Qurban Qurbanov: “Daha bir futbolçu transfer etmək istəyirik”

“Qarabağ”ın baş məşqçisi Qurban Qurbanov Misli Premyer Liqasının 20-ci turunda bu gün “Şamaxı” ilə keçirəcəkləri matç öncəsi açıqlama verib. O, transfer məsələlərinə, komadaya yeni gələn futbolçuların hazırlıq səviyyəsinə toxunub.

Qurbanov yeni qapıçı transfer etmək üçün çalışdıqlarını deyib: “Əlavə bir futbolçu ilə danışıqlar gedir. Üç transfer etmişik. Sadəcə, alınarsa, bir futbolçu transfer etmək istəyirik. Qapıçılarla aktiv danışıqlar gedir. Əfsuslar olsun ki, hələ istədiyimiz kimi bir irəliləyiş yoxdur. Amma son günə – fevralın 2-nə kimi danışıqlarımız davam edəcək”.

Qurbanov rusiyalı qapıçı Andrey Lunyovunun “Qarabağ”a keçidinin alınmamasına da aydınlıq gətirib: “Lunyov məsələsinin üzərinə çox ciddi düşmüşdük. Sonda bəzi danışıqlar, müəyyən məlumatlar çıxdı. Ona görə də danışığı dayandırdıq. Lakin dediyim kimi, siyahı həddindən artıq genişdir. Hər yönə əl atmışıq. Yenə də qarşıdakı günlərdə nə olacağını görəcəyik”.

“Qarabağ” qış transfer pəncərəsində 3 yeni futbolçu alıb. Ağdam təmsilçisi Redon Cica, Adama Diakabi və Yassin Bezianı sıralarına cəlb edib.