Dünya futbolu
Mahir Emreli ödəmədiyi cərimələrə görə cəzalanıb
FİFA tərəfindən cəzalanan Mahir Emrelinin niyə bu aqibətlə üzləşdiyi tam aydın deyil. FİFA Futbol Tribunalı millimizin üzvünü “Legiya”ya borclu olduğu 100 min avrodan çox pulu qaytaranadək futbol fəaliyyətindən məhrum edib – bildiyimiz başqa bir şey yoxdu.
Nə “Legiya” rəsmiləri bu barədə danışır, nə Emreli zənglərimizə cavab verir. Yalnız Mahirin indiki klubu olan Zaqreb “Dinamo”su təsdiqləyici açıqlama yayıb. Söhbətin hansı puldan getdiyi, borcun necə yarandığı sirr olaraq qalır.
Xəbər 25 yaşlı hücumçunun sabiq klubu olan Polşa “Legiya”sının hüquqi və inzibati işlər üzrə direktoru Yakub Laskovskinin “Twitter” səhifəsindəki paylaşımından sonra aydınlaşdı. Görünür, o, bunu qələbəsi kimi reklam etmək istəyirdi.
Tərəflərdən kiminləsə danışa bilməsək də, məsələni qismən aydınlaşdırdıq. 100 min avroluq məbləğ iki klub arasındakı anlaşmada yaranan problemin nəticəsi deyil, Mahirin şəxsi borcudu. Zaqreblilər Emrelini transfer edərkən bütün razılaşmalar yerinə yetirilib, yalnız Emrelinin cərimələri yaddan çıxıb.
Xatırlayırsızsa, Mahir “Legiya”dan ayrılmaq qərarına gələrkən məşqlərə qatılmır, toplanışlara yollanmaqdan boyun qaçırırdı. Onun müqaviləsi ola-ola belə addım atmasının başının bəlasına çevriləcəyini vurğulayırdıq. Lakin Emreli menecerinə, vəkilinə arxayın olaraq ərköyünlüyə davam etdi və nəticəsi…
…“Legiya” klubun daxili intizam kodeksinə uyğun olaraq, Mahiri müxtəlif vaxtlarda cərimələyib, məbləğlər üst-üstə yığılaraq 100 min avronu keçib. Polşalılar FİFA-ya müraciət edib və haqlı olduqlarından Emrelinin cəzalanmasına nail olublar. İndi həmyerlimiz bu məbləği ödəməyənə kimi futbol oynamayacaq.
Mahirin hansı addımlar atacağını öyrənmək üçün özü ilə danışmağımız şərtdi. Hələ ki, bu, mümkün olmur. Amma Emrelli problemi qısa vaxtda yoluna qoymalıdı, yoxsa müqavilə ilə məxsus olduğu, məvacib aldığı Zaqreb “Dinamo”su ilə də gələcəkdə problem yaşaya bilər.
Xatırladaq ki, Emreli 2021/22 mövsümünün birinci yarısını “Legiya”da keçirib. 2021-ci il dekabrın 12-də paytaxt təmsilçisi Plotsk “Visla”sı ilə Ekstraklasanın 18-ci tur oyunundan qayıtdığı vaxt azarkeşlər komandanın avtobusuna soxulublar. Onlar Emreli və Lukinyası döyüblər. Nəticədə azərbaycanlı futbolçu klubdan ayrılmağı qərara alıb və Zaqreb “Dinamo”suna keçib.
CAVAD
- Premyer-liqa2024-02-02 15:51
Premyer Liqada qış bazarlığı – YENİLƏNİR
- Ölkə futbolu2024-02-01 08:00
Qonaqların istədiyi kimi: Abasov matçdan öncə uduzmuşdu
- Müsahibə2024-02-02 11:07
Qurban Qurbanov: “Şəxsi maraqlara görə səhv qərar vermək olmaz”
- Milli komanda2024-02-01 09:07
De Byazi: “Azərbaycan millisində hələ də maraqlı elementlər var”