Ölkə futbolu
Komanda sayının artımının gətirəcəyi xaos: qiymətlər süni şəkildə qalxır
Misli Premyer Liqasında iştirakçı sayı 12-ə qaldırılsa, yerli futbolçuların qiyməti süni şəkildə artacaq. Son günlər eşitdiyimiz xəbərlər bu təhlükədən xəbər verir. Qorxulu tendensiya yaranır və nəticələri ağır olacaq.
Bir il əvvəl komanda sayının 10-dək artması ilə vəziyyət pisləşmişdi. Əslində, Premyer Liqada komanda sayının çox olması kütləvilik, bölgələrin təmsilçiliyi baxımından yaxşı addımdır. Lakin iş ondadır ki, öncə buna hazır olmaq lazımdır. İllər boşa verilib, kifayət qədər yerli oyunçu yetişdirilməyib. Və belədə komanda sayının artırılması ciddi problemlərə səbəb olacaq.
Yerli oyunçu sayı komandaların tələbatına cavab vermirsə, Emin Mahmudovun 500 min avro maaş tələb etməsi gözləniləndir. O səviyyədə futbolçularımızın sayı çox azdır və limit üzündən say düzəltməyə məcbur olan klublarımız liderlərini saxlamaq üçün büdcəni boşaltmalıdır.
Eminin tələbi hardasa başadüşüləndir, dünənədək heç kimə lazım olmayan Yusif Nəbiyev “Səbail”də 6 min manat aylıq maaşa oynayacaqsa, “Zirə” heç vaxt parlaq oyunu ilə seçilməyən Məqsəd İsayevə iki ilə 250 min manat ödəyirsə, bizi yaxşı sonluq gözləmir. “Neftçi” milli komandada heç vaxt əsas heyət üzvü ola bilməyən Emil Balayevə illik 150 min dollar ödəməyə razıdırsa, karyerasının qürub çağını yaşayan Filip Ozobiç 250 min dollardan dəm vurursa, vəziyyət acınacaqlı hal alır.
İndi təsəvvür edin, komanda sayı 12-yə qalxsa, hansı mənzərənin şahdi olarıq. Hətta legioner limitnin “8+3”-ə yüksəldilməsi də süni qiymət artımının qarşısını ala bilməz. Həm də bu limit dəyişikliyinin milli komanda baxımından acı nəticələrini görə bilərik.
Belə qiymət artımı xaricə göndərmək istədiyimiz futbolçuların da sayına təsir edəcək. Əksinə, klublarımız yerli oyunçuya olan tələbatı ödəmək üçün ya faydasız milliləşdirmə prosesinə qayıdacaq, ya da xaricdə olan 2-3 futbolçumuzu ölkəyə qayıtmağa razı salacaq. Legioner kimi aldığını evdə qazanacağı halda kimsə bundan imtina etməz.
Bütün bunları nəzərə alaraq, AFFA İcraiyyə Komitəsi iyunun 16-da keçirəcəyi iclasda hər şeyi nəzərə almalıdır. Premyer Liqada komanda sayının 12-ə qaldırılması digər problemlər bir yana, futbolçuların qiymətinin süni şəkildə qalxmasına da töhfə verəcək. Düşünün, cənablar!..
AĞA
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?