Klubdan verilən məlumata görə, UEFA Avropa Liqasının II təsnifat mərhələsində Bolqarıstanın ÇSKA (Sofiya) komandasına qarşı səfərdə keçirilən cavab oyununda zədələnən isveçli hücumçunun müayinəsi zamanı sağ bud əzələsinin qismən yırtıldığı aşkarlanıb.

Bildirilib ki, Savonun təxminən 8 həftədən sonra yaşıl meydanlara qayıtması gözlənilir.

Avropa Liqasında bolqarlara ümumi nəticədə məğlubiyyətə baxmayaraq, o, komandanın çıxışından razıdır: “Əlbəttə, nəticəyə görə məyusuq. Məqsədimiz mərhələ adlamaq idi. Ancaq komandamızla fəxr edə bilərik. Çünki 210 dəqiqə ərzində bir an belə dayanmadıq, qol vurmağa və hücum etməyə çalışdıq. Oyunun əvvəlindən sonuna qədər öz oyun üslubumuza sadiq qaldıq. Buna görə komandamızla qürur duya bilərik. Təbii ki, istədiyimiz nəticəni əldə edə bilmədik”.

Muaddib məhsuldar oynamalarını istəyir: “Səviyyəmizə və ya oyun üslubumuza şübhə etməməliyik. Məncə, hər iki görüşdə yaxşı çıxış etdik. Sadəcə, daha məhsuldar olmalıyıq. Mərhələ adlamaq üçün bizə cəmi bir qol lazım idi. Hesab edirəm ki, üzərində işləməli olduğumuz əsas məqam da məhz budur”.

Komandanın yeni legioneri ÇSKA-nı məğlub edə bilməmələrini unutmağın lazım gəldiyini bildirib: “İndi bütün diqqətimizi Konfrans Liqasına yönəltməliyik. Əsas məqsədimiz turnirin liqa mərhələsinə vəsiqə qazanmaqdır”.

Stopper növbəti rəqib haqda da danışıb: “Növbəti rəqibimiz Kiyev “Dinamo”sudur. Hələlik rəqibi tam təhlil etməmişik. Onların oyunlarını izləyəcəyik və sonra necə komanda olduqlarını daha yaxşı dəyərləndirəcəyik. Hazırda “Dinamo”nun nə dərəcədə güclü olduğunu dəqiq deyə bilmərəm. Ancaq bundan sonra bütün diqqətimizi həmin matça yönəldəcəyik. Rəqibə hörmətlə yanaşırıq, amma məqsədimiz mərhələni adlayan tərəf olmaqdır”.

Təcrübəli oyunçu Avropa Liqasında Bolqarıstan ÇSKA-sına məğlubiyyəti şərh edib: “İndi oyunu təhlil etməli və hansı məqamları inkişaf etdirməli olduğumuzu müəyyənləşdirməliyik. Şübhəsiz ki, oyunumuzda daha yaxşı etməli olduğumuz cəhətlər var. Ancaq dediyim kimi, başımızı aşağı salmamalıyıq. Kədərlənmək üçün çox vaxtımız yoxdur. Qarşıda yeni oyunlar var və Konfrans Liqasının əsas mərhələsinə vəsiqə qazanmaq üçün mümkün qədər tez hazırlaşmalıyıq”.

Bolqarıstanlı mütəxəssis qələbənin taktiki hazırlığın nəticəsi olduğunu bildirib: “Burada söhbət motivasiyadan yox, komandanın taktiki savadından gedir. Məşqçi heyətimi təbrik edirəm. Rəqibi təhlil etmək və ona qarşı düzgün mübarizə aparmaq üçün çox çalışdıq. Bilmirəm, insanlar nə qədər böyük klubu mübarizədən kənarlaşdırdığımızı anlayırmı?”

Yanev azarkeşlərin dəstəyinə ehtiyac duyduqlarını vurğulayıb: “Bizə azarkeşlərin dəstəyi lazımdır və onlara təşəkkür edirəm. Qarşı tərəfdə 17 illik təcrübəyə malik baş məşqçi və ötən mövsüm “Benfika”ya qalib gəlmiş, “Çelsi” ilə heç-heçə etmiş komanda var idi. Göstərmək istəyirdik ki, gördüyümüz iş o qədər də pis deyil. Mənə qalan yeganə şey inamdır. Bəzən onu itirir və bu vəziyyətin öhdəsindən gəlib-gəlməyəcəyimiz barədə tərəddüd edirəm. Amma ümidsiz deyiləm. Nəyə qadir olduğumu bilirəm”.

Futbolinfo.az UEFA-nın rəsmi saytına istinadən xəbər verir ki, Azərbaycan klubu 0:0 hesabı ilə başa çatan matçda üstün tərəf olub.

Bu, həm “çərçivə”yə, həm də ümumilikdə qapı istiqamətinə zərbə sayında öz əksini tapıb. Ağdamlıların 10 dəfə korner yerinə yetirmələri də təmsilçimizin daha çox hücumda olduğundan xəbər verir.

ÇSKA-nın əsas diqqətçəkən üstünlüyü sari vərəqə və cərimə zərbələri sayı olub. Buna baxmayaraq, penaltilər seriyasında 5:4 hesablı üstünlük sayəsində Bolqarıstan klubu turnirdə mübarizəni davam etdirib.

