Ölkə futbolu
Konfrans Liqasından imtina qələbəsi
“Qarabağ” Konfrans Liqasını bəyənmədi. Bu yarışın qrup mərhələsinə vəsiqəni erkən təmin edən ağdamlılar, daha üst səviyyəli turnirlərdə oynamaq üçün səy göstərir.
İndi Avropa Liqasının qrup mərhələsi təmin olunub. Lakin Çempionlar Liqasının pley-offuna kimi gəlmişkən ən nüfuzlu yarışdan imtina etmək mümkünsüzdü. Daha iki uğurlu oyun və tarixində ikinci dəfə qitə nəhənglərini Bakıya gətirmək imkanı…Alınsa, lap əla, alınmasa da zatən mümkün olandan artığı edilib.
“Qarabağ”a inanırdıq, amma doğrusu, “Ferentsvaroş”u Macarıstanda bu qədər amansızca məğlub etmək bir qədər şübhəli görünürdü. Rəqib güclü, səfər ağır idi. Sən demə, “Qarabağ” daha güclü, səfər matçları Qurban Qurbanov üçün daha asan imiş.
Baş məşqçimizin mükəmməl seçimləri özünü doğrultdu, Macarıstan çempionuna göz açmağa imkan verilmədi. İlk dəqiqələrdən riskli hücum taktikası seçən təmsilçimiz, topa daha çox sahib olmaqla oyuna diqtə etdi və layiq olduğu qələbəni qazandı. Müdafiədə diqqətli, yarımmüdafiədə topa hakim, hücumda aqressiv olan “Qarabağ” macarlara bir-birindən gözəl 3 qol vurmaqla istəyinə çatdı.
Kevin Medina və Maksim Medvedev kimi iki aparıcı mərkəz müdafiəçisinin yoxluğunda belə meydan sahiblərinə şans tanımayan “Qarabağ”, Kadi Borgesin dönüşü ilə hücum rəngarəngliyinə nail oldu. Qurbanov bu legioneri hücumun arxasına atmaqla rəqibin dayaq bölgəsinin möhkəmliyini də çözdü və kombinasiyalar sıralandı.
Qələbədə Şahruddin Məhəmmədəliyevin müstəsna rolu da qeyd olunmalıdı. Çox vaxt tənqid olunan qapıçımız kritik seyvləri ilə açar adam oldu. Bir neçə dəfə rəqibin arzusunun üstündən xətt çəkən “Şah” qolla nəticələnən əla hücumu da başlatdı. Onun topu arxada ləngitməməsi növbəti qola və “Qarabağ”ın rahat nəfəs almasına şərait yaratdı.
Məhəmmədəliyevə güvənən Qurbanova da alqış düşür. Baş məşqçi təkcə ona yox, Ramil Şeydayevə, İbrahima Vadjiyə səbr etməsinin də bəhrəsini görür. Eyni zamanda Toral Bayramov peşəkarcasına aldığı qulaqburmadan sonra dünən yüksək səviyyəli futbol sərgilədi. Əsl məşqçi bir oyunu udan deyil, uğurları sıralayan və bunu səbr göstərərək bacarandı.
Polşa və İsveçrə çempionlarının hərəsinə 5, Macarıstan çempionuna 4 qol vuran “Qarabağ” superməhsuldarlıqla irəliləyir. Bunu Avropa səhnəsində, həm də pul qazana-qazana etmək böyük qəhrəmanlıqdı. Ağdam klubu ölkədə futbola sevgini diri tutan, idman imicimizi yüksəldən ən böyük qüvvədi. Və bunu AFFA-nın millidən uzaqlaşdırdığı adam, aldığı hər zərbədən sonra özünü növbəti dəfə sübut edən Qurbanov bacarır.
Ruslar macarlardan daha çox məyusdu. Axı, onların qitədəki ən böyük adı Stanislav Çerçesov diz çökdürülüb. Qonşu ölkə mətbuatında yazılanların, aşağılayıcı fikirlərin ən layiqli cavabı 3:1-lə verildi. Həm də QARABAĞ adı ilə…
Avropa Liqasına vəsiqə təmin edildi, amma ən yaxşısına nail olmaq üçün daha bir fürsət var. Çexiya çempionu “Viktoriya” ilə final ab-havasında keçəcək oyunlara eyni ciddiyyətlə yanaşmaq və son nöqtəni qoymaq lazımdı. Bir dəfə plzenlilərə uduzmuş “Qarabağ” qisas ab-havasına düşməməli, sözünü layiqli oyunla deməlidi. İndi soyuqqanlı olmaq və ümumi uğuru təmin etmək gərəkdi.
FƏRİD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-23 08:00
“Səbail” “Sabah”a uduzsa…