“Hamı düşünür ki, “Sabah” 3-4 top fərqi ilə qalib gəlməlidir, amma çətindir”

“Sabah”ın futbolçusu Boyan Letiçin futbolinfo.az saytına müsahibəsi

• “Şamaxı” ilə matç haqqında fikirlərin necədir?
• Çox çətin oyun oldu. Rəqib taktiki olaraq çox yaxşı dayandı. Onlar bizim qapıya yaxınlaşmaq yollarımızı bağlamışdılar. Çox gərgin oldu və sonda qol vurub qalib gəldik.
• Amma “Sabah”ın asan qələbə qazanacağını və daha çox qol vuracağını düşünənlər az deyildi…
• Oyunun çox çətin keçdiyini dedim. Birinci səbəb bizim həmişəki səviyyəmizdə olmamağımız idi. İndi hamı düşünür ki, “Sabah” belə komandalara 3-4 top vurub qalib gəlməlidir. Amma elə deyil. Çətindir, bu gün bütün komandalar futbol oynayır. Zaman getdikcə bu cür oyunlara biz çox şahidlik edəcəyik. Amma biz həmişə eyni tempdə, səviyyədə olmasaq da, qalib gələ biləcəyimizi göstərməliyik.
• “Sabah” yüksək temp yaxalayıb və uğurlu qrafiklə gedir. Bunun olduğu kimi davam etməsi üçün nə lazımdır?
• Əgər həmişəki kimi öz səviyyəmizdəyiksə, motivasiyalıyıqsa, nizam-intizamlıyıqsa, istəkliyiksə və qələbəyə acıqsa, bu ritmdə davam etməməyimiz üçün heç bir səbəb görmürəm.
• Çempionluq az da olsa, mümkün görünür? “Qarabağ”dan üstün olmaq üçün nəyə ehtiyac var?
• Çempionatın əvvəlində olduğumuz üçün bu haqda danışmaq çətindir. Bizim üçün ən önəmlisi qarşımıza çıxan hər oyuna diqqət yetirmək, irəli getməkdir. Addım-addım, oyun-oyun irəlilədikdən sonra harda olacağımızı, nələr etdiyimizi görəcəyik.
• “Qarabağ” – “Neftçi” oyununu izlədin? Razısan ki, “Qarabağ”la digər komandalar arasında böyük fərq var?
• Mən hər bir rəqibə hörmət edirəm. “Qarabağ”a bütün bu illər ərzində həm liqada, həm də Avropada göstərdiyi nəticələrə görə alqışlar düşür. Yaxşı komandadır, gözəl futbol oynayırlar, amma məncə “Sabah” onlarla bərabər səviyyədə ola biləcəyini göstərib.
• Qarşıda “Kəpəz”lə oyun var və bu komanda heç də yaxşı vəziyyətdə deyil…
• Bizim hədəfimiz hər oyunda qalib gəlməkdir. Rəqibin bizim üçün fərqi yoxdur.

FƏRİD