Ölkə futbolu
Heç-heçəsiz tur: liderlər məsafə saxlayır, autsayderlər hər an yer dəyişə bilər
Misli Premyer Liqasında 20-ci tur heç-heçəsiz başa çatdı. “Sabah” qonaqların məğlubiyyətsizliyinə son qoysa da, bağlanış matçında “Neftçi” ev sahiblərinin üstünlüyünü bir daha möhkəmləndirdi.
Xal fərqi azala, arta bilər, amma dəqiq olan ilk “üçlüy”ün indidən müəyyənləşdiyidir. “Zirə” və “Qəbələ” yalnız 4-cü yer uğrunda mübarizə apara bilər. Hətta qəsəbə təmsilçisi növbəti turda əsas rəqibini yensə, bu pillələr arasında da ciddi xal fərqi yaranacaq. Ondan sonra avrokuboklara yollanmaq üçün “Qəbələ” özünün, “Zirə” “Neftçi”nin kuboku qazanmasına ümid edəcək.
“Qarabağ”i izləməkdə davam edən “Sabah” növbəti mühüm qələbəsini Qəbələdə qazandı. Rəqibin oyunun əvvəlində azlıqda qalması qonaqların işini asanlaşdırdı. Qalan vaxtda rahat oynayan “Sabah” usta oyunçularının sayəsində qolları sıraladı və layiq olduğu qələbəni qazandı.
Qeyri-sabit oynayan “Neftçi” dünən ötən turla müqayisədə daha yaxşı göründü. Düzdü, Laurentsiu Regekampfın yetirmələrinin əzici üstünlüyü yox idi, hətta bəlli bölümlərdə “Zirə” daha yaxşı təsir bağışlayırdı. Bəlkə də oyunun haqlı nəticəsi heç-heçə olacaqdı, lakin meydan sahibləri standart vəziyyətdən sonra hesabı açmağı bacardı. “Qartallar”ın hücum potensialını artırıb üstünlük qurmaq istədiyi zamanda isə debüt oyununa çıxan Donald Geryenin meydandan qovulması ilə matçın taleyi həll olundu.
Doğrusu, “Zirə”nin azlıqda qaldığı epizod maraqlı idi. Baş hakim VAR-a özü baxdıqdan sonra belə addım atdısa, deməli, qərarını izah edəcək sözləri var. Geryenin ikinci sarı vərəqəni aldığı epizodda etdiyi daha çox ehtiyatsız hərəkətə oxşadı. Və hakimlərin sarı vərəqəyə görə (Gerye ikinci sarı vərəqədən sonra qovudu – red.) VAR-a müraciət etməsi protokolda yoxdur. Amma onlar bu epizoddan əvvəlki ofsayda görə bu addımı atdılarsa, mütəxəssislərin olaya münasibət bildirməsi lazımdır. Bircə o dəqiqdir ki, həmin hərəkətdən öncə oyundankənar vəziyyət qeydə alındığından, epizodun davamı əhəmiyyətsiz olmalıydı. Yenə də bu epizodun müzakirə edilməsinə, aydınlıq gətirilməsinə ehtiyac var.
Gerye meydandan qovulsa da, oyunu ilə utandırmadı. Hətta rəqib qapıçıyla təkbətək çıxmaq imkanı qazanan haitili, heyətdən uzaqlaşdırılmış Təmkin Xəlilzadədən daha keyfiyyətli futbol oynadı. Heyətə uyğunlaşdıqca “Zirə”nin bu futbolçudan fayda görəcəyi dəqiqdir. İntizamına diqqət yetirsə, əvvəlki səhvlərini təkrarlamasa, o, hələ bir neçə il də Azərbaycanda normal oynaya bilər.
Qəbələdəki hakim idarəçiliyinə isə heç cür bəraət qazandırmaq olmur. Elmar Baxşıyev kimi sakit adam da ədalət təmsilçilərindən sərt şəkildə narazılıq etdisə, Vüqar Həsənlinin performansını özünüz təsəvvür edin. Konkret epizodlar üzrə şərh verməyi artıq sayırıq, bircə o dəqiqdir ki, bu hakimin hətta Birinci Divizionda oyun idarə edəcək səviyyəsi yoxdur. Futbolçuların səsiylə yönəltdiyi referi köhnə nəsil robotları xatırladır. Jestləri, hərəkətləri, davranışları hətta ekran qarşısında əyləşənlərin əsəbinə toxunur. Belə hakimlərin turun ən önəmli oyunlarına təyinat alması Hakimlər Komitəsinə başucalığı gətirməyəcək.
Hakimlərin, məşqçilərin, futbolçuların səhvlərini xatırlatmaq heç nəyi dəyişməyəcək. Hazırda ilk 6 pillədə qərarlaşan komandalar arasında ciddi xal fərqləri var: 7 – 8 – 10 – 5 – 9. Son 5 pillədə qərarlaşanlar isə bir-birindən 1 və ya 2 xallıq məsafədədir. 6 və 10-cu pillədə qərarlaşanları bir-birindən cəmi 4 xal ayırır. Ona görə də mövsümün qalan hissəsində əsas mübarizə məhz Premyer Liqada qalmaq uğrunda gedəcək.
FƏRİD