Premyer-liqa
“Kəpəz”in bəd seriyası qırıldı, “Sumqayıt”la “Şamaxı”nın yox
Premyer Liqanın 8-ci turu qeyri-məhsuldar keçən oyunlarla bitdi. Bazar günü baş tutan matçlarda cəmi bir qol vuruldu.
Keçirdiyi bütün oyunlarda qol buraxan “Şamaxı” ənənəsinə sadiq qaldısa, “Kəpəz” tilsimi qırdı. Amma gəncəlilər buna görə “Sumqayıt”a minnətdar olmalıdı. Çünki “kimyaçılar” bir penalti qolu istisna olmaqla, zatən bu mövsüm fəqlənə bilməyib. Ona görə də “Kəpəz”in “dişsiz” komanda qarşısında duruş gətirməsi gözlənilən idi.
“Sabah” Şamaxı səfərində xal itkisinə çox yaxın idi. Oyuna arxayın çıxan paytaxt klubu az qala bunun cəzasını çəkəcəkdi. Murad Musayevin yetirmələri yalnız son dəqiqələrdə özünə gəldi və təzyiqi artıran kimi qələbə qolunu vurdu. Həmin qol olmaya da bilərdi və yəqin ki, “Sabah”ın düşərgəsində də bunu anlayırlar və növbəti oyunlar üçün bu qarşılaşma dərs oldu.
“Sabah”ın alışdığımız futbolu sərgiləməməsinin bir səbəbi də hava şəraiti idi. İsti havada süni qazon üstündə günorta vaxtı meydana çıxmaq Murad Musayevin yetirmələri üçün yenilik idi. Stadionda işıqlandırma sistemi olmadığından, bu vəziyyətdə oynamağa öyrəşmiş “Şamaxı”dan fərqli olaraq, qonaqların çətinlik çəkdiyi hiss edilirdi.
İstənilən halda, qələbə təmin edildi və “Sabah” yenidən 2-ci pillədədi. “Şamaxı”nın durumu isə gündən-günə pisləşir. Hələ də qələbə qazanmayan komandanın məşqçisi Cavid Hüseynovun matçdan sonra dedikləri isə gülünc bəhanədi. “Şamaxı”nın gənc yerli futbolçuları üzə çıxarmaq strategiyasını seçdiyini deyən Hüseynov, “nəticələri gözümüzə soxmayın” açıqlamasıya alqış qazanmadı. Çempionat xal yarışıdı, təbii ki, hamı nəticə üçün çalışır və geridə qalan qınanmalıdı.
Hüseynovun gənclərlə bağlı dedikləri isə mənasızdı. Çünki “Şamaxı” məğlubiyyətlərə adət edən yeni nəslə güvənib. Ardıcıl məyusluqlar bu futbolçuların psixoloji durumuna təsir edir və onları başıqapazlı imicinə öyrəşdirir. Yalançı strategiya ilə özünə bəraət qazanmağa çalışmaq əbəsdi.
Yeri gəlmişkən, Hüseynovun əsl baş məşqçi olduğunu, komandaya onun cavabdehlik daşıdığını bilirik. Lakin PRO kateqoriyası olmadığından, onu rəsmi sənədlərdə Vüqar Əsgərli əvəzləyir. Rəsmi baş məşqçinin son mətbuat konfransına çıxmaması isə sağlıq durumu ilə bağlıdı. Son oyunda səhhəti pisləşən Əsgərlini məcburiyyətdən Hüseynov əvəzləyib.
Bu faktı da təsadüfən xatırlatmadıq. Matçın son dəqiqələrinə kimi kefi yerində olan, əvəzlənən futbolçularla qucaqlaşan Vüqar bəy son dəqiqə qolundan sonra o vəziyyətə düşdüsə, görün həftələrdi eyni travmaları alan gənc futbolçular hansı durumdadı. “Şamaxı” gəncləri yetişdirməklə yox, onları mənəvi cəhətdən sındırmaqla məşğuldu.
Bölgədəki qarşılaşmada son dəqiqədə hesab açıldısa, Sumqayıtda azarkeşlər bir qola da həsrət qaldı. Son pillələrdən qurtulmaq uğrunda mübarizədə “Kəpəz”in yerli komanda ilə görüşü xal bölgüsü ilə yadda qaldı. Samir Abasov Aleksey Baqadan miras qalmış bərbad komandaya yeni nəfəs gətirə bilmədi. Hətta lazımsız legionerlərin əksəriyyətinin heyətə salınmaması da vəziyyəti dəyişmədi. Qola həsrət “Sumqayıt”ın oyununda ciddi irəliləyiş görmədik.
Əksinə, “Kəpəz” qələbəyə layiq idi. Penaltini qola çevirə bilməyən qonaqlar, daha bir neçə epizodda bəxtsizliklə üzləşdi. Tərlan Əhmədovun gəlişindən sonra nisbətən özünə gələn Gəncə təmsilçisi gələcəkdə əldən qaçırılan bu şansa görə çox təəssüflənəcək.
Autsayderlərin ya uduzması, ya da bir-birinə badalaq vurmasıyla yadda qalan tur favoritlərin bir qədər də uzaqlaşmasıyla nəticələndi. Hələ bir dövrə bitməyib, lakin turnir cədvəlində ciddi qütbləşmə əmələ gəlib. Premyer Liqada komanda sayının artırılması hamının inkişafı demək deyil, aşkar fərqlər göz deşir, rəqabətin yüksəlməsindən danışa bilmirik.
CAVAD
- Ölkə futbolu2024-01-16 08:00
“Neftçi” italiyalı hücumçu transfer edir – 400 min avroya
- Ölkə futbolu2024-01-16 12:15
Tanzaniya kartı: Konfransın martın sonuna saxlanılmasında məqsəd var
- Premyer-liqa2024-01-17 13:17
Premyer Liqada qış bazarlığı – YENİLƏNİR
- Müsahibə2024-01-17 08:00
“Vəziyyəti xeyrimizə dəyişmək üçün hər şeyi edəcəyik”