bir fikrim yoxdur, çempionata köklənmişəm. “Şamaxı”ya kömək olmaq üçün əlimdən gələni etmək istəyirəm.

FƏRİD