Ölkə futbolu
Heç-heçəsiz davam: Tur qonaqların diqtəsi ilə keçir
3 oyun, hamısında da qonaqların qələbəsi – Azərbaycan Premyer Liqasının 2-ci turunun tablosu belədi. Güman ki, bu gün vəziyyət dəyişəcək. “Qəbələ” ilə “Neftçi”nin favorit olduğu matçlarda seriyanın davam etməsi mümkünsüz görünür.
Əslində, belə gedişat hələ Sumqayıtda bitə bilərdi. “Sumqayıt” “Qarabağ”la matçda çox yaxşı futbol sərgilədi, xala da layiq idi. Amma son dəqiqələrdə ağdamlıların təcrübəli futbolçuları nəticəni dəyişməyi bacardı. Eksperimental heyətlə meydana çıxan çempion, yalnız əsas heyət üzvlərinin meydana çıxmasından sonra vacib qələbəni qazandı. Oyuna əlavə olunmuş vaxtda reallaşan hər iki qolun oyuna sonradan girənlərin ötürmələriylə vurulması faktı hər şeyi deyir.
Düzdü, “Qarabağ” matç boyunca “Sumqayıt”dan daha yaxşı təsir bağışlayırdı. Lakin “kimyaçılar”ın əks-hücumları effektiv alınırdı, bir neçə epizodda qol vurmaq şansı qazandılar, hətta Filip Ozobiçin qapı xəttindən çıxardığı top bəlkə də matçın qırılma anı idi. Bundan sonra Qurban Qurbanov ardıcıl əvəzləmələrə başladı, əsas futbolçular oyuna girincə isə vəziyyət dəyişdi.
Aleksey Baqa “Sumqayıt”da uğursuz işi ilə yadda qalsa da, dünən komanda yaxşı oyun sərgilədi. Belaruslu bir növ Ayxan Abbasovun vaxtındakı futbolu qaytarmağa cəhd edir. “Sumqayıt” dinamik oynayanda isə həm azarkeşlərə zövq verir, həm də rəqiblərə çətin anlar yaşadır. Dünən tribunaları dolduran azarkeşləri sevindirmək mümkün olmasa da, oyuna gələnlər yaxşı oyundan məmnun qalmalıdı.
Təəssüf ki, nəticələr pisdi. 2 turdan sonra qolsuz və xalsız qalan “kimyaçılar” autsayderdi. Bu vəziyyət əlavə təzyiqə səbəb olmasa, komanda dünənki kimi oynamağa davam etsə, xallar da gələcək.
Daha bir autsayder “Səbail” haqda bir o qədər inamlı danışa bilməyəcəyik. Bayıllılar hətta top fərqində daha öndədi, ancaq komandanın oyun üslubunun formalaşması daha çox zaman alacaq. Tamamilə yenidən qurulan heyətdə yaxşı futbolçular olsa da, Mahmud Qurbanov hələlik istədiyini ala bilmir.
Ötən tur “Qarabağ”a məğlubiyyət başadüşülən idisə, debütant “Turan Tovuz”a təslim olmaq rəhbərliyin xoşuna gəlməyəcək. Qərblilər oyunçu keyfiyyəti baxımından bakılılara uduzsa da, dünən məhz matça düzgün köklənmə sayəsində qələbə əldə etdi. Ağıllı müdafiə, əks-hücumlarda yaxşı oyun sayəsində qonaqlar vacib qolu vurmağı bacardı.
Mahmud Qurbanov rəqibin yaxşı müdafiə olunduğunu və buna çarə tapa bilmədiklərini etiraf etdi. Əslində, tovuzluların müdafiəsinin rahat oynamasının səbəbi “Səbail”in öndə ağırlığını qoya bilməməsi idi. Ayxan Abbasovun yetirmələrinin yüksək səviyyədə oynadığını deyə bilmərik, komanda hələ çox artırmalıdı. Sadəcə, “Turan Tovuz” oyuna daha yaxşı motivasiya olunmuşdu və daha çox döyüşdü, qələbəni də bunun sayəsində qazandı.
Qərb təmsilçisi bu 3 xal sayəsində xeyli rahatlaşdı, təzyiqi üzərindən atdı. Növbəti turda “Qarabağ”la matç təxirə salındığından hazırlaşmaq, komanda oyununu yaxşılaşdırmaq üçün yaxşı imkan var. Yeni transferlərin uyğunlaşması üçün də bu fürsət göydəndüşmədi. Amma Abbasov müdafiənin mərkəzinə, eləcə də yarımmüdafiəyə daha bir normal legioner gətirsə, pis olmaz. Komandanın ehtiyat qüvvəsi yetərsizdi və qarşıdakı turlarda çətinliklər qaçılmaz olacaq.
Maraqlı olan odur ki, heç-heçəsiz davam edən çempionatda cəmi 8 matç baş tutub və 6 komanda xal itkisi ilə tanış olub. Yalnız 4 komanda yüzfaizli nəticəylə irəliləyir ki, onlardan da ikisi bu gün meydana çıxacaq.
ŞAHSUVAR
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”