Heydər Əliyev və idman

“Heydər Əliyev İli”, VI yazı: Heydər Əliyevin bizə bəxş etdiyi idman qurğuları

Əvvəlki yazılarımızda Heydər Əliyevin hakimiyyəti dövründə respublikamızda idman infrastrukturunun inkişaf etdiyindən söhbət açmışdıq. Bu sahədə Ulu Öndərin fəaliyyəti və gələcək nəsillərə töhfəsi o qədər əzəmətli olub ki, inşa edilən qurğulara ümumi yazı daxilində toxunmaq haqsızlıq olardı. Bu səbəbdən də bəzi böyük tikililərə ayrı-ayrılıqda toxunmaq qərarına gəldik.

SSRİ kimi qüdrətli dövlətin maliyyə imkanlarından istifadə etməklə öz doğma respublikasında gələcək nəsillər üçün sonralar böyük əhəmiyyət kəsb edəcək nəhəng idman saraylarını tikdirmək hər rəhbərin işi deyildi. Çünki həmin illərdə müttəfiq respublikaların ərazisində iri obyektlərin tikintisinə icazə verilmirdi. Bəzi hallarda bu yalnız bir iri idman obyektinin inşası ilə məhdudlaşdırılırdı.

Heydər Əliyevin sayəsində bu yazılmamış qanun respublikamız üçün qüvvəsini itirmişdi. Bu işin öhdəsindən gəlmək insandan cəsarət, iradə və möhkəm xarakter tələb edirdi. Məhz onun şəxsi nüfuzu və bacarığı sayəsində ölkəmizdə idmanın bazası yaradıldı. Həm respublikamıza rəhbərlik etdiyi dövr, həm də SSRİ rəhbərliyində fəaliyyət göstərdiyi müddətdə Heydər Əliyevin birbaşa təşəbbüsü və köməyi ilə tikilən qurğuların sayı onlarla olub. Həmin idman obyektlərinin ən böyüklərinə diqqət yetirmək vacibdir.

Heydər Əliyev adına İdman-Konsert Kompleksi

Kompleksin tikilməsinə sovet hakimiyyəti dövründə, 1977-ci ildə başlanılmışdır. Ulu Öndərin təşəbbüsü və birbaşa nəzarəti altında inşa edilən bu qurğu ölkəmiz üçün bir mirasdır. Ovaxtlar belə bir obyektin tikintisinə icazə almaq və onu həyata keçirmək asan məsələ deyildi. Obyekt öz tutumu və nəhəngliyinə görə qapalı məkanlar arasında Zaqafqaziyada ən böyüyü idi.

Obyektin inşası 1990-cı ildə yekunlaşdırılmışdır. Lakin müstəqilliyimizin ilk illərində baxımsızlıq üzündən bu nəhəng kompleks bərbad vəziyyətə düşmüş və öz təyinatı üzrə istifadə edilməmişdir. Yenidən Azərbaycanın rəhbərliyinə qayıdan Ümummilli liderin göstərişi ilə İdman-Konsert Kompleksi təmir edilmiş və xalqın istifadəsinə verilmişdir. Kompleksin tavanı, işıqlandırma və isitmə sistemləri yenidən təmir edilərək beynəlxalq standartlara uyğunlaşdırılmışdır. Məhz bunun sayəsində də müstəqilliyimizin ilk illərində ölkəmizdə bir sıra beynəlxalq turnirlər təşkil edilmişdir.

Bu nəhəng idman qurğusu 7260 azarkeş tutumuna malikdir. Əsas arenadan əlavə, kompleksə iki köməkçi zal da daxildir. Həmin zallardan başqa kompleksə artist otaqları, soyuq və isti su ilə təmin edilmiş bir neçə soyunub-geyinmə otaqları daxildir.

Heydər Əliyev adına İdman-Konsert Kompleksində buvaxta qədər güləş üzrə qitə çempionatı, dünya kuboku, gimnastika üzrə dünya kuboku, voleybol üzrə Olimpiya Oyunlarının təsnifat turniri, I Avropa Oyunları, IV İslam Həmrəyliyi Oyunları keçirilmişdir. Kompleksin unikallığı ondan ibarətdir ki, burada təkcə idman yarışları deyil, həmçinin bir sıra beynəlxalq miqyaslı iqtisadi, turizm sərgiləri təşkil edilmişdir.

Bakı İdman Sarayı

Heydər Əliyevin adı verilmiş İdman-Konsert Kompleksindən danışdıqda həmin illərdə inşa edilmiş digər obyekt unudulmamalıdır. SSRİ dönəmində hansısa respublikanın daxilində idman obyektinin tikintisini həyata keçirməyin çətinliyi vurğulanmışdı. Eyni zamanda bir neçə obyektin tikintisini reallaşdırmağın necə çətin olduğunu isə təsəvvür eləmək belə mümkün deyil.

Əvvəllər Bakı Əl Oyunları Sarayı kimi tanınan və hazırda Bakı İdman Sarayı adlanan qapalı obyekt Milli Parkda yerləşir. 2000-ci ildə Heydər Əliyevin idmançılarla ilk görüşünün məkanı kimi tarixə düşən bu obyekt məhz Ulu Öndərin tapşırığı ilə təmir edilərək xalqın istifadəsinə verilib.Həmin görüşdə Ümummilli liderin söylədiklərini xatırlatmaq lazımdır:

– Xatirimdədir, onu da 1970-ci illərin sonunda inşa etdirdik. Düzdür, uzun çəkdi,3-4 il sürdü. Ovaxtlar Bakı Şəhər Sovetinə tapşırmışdıq. Onlar da deyirdilər ki, pul yoxdur, filan yoxdur, çox uzatdılar. Ancaq buna baxmayaraq, tikildi. 1993-cü ildə gəlib orada nə gördüm? Gördüm ki, mebel satırlar, pal-paltar satırlar, mağazalar düzəldiblər, idman isə yoxdur. Onu da təmizlədik, bərpa olundu. İndi idman sarayından çox yaxşı istifadə olunur.

Respublika Velotreki

Sovet İttifaqı illərində Heydər Əliyevin təşəbbüsü ilə respublikamızda inşa edilən idman obyektlərindən biri də Azərbaycanda velosiped idman növünün inkişafı üçün böyük əhəmiyyət daşıyan Respublika Velotrekidir. Qeyd edək ki, metronun “20 Yanvar” stansiyasının yanında yerləşən bu möhtəşəm idman mərkəzi bütün Şərq aləmində yeganə trekdir.

Ötən əsrin 80-ci illərində və 90-cı illərin əvvəllərində baxımsızlıq üzündən yararsız hala düşən velotrek yalnız Heydər Əliyevin ikinci dəfə hakimiyyətə gəlişindən sonra əsaslı təmir edilərək öz təyinatı ilə istifadəyə verildi. Hazırda yüksək səviyyədə olan bu qurğu ölkəmizdə velosiped idman növünün inkişafı üçün baza rolunu oynayır.

(ardı var)

(V yazı ilə bu linkdən tanış ola bilərsiz)

İLQAR AĞAYEV

Yazı Azərbaycan Respublikasının Medianın İnkişafı Agentliyinin maliyyə dəstəyi ilə hazırlanıb.

Sahə: Uşaq və gənclərin fiziki və mənəvi inkişafında idmanın rolu