“Qəbələ”nin yetirməsi Qəbələdə… yalnız “Sabah”ın uğuru haqda düşünəcək

“Sabah”ın kapitanı Elvin Camalovun futbolinfo.az saytına müsahibəsi

– Qış fasiləsindən sonrakı ilk oyunda iddialı rəqiblərdən “Neftçi” üzərində inamlı qələbə qazandınız. Oyunu necə dəyərləndirirsiniz?

– Fikrimcə, yaxşı oyun alındı. Rəqib çempionatın ən iddialı kollektivlərindən biridir. Matçda erkən qol vurduq. Bundan sonra ilk hissənin sonlarına yaxın hesab arasındakı fərqi artırdıq. Hesabda 2:0 irəli çıxdıqdan sonra da üstünlüyü əldən vermədik. Çempionatın ikinci yarısına liqanın ən güclü komandalarından biri üzərində qələbə ilə start vermək gözəldir. Lakin bu matçı unudub qarşıdakı oyunlara köklənməliyik.

– Hücum planında hər hissədə fərqli “Sabah” izlədik. İkinci hissədə irəlidə keyfiyyətin aşağı düşməsi nə ilə bağlı idi?

– Deməzdim ki, fasilədən sonra irəli xətdə keyfiyyət aşağı düşmüşdü. Əksinə, hücumlarımız davam edirdi. Sadəcə, ilk hissədən fərqli olaraq, əldə etdiyimiz qol fürsətlərini dəyərləndirə bilmədik.

– Qış fasiləsində heyət tam qorunduğundan, yeni ilin ilk görüşündə meydanda hazır “Sabah” var idi. Bəs siz potensialınızın neçə faizini göstərdiyinizi düşünürsünüz?

– Qış təlim-məşq toplanışını çox yaxşı keçdik. Bunun da bəhrəsini fasilədən sonrakı ilk matçda meydanda gördük. O ki qaldı öz oyunuma, komandamın hər qarşılaşmada qalib gəlməsi üçün var qüvvəmlə mübarizə aparıram. Necə alınır, buna özüm yox, kənardakılar daha yaxşı qiymət verə bilərlər.

– Qarşıda Premyer Liqanın XX turunda “Qəbələ” ilə çətin səfər matçı olacaq. Sizə doğma olan Qəbələ stadionuna hər dəfə rəqib qismində meydana çıxanda hansı hissləri keçirirsiniz?

– “Qəbələ” özünəməxsus oyun tərzi olan, çempionatın iddialı kollektivlərindəndir. Bizi çətin səfər matçı gözləyir. Əlbəttə, bu stadion mənə doğmadır. Uzun müddət “Qəbələ”nin uğurları üçün çalışmışam, bu klubun yetirməsiyəm. Lakin futbolda bu gün buradasansa, sabah başqa yerdə ola bilərsən. Meydana çıxanda, start fiti veriləndə yalnız öz komandanın uğurları barədə düşünürsən.

– Aleksey İsayevlə orta sahədə bir-birinizi çox yaxşı başa düşürsünüz. Bu amil həm kluba, həm də milliyə böyük fayda verə bilərmi?

– Aleksey həm yaxşı insan, həm də Azərbaycanda öz mövqeyinin ən güclü futbolçularındandır. Onunla bir komandada olmaqdan şadam. Qeyd etdiyiniz məsələdə uzun müddət bir yerdə oynamağımızın böyük rolu var. Kluba nə qədər faydalı olduğuna kənardan baxıb qiymət vermək olar. O ki qaldı milliyə, əlbəttə, eyni anda şans qazansaq, millimizin uğuru üçün əlimizdən gələni edəcəyik.

– Milli komanda artıq martda AVRO-2024-ün seçmə mərhələsində mübarizəyə start verəcək. Belçika, Avstriya, İsveç kimi güclü komandaların yer aldığı qrupda nəyə iddia edə bilərsiniz?

– Seçmə mərhələdə bizi çətin oyunlar gözləyir. Ancaq millinin formasını geyinirsənsə, qarşındakı rəqibin kimliyi səni qorxutmamalıdır. Meydana çıxıb, ən yaxşı oyununu sərgiləməli, millinin uğur qazanması üçün əlindən gələni etməlisən.

FƏRİD