Ölkə futbolu
Mükəmməl təhlil və taktika – Qurbanov bunu da bacardı
Avropa Liqasının G qrupunda mübarizə aparan “Qarabağ” “Georgios Karaiskakis” stadionunda “Olimpiakos”u 3:0 hesabı ilə darmadağın etdi. Bu cümlə ətrafında saatlarla danışmaq, səhifələrlə yazmaq olar. Təriflər, təbriklər, bəlağətli sözlərlə bəzədilən cümlələr…
Nələr danışmaq olmaz ki?! “Qarabağ”ın şəninə layiqli təriflər səsləndirməkdən asan nə var ki? Amma belə bir klub ərsəyə gətirmək – Azərbaycan reallığında bunu necə bacarıblar, onu anlamaqda çətinlik çəkirik.
Azərbaycan reallığı odur ki, AFFA əcnəbi məşqçiləri axtarıb guya onların sağ əlini millimizin başına çəkmək istəyir, ölkə çempionatında Bakıda köksüz alaq otlarına bənzədilən klublar yaradılır, “Neftçi” kimi tarixi klub çempionluq uğrunda mübarizə aparmaq üçün hər il heyət dəyişir, “Kəpəz” kimi köklü klub ev oyunlarını Gəncədən aralı keçirir…
Bu problemlər haqqında da saatlarla danışmaq, səhifələrlə yazmaq olar. Tənqidlər, təkliflər və hətta təhqir ifadələri ilə bəzədilən cümlələr… Nələr danışmaq olmaz ki? Futbolumuzun bugününə ağlamaqdan asan nə var ki?
Yazını iki qütbə bölmək fikrində deyilik. Bu yazıda ən çətin olan işdən danışacağıq. “Qarabağ” Yunanıstanda nəyin hesabına qalib gəldi?
Hələ oyundan əvvəl rəqibi incələyərkən, müəyyən çətinliklərlə üzləşmişdik. Bu mövsüm iki baş məşqçi ilə vidalaşan klubun komandamıza qarşı hansı heyətlə və hansı taktika ilə oynayacağını müəyyənləşdirmək hətta mümkün deyildi. Miçelin “Atromitos”la oyunda döyüşə atdığı heyət və həmin görüşdə sərgilənən oyun ölçü vahidi ola bilməzdi. Amma Qurban Qurbanov uğurlu nəticə əldə etmək üçün komandanı oyuna hazırlaşdırmalı idi. Ən əsası, rəqibin təhlükəli silahları zərərsizləşdirilməli idi.
Hər nə qədər komanda enişdə olsa da, keyfiyyətli oyunçuları ilə diqqət çəkirdi. Onları Yunanıstanda məğlub etmək çətin görünürdü. Amma “Frayburq” və “Nant”ı çox yaxşı incələyən Qurbanov sirli “Olimpiakos”un öhdəsindən də gəlməyi bacardı. Bir məsələdə bəxtimiz gətirmişdi ki, rəqiblə müqayisədə zədəli oyunçularla bağlı problemimiz yox idi. Yeganə problem Marko Yankoviçin Monteneqro millisindən zədəli dönməsi sayılırdı. Əslində, Markonu oyuna qədər haradasa hazırlamaq mümkün idi. Amma Qurbanov risk etməmək qərarına gəldi.
“Olimpiakos”da isə 4 futbolçu zədə səbəbindən meydana çıxa bilməyəcəkdi. Hələ adı UEFA-nın iştirak ərizəsinə salınmayan 12 futbolçudan danışmırıq.
“Qarabağ”da bu mövsüm avrokubokarda meydana çıxan oyunçuları nəzərdən keçirməli olsaq, yalnız orta xəttdə müəyyən rotasiyaların həyata keçirildiyini görərik. Maksim Medvedevlə Kevin Medina zədələnəndən sonra arxa xətt oyunçuları dəyişməz olaraq qalırdı. Yalnız Qurbanov Toral Bayramovla Elvin Cəfərquliyev arasında müəyyən tərəddüdlər edirdi. Hücumda isə Kadi ilə Zubirin yeri toxunulmazdı. İbrahima Vadji gedəndən sonra Ovusu Kvabena da sivri ucda yerini möhkəmlətmişdi.
