“Sabah”ın final oyunları: birincisi qələbəylə bitdi

“Sabah” Premyer Liqaya yeni intriqa gətirməkdədi. Ayılmağa gecikmiş Murad Musayevin yetirmələri avrokuboklara yollanmaq ümidlərini yenidən alovlandırıb  və əsas rəqiblərinə xeyli yaxınlaşıb.

Bundan sonra hər şey komandanın öz əlindədi. Əsas rəqiblərlə şəxsi oyunlarda uğurlu nəticələr mövsümün sonunda sevinməyə kifayət edəcək. “Sabah” son dövrəyə bu amalla başlayıb və ilk səddi uğurla keçdi. “Zirə”ylə matçda rəqibindən üstün olan meydan sahibləri “qartallar”ın buraxdığı səhvlərdən məharətlə yararlanıb layiq olduğu qələbəni qazandı.

Qonaqlar ciddi itkilər üzündən çətinə düşmüşdü, üstəlik, baş məşqçi Rəşad Sadıqov da xeyli dəyişiklik etmiş, aparıcı legionerləri ehtiyatda saxlamışdı. Fasilədən sonra reallaşdırılacaq B planına hesablanmış rotasiyalar bəlkə də uğurlu alınacaqdı, amma bəsit səhvlər “Sabah”ın işinə yaradı, Musayev intizamlı oyun sayəsində 3 xalı qopardı. İlk oyununa çıxan Anar Nəzirov qapıda inamsız təsir bağışladı, müdafiə xətti əks-hücumlar zamanı darmadağın oldu və ev yiyələri arzuladığı nəticəni qazandı.

“Sabah” istəyinə çatmaq üçün növbəti turda “Neftçi”yə ən azı yenilməməlidi. Əks halda, əridilən xal fərqi yenidən böyüyə bilər. Bundan sonra bütün matçlar final dəyərində olacaq və hazırda ilk “dördlük”də olan komandalardan ən azı birini qabaqlamaq üçün Musayev boş dayanmamalı, özünəinam qazanmış futbolçuları növbəti döyüşlərə hazırlamalıdı.

“Neftçi” dünən durumunu xeyli yaxşılaşdırdı. Əsas rəqiblərinin qarşılaşdığı turda bakılılar Şamaxı səfərində vacib qələbə qazandı. İlk hissədə meydan sahibləri hesabı açsa da, Samir Abasov əvəzetmələrlə oyunun ssenarisini dəyişməyi bacardı. Təzyiqi artıran bakılılar braziliyalılarının qollarına sevindi. Ən azı növbəti turdan sonra da ikinci pillədə qalacaq “Neftçi” bir müddət rahat nəfəs alacaq.

Matç “Şamaxı”ya çevrilən “Keşlə” üçün uğurlu başlamışdı. Yerli publika önündə həvəsli görünən futbolçular fasiləyədək istədiyini etdi. “Neftçi” oyununa düzəliş etdikdən, məşqçi bacarığı və futbolçuların ustalıq səviyyəsində fərq ortaya çıxdıqdan sonra isə ssenari dəyişdi.

Bu gün diqqətlər Bayılda olacaq. “Qəbələ” son turlardakı uğursuzluqları unutdurmağa, turnir vəziyyətini düzəltməyə məcburdu. Əks halda, “Sabah”ın təzyiqi psixoloji gərginliyi bir az da artıracaq.

FƏRİD