“Qarabağ” Bakı Olimpiya Stadionunda oynayacaq

“Qarabağ” Çempionlar Liqasının qrupuna vəsiqə qazansa, ev oyunlarını Bakı Olimpiya Stadionunda (BOS) keçirəcək. Bu barədə rəsmi açıqlama verilməyib, yekun qərar da yoxdu, amma başqa cür də mümkünsüzdü.

UEFA-nın qitə yarışları ilə bağlı tələbləri var. Çempionlar Liqası ən nüfuzlu yarış olduğundan burada şərtlər daha sərtdi. Hər şey ən yüksək səviyyədə təşkil olunmalı, bütün məqamlar diqqətə alınmalıdı. Qitə futbol qurumu da oyunların ən yüksək səviyyədə baş tutması üçün müəyyən kriteriyalar (parkinq yeri sayı, mətbuat nümayəndələri üçün iş şəraiti və s.) müəyyənləşdirib. Azərbaycanda bu tələblərə cavab verə yeganə stadion isə məhz BOS-dur.

Bu səbəbdən Respublika stadionu “Qarabağ” üçün hər nə qədər doğma olsa da, komanda Çempionlar Liqası matçlarını – ötən dəfə olduğu kimi – BOS-da keçirməyə məcburdu. Təki “Viktoriya” ilə oyunlar uğurla başa çatsın, rəsmi qərar veriləndə özünüz də buna şahid olacaqsız.

Əslində, ÇL-in pley-off oyunları da Respublika stadionunda keçirilməməliydi. Amma “Qarabağ” UEFA-nın müvafiq istisnalarından faydalanaraq plzenliləri “Tofiq Bəhramov”da qəbul edəcək.