Kubok nağılı bitdi, Baxşıyev həqiqəti ortaya çıxartdı

Nağıl bitdi, real həyat başlayır. Mövsümü titulla başa vurmaq üçün kuboku hədəf göstərən bakılıların artıq belə bəhanəsi yoxdur. O mükafatı oyunu ilə daha layiq olan qazandı.

Dünənki finalın favoriti “Neftçi” sayılsa da, meydanda daha istəkli oynayan “Qəbələ” idi. Oyun boyu rəqibindən üstün olan bölgə təmsilçisi layiq olduğu qolu əlavə vaxtda vura bildi. Daha az büdcə ilə daha doğru transferlər edən, heyəti düzgün komplektləşdirən əyalət klubu Emin Mahmudovdan asılı olan rəqibindən fərqli olaraq, arzusuna komanda oyunu ilə çatdı.

Matçda qol epizodları çox olmasa da, gərgin mübarizəyə şahid olduq. Sanki döyüşə çıxıbmış kimi oynayan futbolçular qələbə üçün əlindən gələni etdi. Lakin qələbəni məşqçisi daha ağıllı tərpənən komanda qazandı.

“Qəbələ”nin baş məşqçisi Elmar Baxşıyev hücumların əsasən sol cinahdan qurulmasını tapşırmışdı. Təsadüfi deyil, burada – “Neftçi”nin sağ qanadında qərarlaşan İsmayıl Zülfüqarlı və Ömər Buludov zəif bənd kimi seçilmişdi. Onları sığortalamalı olan Solomon Kvirkveliya isə onlardan da betər idi. Əsas vaxtda bakılıların qapısına məhz bu cinahdan yönələn hücumlar qol olmasa da, Baxşıyevin iki uğurlu dəyişikliyi həlledici oldu. Sol qanadı təşkil edən Ürfan Abbasovla Omar Hani meydana çıxdıqdan az sonra penalti qazandılar və İsnik Alimi qələbə qolunu vurdu.

Laurentsiu Regekampf isə vəziyyəti dəyişmək üçün heç nə edə bilmədi. Edilən əvəzetmələrlə komanda bir az da kökdən düşdü, orta sahə rəqibə təslim edildi. Rumın məşqçi rəqib tərəfindən tam bloklaşdırılan Emin Mahmudovun “azadlığa çıxması” üçün heç nə düşünməyi bacarmadı. Bu minvalla daha bir 120 dəqiqə oynanılsaydı, yəqin “Neftçi” yenə qol vura bilməzdi. Kəsəsi, uğursuzluq doğru heyət yığa bilməyən rəhbərliyin, əldə olan futbolçulardan doğru istifadə etməyən məşqçinin günahıdır.

Baxşıyev Azərbaycan Kubokunu qazanan 16-cı məşqçi oldu. Bu, onun ilk titulu idi. İllik maaşı Regekampfın iki aylıq əməkhaqqısından da az olan, əcnəbi sevgisinin kölgəsində işi lazımi dəyər görməyən Elmar bəy layiq olduğu medalı boynundan asdı. Düzdü, o da hələ ideal məşqçi deyil, amma avantüraçı rumından daha bacarıqlı olduğunu isbatladı.

“Qəbələ” “Qarabağ”ı kubok mübarizəsndən kənarlaşdıranda iddiasını ortaya qoymuşdu. Premyer Liqanın ən yaxşısını dayandıran kollektiv titula layiq idi və bunu son oyunda bir daha isbatladılar. Azərbaycan üçün xarakterik olan senari təkrarlandı – milyonlar əcnəbilərə verilir, uğuru yerlilər qazanır.

Yəqin ki, məyusluqdan mükafatlandırma mərasiminə qatılmayan “Neftçi” rəhbərliyi təcili şəkildə islahatlara başlamalıdır. İstefa şüarlarını stadionda səsləndirilən musiqi sədaları ilə gizlətmək mümkün oldu, amma turnir cədvəli, titul siyahısı göz önündədir. “Neftçi” əsl iddialı olmayana qədər Azərbaycan çempionatında gərgin mübarizədən, amansız rəqabətdən danışa bilməyəcəyik. Bakılılar heç olmasa, qarşıdakı mövsüm üçün doğru transferlər etməli, heyəti gücləndirməlidir.

Və uzun müddət güvənilməsi mümkün olan, işi ilə diqqət çəkən məşqçiyə ehtiyac var. Regekampf “Neftçi”nin yükünü çəkəcək adam deyil. Rumın məşqçi ötən mövsüm 3-cü, 4-cü variant kimi Bakı klubuna gətirilmişdi. Rəhbərlik yubanmış, daha yaxşı məşqçilərlə danışıqlar ya gecikmiş, ya da ciddiyə alınmamışdı. Belədə “ehtiyatın ehtiyatı” olan variant kimi Laurentsiu gətirilmişdi. Onun işini isə artıq bir ildir gör(m)ürük.

İstirahət haqda düşünmək lazım deyil. Ən tez zamanda məşqçi ilə, heyətin qurulması ilə bağlı doğru qərarlar verilməlidir. Növbəti dəfə yubanma olsa, gələn il bu vaxt hazırda oxuduğunuz cümlələri təkrarən xatırlayacağıq.

“Qəbələ” yə gəlincə, qalibi mühakimə etmirlər. Lakin rəhbərlik bu heyəti qorumalı, gücləndirməlidir. Hər yay heyət başdan-ayağa dəyişəcəksə, davamlı uğurdan danışa bilməyəcəyik. Hazırda başqa klublarla yeni mövsümün planlarını cızan futbolçuları düşərgədə saxlamaq üçün BÖYÜMƏK LAZIMDIR.

FƏRİD