Ölkə futbolu
“Qarabağ”ın çempion olduğu oyunda “Sabah” da üzülmədi
“Qarabağ” rəqibləri ilə o qədər böyük səviyyə fərqi yaradıb ki, növbəti çempionluğu adi hal kimi qəbul edildi. Sanki belə olmalıydı və oldu. Ağdamlılar mövsüm boyu hər cür tərif eşitdiyindən, indi, ölkənin ən güclüsü adını birillik fasilədən sonra geri qaytararkən təbriklər bir o qədər gurultulu səslənmədi.
Dünən “Sabah”la matçın taleyini Patrik Andradenin qırmızı vərəqə alması həll etdi. Kabo-verdeli futbolçu meydandan qovulanadək ağdamlılar qonaqlardan aşkar üstün oynayırdı. Rəngarəng hücumlar, ərazi üstünlüyü “göy-qaralar”ın favoritliyinə şübhə yeri qoymurdu. Hesab açılanadək iki dəfə tirin möhkəmliyini yoxlayan Qurban Qurbanovun yetirmələri çempionluğun gəldiyi matçda parlaq qələbə üçün hər şeyi etdi.
Lakin Andradenin haqlı qırmızı vərəqəsi ilə durum dəyişdi. Bu il əla təsir bağışlayan “Sabah” say üstünlüyü qazandığı epizodda gözəl cərimə zərbəsi ilə hesabı bərabərləşdi. Konfrans Liqasına son vəsiqəni əldə etmək istəyən Murad Musayevin yetirmələri qazandıqları üstünlükdən maksimum faydalanmaq üçün həvəsləndi. Düzdü, qələbə qazanıb “Qarabağ”ın çempionluğunu ertələmək mümkün olmadı, lakin qonaqlar rəqibin qələbə seriyasını qırdı, layiq olduğu bir xalı əldə etməklə vəziyyətini yaxşılaşdırdı.
Turun açılış matçı da heç-heçə bitdi. Amma dünənki “Səbail”i yenə bilməmək istənilən komanda üçün eyib sayılmalıdı. Yetərli heyəti olmayan, meydana ciddi itkilərlə çıxan qonaqlar, üstəlik, matçın gedişində zədə üzündən əsas qapıçısını da itirdi. Faktiki yarımcan olan, lakin son pillədən qurtulmaq üçün ölüm-dirim savaşı verən “Səbail” istəyinə çatdı. Aftandil Hacıyevin yetirmələrinin uzun fasilədən sonra meydandan qol buraxmadan ayrılması intizamlı oyunun və rəqibin fərasətsizliyinin nəticəsi idi.
“Şamaxı” növbəti dəfə evdə qələbə qazanmamaqla ardıcıl darmadağınları da unutdurmağı bacarmadı. Rüstəm Əliyevin rəhbərliyi altında ilk xal qazanılsa da, çətin ki, kimsə buna görə ona “əhsən” desin. Heyət baxımından daha yaxşı durumda olan komanda autsayderi yenməyə borclu idi.
Bugünkü matçlar az önəm daşımır. “Sumqayıt” autsayder rəqibini önə buraxmamaq üçün “Neftçi”yə uduzmamalıdı. Aleksey Baqa gələndən bəri, 2022-ci ildə qələbə üzü görməyən “kimyaçılar”, kubokun yarımfinalında 120 dəqiqəlik ağır mübarizənin yekununda məyusluq yaşayan rəqibin psixoloji durumundan yararlanmalıdı. Əks halda, “Səbail”lə mübarizədə üstünlük qazanmaq olmayacaq. “Neftçi”yə gəlincə, komanda avrokuboklara vəsiqəni təmin etsə də, ikinci yeri tutmaq üçün sonadək vuruşacaq. Bu baxımdan belə rəqiblərlə oyunlarda xal itirmək olmaz. Son məğlubiyyətin komandaya necə təsir etdiyini 90 dəqiqə göstərəcək.
Turun oyunu isə Zirədə reallaşacaq. Meydan sahibləri əsas rəqiblərindən olan “Qəbələ”ni yenməklə avrokubok arzusuna çata bilər. Mübarizədən qopmaq istəməyən qonaqlar ən azı xal üçün döyüşəcək, nəticəni isə futbolçuların fiziki və psixoloji durumu müəyyənləşdirəcək. Bir yanda yorğun “Zirə”, digər tərəfdə klubdaxili ab-havası korlanmış “Qəbələ” var.
FƏRİD