Yarımmüdafiədə son vaxtlar yalnız Qara Qarayev toxunulmaz statusu qazanmışdı. Ona görə də “Olimpiakos”la oyunda məhz mərkəzi kimlərin tutacağı maraq doğururdu. Qurbanov bunu həm də rəqibə görə müəyyənləşdirməli idi. Oyundan əvvəlki təhlil yazımızda “Qarabağ”ın bu oyunda qalib gəlməsi üçün mərkəzi ələ keçirməli olduğunu yazmışdıq. Çünki mərkəz yarımmüdafiəçilərinin keyfiyyətinə görə pireylilər bu mənada həm “Frayburq”, həm də “Nant”dan daha keyfiyyətli komanda idi. Rəqibin mərkəzdə topu ram etməyi bacaran futbolçularının qarşısına yaxşı pressinq etməyi bacaran və topu oğurlayıb sürətli əks-hücuma çıxaran yarımmüdafiəçilər lazım idi. Qaranın onların önünə atılacaq ilk kart olduğunu bilirdik. Almeyda ilə Ozobiçin Qarayevə həmdəm olacağını gözləmək olardı.
Amma hədər yerə sürət amilini qabartmadıq. Bu 3 oyunçu top almaq və qapıya zərbələr endirməkdə məharətli olsa da, topu götürüb irəli qaçıb əks-hücum reallaşdırmaq onlarlıq deyil. Bunu etmək üçün Qurbanov ya Kadini ortaya çəkib Şeydayevi sağda cinahda oynatmalı idi, ya da… Bəli, Leandro ilə Almeyda meydana çıxmalı idi. Braziliyalını Premyer Liqa oyunlarında bu mövqedə görürdüksə, avrokuboklarda start heyətində döyüşə atılmamışdı. Qurbanov bu gedişi etməyə özündə cəsarət tapdı. Hə, o başqa məsələ ki, qollar Andradenin meydanı tərk edib Şeydayevin qazona qədəm basmasından sonra vuruldu. Amma buna qədər Leandro mərkəzdə faydalı iş əmsalı ilə yadda qaldı.
Əslində, “Olimpiakos”un heyət amilini kənara qoysaq, elə də qorxulu rəqib olmadığını bilirdik. Miçel bir həftə ərzində möcüzə yarada bilməzdi. Sadəcə, yeni məşqçi ilə futbolçular daha istəkli olmalıydı. Bu istəyi onların gözündə gördük. İlk top qapılarından keçənə qədər pireylilər məşqçinin tapşırıqlarını səliqəli yerinə yetirirdilər. Sol cinahdan moldovalı Ryabçukun cinah reydləri sayəsində “Olimpiakos” ilk hissədə Veşoviçi narahat edirdi. Sadəcə, rəqibin sırf normal mərkəz hücumçusu olmadığından bu reydləri qarşılayan biri yox idi. Qari Rodrigeslə Uy Jo Hvanq isə geriyə çəkilib topu özləri ilə daşımaq istəyirdi. Hər halda, yarımmüdafiə xəttində Buxalakis – Biel – Kunde üçlüyü onlarla anlaşa bilmirdi. Bu üçünün arasında yalnız Biel fəallığı ilə diqqət çəkirdi ki, o da yalnız bir dəfə cərimə zərbəsindən Şahrudini narahat etdi.
“Qarabağ”ı oyunda ən çox narahat edən məqam isə “Olimpiakos”un meydana 5 müdafiəçi ilə çıxması oldu. Elə oyundan sonra Qurban Qurbanov da buna təəccübləndiyini söylədi. Xüsusən də cinah müdafiəçisi Vrsalko ilə dayaq yarımmüdafiəçisi Mvilanın mərkəz müdafiəçisi kimi oynamağı diqqət çəkdi. “Qarabağ”ın tam heyətlə hücuma qoşulmaması fonunda qapalı oyuna hazırlaşmaq yunanların sistemini də qarışdırdı. Amma onlar “köhlən atlar”ın uzun ötürmələrini süni ofsayd yaratmaqla zərərsizləşdirə bilirdi. Etiraf edək ki, bu, onların ifasında çox gözəl alınırdı. Amma 68-ci dəqiqədə “Qarabağ”a belə bir tələ tətbiq edərkən pireylilər özləri quyuya düşdü.
Bu qol yunanların bütün sistemini dağıtdı. İkinci qol Sissenin top itkisindən sonra həyata keçdisə, 3-cü top da Şeydayevin fəallığı sayəsində reallaşdı. Beləliklə, “Qarabağ” ən azı Konfrans Liqasına vəsiqə qazanmaq üçün vacib qələbə əldə etdi. Artıq növbəti oyunda qazanacağımız bir xal minimum vəzifəni təmin edəcək. Amma “Nant”ın da ağır günlərini yaşadığını nəzərə alsaq, ən azı ikinci yeri tutmaq lazımdı.
ABBAS
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Ölkə futbolu2024-04-19 08:52
Yüksək əmsal “Qarabağ”a əlavə üstünlük verir
- Digər idman növləri2024-04-17 21:46
“Neftçi” finalda “Xəzri”yə rəqib oldu
- Digər idman növləri2024-04-18 17:00
Şahmat Federasiyası yeni loqonun hazırlanması ilə bağlı müsabiqə elan etdi