“Sabah”a abunəçisi olan “Neftçi” ilə matça görə qiymət verilməməlidir!

“Sabah” “qısaqapanma”dan tez ayıldı. Ötən ilin sonunda ardıcıl xal itkilərindən sonra “Sumqayıt”ın darmadağını dünən “Neftçi” üzərində parlaq qələbə ilə davam etdi. Mövsümün ikinci yarısına da uğurlu başlayan komanda hazırda lider “Qarabağ”a yeganə ciddi rəqib kimi görünür.

“Sabah”da hər şey qaydasındaymış kimi görünür. Qışda transfer etməyən iki komandadan biri olan Masazır təmsilçisi Murad Musayevin gəlişindən sonra tutduğu yolda inamla addımlayır. Komanda oyununda qüsur yoxdur, bütün mövqelərdə əla rəqabət var, heyətdə nəticəni həll edən liderlər bəllidir. Lakin…

…Lakin evdə məğlubiyyət görməyən “Sabah”a “Neftçi” ilə oyuna görə qiymət vermək risklidir. “Neftçi” o qədər bərbad durumdadır ki, bu komanda üzərində qələbə ölçü, meyar ola bilməz. Necə oynadığını bilməyən, ruhu olmayan kollektivdən danışırıq.

Kimsə komandanın qış toplanışından təzə qayıtdığını, heyətin tam formalaşmadığını iddia etməsin. Bütün klublar eyni şərtlərdə hazırlaşır və oynayır. Lakin 5 oyuna 18 qol vurulan turda qapıya tərəf hücum etməyi unudan komandadan danışırıq. Heyət zəif ola bilər, komanda meydanda nə etmək lazım olduğunu bilmirsə, əzmkarlıq göstərməyi də bacarmırsa, deməli, problemlər çox ciddidir.

“Neftçi”nin yeni transferləri, gedən futbolçuları barədə danışmaq üçün hələ zaman olacaq. Gedənlər son vaxtlar uğursuz çıxış edirdi, gələnlər isə hələ komandayla düz-əməlli məşq etməyiblər. Lakin mövsümün əvvəlindən heyətdə elə futbolçular var ki, “Sabah”dan xal alan “Şamaxı”, “Səbail” və “Kəpəz” onları yalnız arzulaya bilər. Problem adlarda deyil, komandanın oyun dəst-xəttinin olmamasındadır.

“Sabah”da başverənlər “qısaqapanma” idisə, “Neftçi” iflis olub, xəbərimiz yoxdur. Və komandanı bu hala salan baş məşqçi Laurentsiu Regekampf, onun nazıyla oynamağa davam edən rəhbərlikdir. Rumın çalışdırıcı çox istedadlı, ustalıq səviyyəsi yüksək oyunçuları sıradan futbolçuya çevirib. Tarixə meydan oxuyan “Neftçi”, hazırda dünənin komandası olan “Sabah”ın arxasınca qaçan aciz kollektivə çevrilib. Ərəb ölkələrində qazanılan yalançı titullar Regekampfı böyük məşqçiyə çevirməyib, o, özünəməxsus ab-havası olan Azərbaycan çempionatında itib-batdı.

“Neftçi”nin formasını meydana sər, 3-cü yeri tutsun. Bu büdcəylə, bu imkanlarla, bu legionerlərlə hətta PRO lisenziyası olmayan istənilən yerli məşqçi Bakı klubunu indikindən daha pis oynatmaz. Regekampf 3-cü dövrə başlayarkən hətta 2-ci yerə də ümid etməyən komandada niyə qalsın ki?

Məşqçi, menecer, idman direktoru, vitse-prezident, futbolçu – hamı günahkar ola bilər, amma onların səhvləri sadəcə, kiçik parçalardan, dilimlərdən ibarətdir. “Rəzalət tortu”nun üzərində şam üfürən klub prezidenti Kamran Quliyev, Müşahidə Şurası çözüm tapmalıdır. İllər bir-birindən pis gəlirsə, bəlkə həqiqətən “Neftçi”də hamı dəyişməlidir?..

Təəssüf ki, gözəl oyunundan danışmalı olduğumuz “Neftçi”də indi başqa mətləblərdən söz açırıq.

…Komanda “Qarabağ”la rəqabət aparıb taxtını geri almaq əvəzinə “Sabah”ın abunəçisinə çevrilib, bu rəqibinə hər 3 dövrədə uduzub.

…”Neftçi”nin mərhəz müdafiəçilərinin ümumi yaşı 97-dir – yəni, “Neftçi”dən də qoca. Və “ağır” müdafiəni “Sabah” asanlıqla aşsüzənə döndərə bilmişdi.

…Bölgə klublarının bütün futbolçularının aylıq maaş büdcəsi 100 min manata çatmır, “Neftçi” isə təkcə Höccət Haqverdinin transferi üçün italiyalı menecerə 40 min dollar komisyon haqqı ödəyib. Milliləşdirilən oyunçuya görə niyə məhz eyni zamanda Canni de Byazinin də meneceri olan adamla əməkdaşlıq edilsin?

Suallar çoxdur, bəlkə elə “Neftçi”nin uğursuzluğunun cavabı da bu suallarının cavablarının içərisindədir.

FƏRİD