Ölkə futbolu
“Sumqayıt”ın futbolçuları yenə aldadıldı – 50 faizlə
“Sumqayıt”da maaş problemi həll olunmayıb. Rəhbərlik futbolçuların narazılığının qarşısını almaq üçün onlara kiçik bir miqdar ödəsə də, vəziyyət dəyişməyib.
Futbolinfo.az xəbər verir ki, məsələ ictimailəşəndən sonra “Sumqayıt” rəhbərliyi oktyabr ayının maaşlarının yarısını futbolçuların hesabına köçürüb, noyabr üçün isə hələ gözləməli olacaqlarını bildirib. Bunu büdcədə pul olmaması ilə əlaqələndirsələr də, əslində, məsələ başqadır.
Qış fasiləsinə kimi “kimyaçılar”ın cəmi iki oyunu qalıb. Transfer pəncərəsi açılandan sonra rəhbərlik heyətdə görmək istəmədiyi oyunçuları yola salacaq. Futbolçuları bezdirmək, getməyə təhrik etmək üçün belə addım atılır. Saxlanması lazım bilinən futbolçuları əməkhaqqı ödəniləcək, digərləri isə müqaviləni pozmağa razılıq verdiyi halda qalan pullarını alacaq.
Oyunçular indiki halda şikayət də edə bilmir, çünki FIFA-ya müraciət üçün azı 3 ayın maaşı verilməməlidi. “Sumqayıt” isə oktyabrın yarı pulunu verib, noyabr və dekabrda da eyni addım atmaqla vəziyyətdən çıxmağa çalışacaq. Təbii ki, futbolçular hiylədən xəbərdardı, sona kimi dirəşənlər haqqını əvvəl-axır alacaq. Lakin bu situasiya ilə barışmayanlar, bezib getməyə razılıq verənlər də tapılacaq.
“Sumqayıt” yeni transferlər etmək üçün qışda xeyli futbolçu ilə yollarını ayırmağı planlaşdırır. Onların əksəriyyəti yayda bəh-bəhlə gətirilən legionerlərdi. Zaman göstərdi ki, bu əcnəbiləri səviyyəsi hətta autsayder komandada heyətə düşmək üçün yetərsizdi. Rəhbərlik, menecerlər (hamısı eyni şəxs də ola bilər – red.) pulunu qazandı, indi isə qış bazarlığına start verirlər.