Heydərovun arxivə atılan Ronaldinyo akademiyası

2016-cı ilin oktyabrı. Hardasa 6 il öncə. Bakı Olimpiya Stadionunda dəbdəbəli mətbuat konfransı, sürpriz qonaq, pafoslu sözlər…

AFFA-nın baş katibi Elxan Məmmədovla tədbirdə tərcüməçi kimi iştirak edən Riad Rəfiyevi də başına toplayan “Qəbələ” prezidenti Tale Heydərov yeni layihənin təqdimatını reallaşdırırdı. Bakıda Ronaldinyo məktəbinin təməli qoyulurdu.

“Ronaldinho Soccer Academy” ilə bağlı tədbirə ulduz qonaq özü də gəlmişdi. Heydərov vədlər verirdi: “Bir müddətdir Ronaldinyonun Bakıya səfərini planlaşdırırdıq. Onun üçün yalnız bu gün imkan oldu. Bu səfərin baş tutmasına sevinirik. Bir neçə ildir Qəbələdə futbol akademiyası fəaliyyət göstərir. Bakının nüfuzuna və digər səbəblərə görə yeni akademiya Bakıda fəaliyyət göstərəcək. Ümid edirik ki, onun adını daşıyacaq akademiya gənclərdə futbola marağı artıracaq. Ronaldinyo öz şəxsi heyəti ilə akademiyanın fəlsəfəsini quracaq, onun inkişafında özü iştirak edəcək. Ronaldinyo mənim ən çox sevdiyim futbolçulardan biridir. Onun gəlişi ilə bağlı məsələ gündəmdə deyildi. Lakin elə alındı ki, danışıqlara başladıq. Buna maraq olduğu bizə bildirildi. Onun akademiyasının bir neçə ölkədə fəaliyyət göstərdiyi barədə məlumatımız vardı. “Qəbələ”nin uşaq futboluna göstərdiyi diqqəti nəzərə alaraq, bu danışıq baş tutdu”.

Tale bəy davam edirdi: “Akademiyanın harada yerləşəcəyi hələ məlum deyil. Danışıqlar gedir. Yaxın zamanlarda bəlli olacaq. Bu layihədə bizə göstərəcəyi dəstəyə görə AFFA-ya da təşəkkür edirik. Qəbələdə buna ehtiyac yoxdur. Çünki orda akademiya var. Qəbələdə infrastruktur olsa da, orda gəlib yaşamaq çətindir. Bakıda ona görə edirik ki, uşaqlar məşqdən sonra evlərinə qayıtsınlar. Ailələrindən kənarda qalmaq uşaqlar üçün çətindir. Akademiya yüz faiz Bakıda olacaq. İstərdik ki, müxtəlif yaş qruplarından, U-11-dən başlayaraq, hamısı ölkə çempionatında iştirak etsin. Bizim akademiyaya rəqib tapmaq çətindir. Bu layihəyə böyük marağın olacağını gözləyirik. Ümid edirik ki, uşaqlar futbola daha çox maraq göstərərlər”.

Müqavilə bağlayan, akademiyanın fəaliyyətə başlayıb-başlamamasından asılı olmayaraq böyük maliyyəyə sahib çıxan Ronaldinyo deyirdi: “Əvvəllər də Azərbaycan haqda çoxlu yaxşı sözlər eşitmişdim. Burda çoxlu braziliyalı futbolçuların oynadığını bilirdim. Bakıda olmağıma çox şadam. Təxminən ay yarım əvvəl “Qəbələ” klubu ilə bu barədə danışıqlara başladıq. Bu layihədə əsas məqsədim odur ki, akademiyaya gələn uşaqlar mənim adımı eşidib, öz futbollarına daha ciddi yanaşsınlar. Onlar gələcəkdə peşəkar oyunçu olsalar, bu, mənim uğurum olacaq. Mən də buna çox sevinəcəm. Böyük klublara getmək variantı olsa, mütləq köməklik də göstərəcəm. Uşaqlar nə qədər tez futbol oynamağa başlasalar, o qədər yaxşı olar. Məşqlərinə ciddi yanaşmalıdırlar. Məşqə hamıdan əvvəl gəlib, hamıdan sonra getmək lazımdır. Yüksək səviyyəyə çatmaq istəyirlərsə, ciddi hazırlaşmalıdırlar. Mən də gəlmişəm ki, ölkəni daha yaxşı tanıyım. Azərbaycana dünən axşam gəlmişəm. Hava limanından çıxandan sonra restoranda yemək yedim. Mətbəxinizi çox sevdim”.

