Mahmud Qurbanov üçün son şans

“Səbail”də 2023-cü ilin necə başlayacağı bu gün bilinəcək. Ölkə kubokunda “Sabah”la matçın nəticəsi “dənizçilər”in baş məşqçi postunda dəyişiklik edib-edilməyəcəyini müəyyənləşdirəcək.

Futbolinfo.az xəbər verir ki, Premyer Liqada nəticələri bərbad olan komanda, bütün ümidini kuboka bağlayıb. Mövsümün əvvəlində klub rəhbərliyinin böyük büdcə ayırdığı Bayıl təmsilçisi istədiyi nəticələrə heç cür qovuşa bilmir. Mahmud Qurbanovun arzusu ilə tamamilə yenilənən “Səbail” saysız transferlərə baxmayaraq son pillədədir. 17 oyunda cəmi 10 xal toplayan kollektiv zirzəmidə qərar tutub.

Baş məşqçi kimi əvvələr “Kəpəz”də uğursuz işi ilə tanınan Qurbanov, “Neftçi”nin əvəzedicilərində özünü qismən göstərsə də, zaman göstərdi ki, Premyer Liqada işləməyə hazır deyil. “Səbail”in qeyri-sabit oyunu bir yana, Mahmud bəy futbolçularla münasibətdə də problemlər uaşayır. Onun yayda etdiyi transferlər isə seleksiya qabiliyyətinin yaxşı olmadığını göstərdi. Heyətə götürülən bahalı transferlər sabit oynamır, Qurbanov onlardan faydalanmağı bacarmır.

Məşqçiyə verilən zaman dolub. Bu gün “Sabah”la matçda son ümid də əldən çıxsa, Qurbanov istefaya göndəriləcək.

Ölkə kubokunun ¼ finalının Bayıldakı görüşündə ilk dəqiqələrdən azlıqda qalan rəqib üzərində böyük üstünlük qazanan “dənizçilər”, böyük şansı əldən verdi. Belə ki, matçın gedişində 3:0 hesabıyla önə keçən meydan sahibləri, sonda fərqin minimuma enməsinə şərait yaratdı (3:2). Bu gün yarımfinala yüksəlmək üçün cavab matçı baş tutacaq. “Sabah” revanş ala bilsə, Qurbanovun istefaya göndərilməsindən başqa yol qalmayacaq.

Əslində, rəhbərlik kubokdakı nəticəyə aldanmaq istəmir. Hətta komanda yarımfinala vəsiqə qazansa belə, bu uğurun aldadıcı olduğuna əmindirlər. Mövsüm başlayanı ardıcıl bərbad oyunlar hamının səbr kasasını daşırıb. Təsadüfi deyil, yeni baş məşqçi axtarışı çoxdan başlayıb.

Bir ara Aleksandr Kerjakovun “Səbail”in yeni baş məşqçisi olacağı barədə xəbərlər yayılmışdı. Amma rusiyalı mütəxəssisin gəlişi reallaşmadı. Klubun AFFA-ya bağlılığı bu məsələdə rol oynadı. Belə ki, assosiasiya rəsmiləri sözünün keçdiyi klub sponsorlarına əcnəbi mütəxəssis gətirməməyi məsləhət bildi. Qışa kimi son şans verilən Mahmud bəy kubokda uğursuzluğa düçar olan kimi yola salınacaq. Amma onu yenə yerli məşqçi əvəzləyəcək.

Son günlər yayılan xəbərlərə görə, aşağı yaş qruplarından ibarət millilərimizdə çalışan Elxan Abdullayevə “Səbail”ə rəhbərlik etmək təklif olunub. İmtina cavabından sonra Füzuli Məmmədov və Yaşar Vahabzadə variantları ortaya atılıb. AFFA sevimli kadrlarından birini komandaya gətirməkdə israrlıdır. Yunis Hüseynov, Ramin Quliyev və Şahin Diniyev də namizədlər arasındadır.

Bu gün baş tutacaq cavab kubok matçlarından sonra “Səbail”də vəziyyət dəqiqləşəcək. Qurbanov daha sonra “Qarabağ”la çempionat matçında da iş başında olacaq. Qış fasiləsində isə “dənizçilər”də ciddi dəyişikliklər olacaq. Mahmud bəy ilin son iki oyununda möcüzə etməyi bacarsa, postunda qalmaq şansı yaranacaq, əks halda…

FƏRİD