“Kəpəz”in ev oyunlarına biletlər 3 manatdan satılacaq

“Kəpəz” arzusuna çatdı. Dünən Peşəkar Futbol Liqası gəncəlilərin müraciətinə müsbət cavab verdi. Növbəti ev oyunundan başlayaraq, komanda rəqiblərini doğma şəhərdə qəbul edəcək.

Xatırladaq ki, Gəncə şəhər stadionunun qəzalı vəziyyətdə olması səbəbindən “Kəpəz”in evdə oynamasına qadağa qoyulmuşdu. “Azərdövlətlayihə”nin mənfi rəyi üzündən komanda oyunlarını Bakıda və Qəbələdə keçirirdi.

Bəs, nə oldu ki, Gəncə stadionuyla bağlı vəziyyət dəyişdi? Axı, arenada faktiki heç bir iş görülməyib, “Azərdövlətlayihə”nin verdiyi rəy isə fərqlidir. İki ay öncə oyunların təşkilinə qadağa qoyan qurum, qəzalı vəziyyətdə olan arenada heç bir iş görülmədən indi tribunalara azarkeş buraxılmasına razılıq verir. Yeni oturacaqların quraşdırılması, paltardəyişmə otaqlarında, media-tribunada görülən işlər rəyin dəyişməsinə səbəb olacaq səbəblər olmamalıdı, söhbət təhlükəsizlik tədbirlərindən gedir.

PFL-in açıqlamasında bildirilir ki, “Azərbaycan Respublikasının Tikintidə Təhlükəsizliyə Nəzarət Dövlət Agentliyi “Azərdövlətlayihə”nin sentyabrın 9-dakı rəyinə, “Kəpəz” Peşəkar Futbol Klubunun PFL-ə təşkilati işlərin həyata keçirilməsi və təhlükəsizliyə tam zəmanət verilməsi ilə bağlı məktubuna əsasən, təşkilati qurum tərəfindən oktyabrın 4-dək Gəncə şəhər stadionunda oyunun təşkilinə birbaşa və dolayı yolla aidiyyatı olan qurğuların hazırlanması ilə bağlı vaxt verilib. Vaxt bitdikdən sonra PFL-in müvafiq işlərə cavabdeh olan şəxslərinin oktyabrın 5-də Gəncə şəhər stadionunda geniştərkibli təftişi həyata keçirilib.

Bu gün (dünən) isə qurumun yuxarıda qeyd olunan məktub və rəylər, eləcə də son təftiş əsasında yekun iclası baş tutub. Tribunaların 1-ci yarusunun istifadə olunması (ancaq oturacaqlı hissəsi), yerli və qonaq komandanın azarkeşlərinin ümumi sayının 3 min nəfərdən artıq olmaması şərtilə “Kəpəz” Peşəkar Futbol Klubunun ev oyunlarını Gəncə şəhər stadionunda keçirməsinə icazə verilib.

PFL-in tələbi ilə Gəncə şəhər stadionunda hər iki komandanın paltardəyişmə otaqları, hakim otağı, “sky-box”lar, tribunalar, reklam şitləri, media nümayəndələrinin çalışması üçün qurğular, eləcə də bu və digər qaydada oyunun keçirilməsi üçün lazım olanlar hazır vəziyyətə gətirilib”.

Qərardan sonra PFL oktyabr ayının təqviminə dəyişikliklər edib. Ayin 16-da “Neftçi”, 29-da “Səbail”lə oyunlar Gəncədə baş tutacaq.

Qərardan da görünür ki, stadionda heç bir əsaslı təmir işi aparılmayıb, qəzalı tribuna sütunları yenə də təhlükə mənbəyi olaraq qalır. Əks halda açıqlamada belə olmadığı yazılardı. PFL yalnız tamaşaçı buraxılmasına icazə verilən 1-ci yarusda vəziyyətin rəydə göstərildiyi kimi olduğuna şahid olub, buna uyğun icazə verib. Sabah qadağa qolyulan tribunalara azarkeş buraxılsa və hər hansı bədbəxt hadisə baş versə, məsuliyyət klubun üzərində qalacaq.

“Kəpəz”dən aldığımız bilgiyə görə, “Azərdövlətlayihə”nin iki rəyi arasında ciddi fərq yoxdur. İlk rəydə stadiona azarkeş buraxılmasına qadağa qoyulub, müəyyən işlər görüləcəyi halda, yalnız təhlükəsiz 1-ci yarusa məhdud sayda tamaşaçının buraxılacağı qeyd edilib. Və ötən müddətdə tələblər yerinə yetirilib, növbəti baxışdan sonra yalnız 3 min azarkeşin arenaya buraxılmasının mümkünlüyü nəzərə çatdırılıb.

Qəzalı tribunalarda heç bir iş görülməyib, zatən bu, mümkün deyil, əsaslı təmir üçün çox böyük vəsait tələb olunur. Sütunların olmadığı 1-ci yarusa fanatların girişinə icazə verilib ki, klub, stadionun sahibi AGİN bunu vaxtında etsəydi, “Kəpəz” birinci dövrə oyunlarını doğma şəhərdə keçirə bilərdi.

Qərar verildi, indi bütün məsuliyyət klubun üzərindədi. “Kəpəz” rəhbərliyi oyunlara bilet satışı təşkil etməli, 3000-dən artıq fanatın stadiona keçməsinə imkan verməməlidi. Bunu bacaracaqlarmı? Həmişə ciddi azarkeş marağı kəsb edən “Neftçi” ilə qarşıdakı matçda bu, xüsusilə çətin olacaq.

Əldə etdiyimiz bilgiyə görə, klub azarkeşləri də sınamaq qərarına gəlib. “Kəpəz”in ev oyunlarına biletlərin qiyməti 3 manatdan başlayacaq ki, bu, daha çox tamaşaçıların sayını azaltmağa hesablanıb. Həmin biletlərin təqribən 300-ü dəvətnamə kimi paylanacaq: 50-yə yaxını klubun veteranlarına, 250-si “Kəpəz”i heç vaxt, heç yerdə tək qoymayan fan-klublara paylanacaq. Qalan 2700 bilet isə satışa çıxarılacaq, onları daha tez əldə edənlər tribunaya buraxılacaq.

FƏRİD