Yuxu kimi idi, ən azı Ronaldinyo adına görə o qədər uşaq futbol oynamağa həvəslənmişdi ki… Adından istifadəyə görə illik 700 min dollar alacaq braziliyalı da məmnun qalmışdı. Azərbaycan hər nə qədər ciddi futbol ölkəsi sayılmasa da, qazancına görə “hə” demişdi. Axı, Ronaldinyo heç nə itirmirdi.

Tezliklə akademiyanın tikintisi üçün yer tapıldı, işlər başladı, başladı… təxirəsalmalar başladı, vaxt uzatmalar başladı, bəhanələr başladı…

Bir də 2000-ci ildə “Qəbələ”nin artıq SABİQ prezidenti olan Tale Heydərov “Emerging Europe”də özünün yazdığı materialda məlumat verdi: “Qəbələ” Futbol Akademiyasının uğurları əfsanəvi Ronaldinyonun Azərbaycanda ilk futbol akademiyasını açmaq üçün bizimlə əməkdaşlıq etməsində həlledici rol oynadı. Ronaldinyo Futbol Akademiyasının 2020-ci ilin əvvəlində açılışını səbrsizliklə gözləyirik”.

Heydərov prezident postundan istefasının Ronaldinyo Futbol Akademiyasının açılışına təsir etməyəcəyini bəyan edirdi. Lakin Ronaldinyonun doğulub boya-başa çatdığı Portu Aleqri şəhərində, həmçinin Birləşmiş Ərəb Əmirliklərinin Dubay şəhərində fəaliyyət göstərən məktəbinin növbətisi Bakıda açılmadı, idman qurğusu üçün nəzərdə tutulan ərazidə başqa tikililər peyda oldu.

“Geridə qalan müddətdə açıqlaya biləcəyimiz hər hansı bir yenilik yoxdur. Danışıqlar, iş müəyyən mərhələyə gəlib çatıb, amma konkret nəsə deyə bilmərəm” – bu sözləri isə “Qəbələ” akademiyasının direktor müavini Nail Kərimov ötən il demişdi.

6 il ötüb. Bu müddətdə nəinki Ronaldinyo akademiyası fəaliyyətə başlamayıb, hətta Qəbələ akademiyası da tarixin yaddaşına köçmək üzrədi. Yetirmələri ilə öyünən klubun 6 məşq meydançası indi top üzünə həsrətdi, klub akademiyasında qalan uşaqların sayı 30-a çatmır. Klubu Talenin ümidinə buraxan Heydərovun stadionda göründüyü, “Qəbələ” ilə maraqlandığı günü heç klubda da xatırlamırlar.

Heydərov futbol səhnəsindən getdi. Arzuladığı karyera nərdivanına yüksəlməyə imkan vermədilər. Layiq olmadığı üçün belə etdilər, yoxsa layiq olduğu üçün “sıradan çıxarıldı” – bilmirəm. Amma fakt odur ki, umduğunu əldə edə bilməyincə kənara çəkildi, illərdi atasınının vəzifələri sayəsində bu ölkədən qazandıqlarını xərcləməyi dayandırdı. İndi Ronaldinyo məktəbi təqdimatı gözəl, davamı fiasko olan bir layihə kimi xatırlanır. Akademiyası məhv olmaqda olan “Qəbələ” klubunun sonuna da çox qalmayıb.

AĞA