“Sabah” yenə evdə büdrədi, “Sumqayıt” səfərdə siftə etdi

“Qarabağ”ın səfər matçında “Neftçi”ni böyük hesabla yenməsi, deyəsən, “Sabah”ı da ruhdan saldı. Ötən tur ağdamlılarla xal fərqini 3-ə endirən paytaxt klubunun zirvəni düşündüyü bir vaxtda, liderin əsas rəqiblərindən birini darmadağın etməsi vəziyyəti dəyişdi. Çempion uğursuz oyunlar seriyasını bitirib özünə gəlincə “Sabah” büdrədi.

Əslində, Murad Musayevin yetirmələrinin xal itirməsi turun sensasiyasıdır. Çünki “Sabah” “Şamaxı”nı qəbul edirdi və yerli gənclərdən qurulan bu komandanı yenmək problem olmamalıydı. Hesab erkən açıldı və hamı darmadağının qeydə alınacağını gözlədiyi bir zamanda Kristian Sebalyosun yersiz hərəkəti meydan sahiblərini çətin vəziyyətdə qoydu. Qolla komandasına üstünlük qazandıran ispan, rəqib oyunçuya qarşı aqressiv davranışına görə meydandan qovuldu.

“Sabah” hətta 10 nəfərlə də rəqibindən üstün oynayırdı. Lakin arxayınlıq, yetərincə aqressiv oynamamaq baha başa gəldi. 75-ci dəqiqədə “Şamaxı” qırmızı vərəqə alınca bakılılar qələbəni cibində hesab edib əvəzetmələrə başladı, əsas futbolçular oyundan çıxarıldı və qonaqlar təsadüfi hücumların birində cavab qolunu vurdu. Yenidən önə keçmək üçün zamanı qalmayan “Sabah” mövsümdə 3-cü dəfə ev heç-heçəsinə razılaşdı.

“Şamaxı” hər nə qədər zəif görünsə də, komandanın son vaxtlardakı yaxşı oyunu nəzərdən qaçmamalıdı. Bölgə təmsilçisi 4 turdu uduzmur və 8 xal qazanıb. Bunun sayəsində 7-ci pilləyə qalxan “Şamaxı” “Səbail”in uğursuzluğundan əla yararlanır. Bayıl təmsilçisi ardıcıl 5 oyundu uduzur. Şənbə günü Qəbələdə, hesabı açdığı görüşdə xalsız qalan Mahmud Qurbanovun yetirmələrinin qışa kimi ilk “altılığ”a düşməyəcəyi dəqiqləşdi.

Bazar günü baş tutan ilk oyunda “Sumqayıt” da tilsimi qırdı. Gəncədə kubok matçını məğlub bitirən “kimyaçılar”, bunun əvəzini çempionatda çıxdı. Qonaqlar azlıqda qaldıqdan sonra arxayınlaşan “Kəpəz”, qapısında qol gördükdən sonra ayıldı, lakin vəziyyəti dəyişmək üçün zaman qalmamışdı. Nəticədə “Sumqayıt” mövsümdəki ilk qələbəsini 16-cı turda əldə etdi. Rəqibini uzaqlaşmağa qoymayan qonaqlar beləcə nəfəs almaq imkanı əldə etdi. “Kəpəz”ə gəlincə, bu məğlubiyyətdən sonra Gəncə təmsilçisində yenidən narahat günlərin başladığını deyə bilərik.

16-cı tura Zirədə yekun vuruldu. Meydan sahibləri qonaqların heyətindəki itkilərdən məharətlə yararlandı. Hesab minimal oldusa, qonaqlar buna görə qapıçı Kamal Bayramova minnətdar olmalıdı. Penaltini dəf edən qolkiper daha bir neçə dəfə yüzfaizli qolu əngəllədi. Bununla belə, meydan sahiblərinin təzyiqi nəticə verdi və qəsəbə təmsilçisi layiq olduğu qələbəni qazandı.

Kubokun ¼ oyunları öncəsi “Qarabağ” əsas rəqibləri ilə fərqi artırdı. 4-cü pillədə növbəylə bir-birini əvəz edən “Qəbələ”ylə “Zirə” qiyabi mübarizəsini davam etdirir. “Turan Tovuz”un 5-ci pilləyə yaxınlaşmaq şansını əldən verməsi bir yana, artıq izləyicilər də xeyli yaxınlaşıb. Amma əsas mübarizə son pillələrdə qərarlaşanlar arasında gedir. Sonuncu olan “Sumqayıt” 7-ci yerdən cəmi 3 xal geridədi və burada hər tur istənilən yerdəyişmə ola bilər.

FƏRİD