ÇSKA – Qarabağ

Qollar – 0:0

Zərbələr – 12:15

“Çərçivə”yə zərbələr – 3:5

“Çərçivə”yə düşməyən zərbələr – 6:4

Bloklanan zərbələr – 3:6

Künc zərbələri – 2:10

Oyundankənar vəziyyət – 2:0

Sarı vərəqələr – 7:3

Cərimə zərbələri – 24:13

Püşk bu mövsüm klublarımıza elə rəqiblər bəxş etmişdi ki, qitə yarışlarına yollanan 4 klubumuzun hamısı 3-cü təsnifat mərhələsinə yüksəlməliydi. “Sabah” bunu bacardı, “Qarabağ” isə Avropa Liqasından Konfrans Liqasına yuvarlanmaqla siyahıya düşdü. “Zirə” ilə “Neftçi”…

Avrokubokda hər il eyni ssenari təkrarlanacaqsa, mövüm boyu ora yüksəlmək üçün mübarizə aparmağın nə mənası var? Büdcəni transferlərə xərcləməkdənsə, infrastrukturun qurulmasına, gənc nəslin yetişdirilməsinə diqqət ayırmaq daha yaxşı deyilmi? Bir mərhələ keçmək üçün milyonlar xərcləmək nəyə lazımdır?

Açığı, dünən ən azı iki klubumuzun növbəti mərhələyə yüksələcəynə ümid edirdim. İlk oyundakı axmaq səhvləri olmasaydı, “Neftçi”nin də belə şansı var idi. Püşk komandalarımıza ən pis halda bərabər səviyyəli, hətta zəif rəqiblər bəxş etdiyindən, nikbin düşünməyə əsas var idi.

“Zirə” öz səhvlərinin güdazına getdi. Səfərdə oyun üstünlüyünü nəticəyə çevirə bilməyən qəsəbə təmsilçisi Sumqayıtda da eyni aqibəti yaşadı. Erkən qolla ümumi hesabı bərabərləşdirən “qartallar” çoxsaylı qol imkanlarını boşa verdi, sonra isə rəqibin cavab qoluna imkan yaratdı. Hakim səhvi, bəxtsizlik, xırda nüanslar – bu uğursuzluğun bəraəti yoxdur. “Payde” keçiləsi rəqib idi və “Zirə” yalnız öz səhvlərini analiz etməli, bu qədər qol vəziyyətini 180 dəqiqə ərzində boşa verməyin səbəbini tapmalıdır.

“Neftçi” üçün avrokubok mövsümü başlayan kimi bitdi. Mübarizəyə ikinci mərhələdən başlayan bakılıların Minsk “Dinamo”sundan daha yaxşı olduğunu dünənki 1:0 hesablı matç da göstərdi. Amma ilk oyunda baş verənlər aqibəti müəyyənləşdirdi. Bakıda nələrin olduğunu bilmirik, lakin komandada işlərin qaydasında olmadığı dəqiqdir. “Cəbhələr müharibəsi”nin, yoxsa sırf fərdi səhvlərin nəticəsidir – bilmirəm, fakt oldur ki, “Neftçi” üstün olduğu rəqib tərəfindən qitə yarışlarından qovuldu.

Bu uğursuzluqda ən böyük pay sahibi Yuri Vernidub sayılmalıdır. Onun ev oyununda güvəndiyi heyət yanlış idi, dünən etdiyi dəyişikliklərlə səhvini özü də etiraf etmiş oldu. Amma nə fayda, qatar getdi. İndi bir neçə gün tənqid eşidəcək, ardınca yeni mövsümə komanda hazırlayacaq. İlləri belə yola vermək olmaz, bəzi şeyləri nizama salmaq lazımdır. “Neftçi” bir əldən idarə olunmayınca əvvəlki nüfuzunu qaytara bilməyəcək, ən yaxşı halda Konfrans Liqasına vəsiqə üçün döyüşəcək.

“Qarabağ” da uduzmayıb sıradan çıxarılanlar siyahısındadır. ÇSKA bəlkə də rəqiblərin içində ən güclüsü idi, lakin bu, ağdamlılara bəraət vermir. Bolqarıstan təmsilçisi bir az dişli çıxdı və Qurban Qurbanovun yetirmələri büdrədi. Saysız qol vəziyyətləri, üstün oyun – bunları sadalamağa dəyməz, tarixdə nəticə qalır.

Əslində, “Qarabağ”ın heyətdə ciddi islahat aparmasının fəsadı olmalı idi. Yenilər heyətə uyğunlaşana kimi qəzalar gözləniləndir. Amma Qurbanov aylardır özünü doğrulda bilməyən Aleksey Kaşuka israrla güvənməyə davam edirsə, uğrusuzluğa ayaq vermiş olur.

Komanda 4 oyunda top buraxmayıb, Avropa Liqasını penaltilərdən sonra tərk edib. Bəlkə də bunu müsbət amil saymaq olar. Amma sofiyalılara 180 dəqiqə ərzində qol vura bilməmək də düşündürücüdür. Komanda toparlanmasa, Konfrans Liqasından uzaqlaşacağı gün də uzaqda deyil. Növbəti rəqib olan Kiyev “Dinamo”su hazırda yaxşı vəziyyətdə olmasa da, ənənəsi olan rəqibdir və “Qarabağ”ı hətta pley-offa buraxmaya bilər.

Bəlkə də ironik taledir. Dünən klublarımızın heç biri uduzmadı. Amma iki heç-heçə və bir qələbə ilk oyundakı eyibləri örtməyə imkan vermədi və təmsilçilərimizin hamısı məğlub sayıldı. Avrokubok mövsümü “Sabah”ın ümidinə qaldı. Ötən illərdə bu missiyanı “Qarabağ” yerinə yetirirdi, indi isə dəyişən çempion iş başındadır. Ağdamlılar növbəti iki rəqibi məğlub edib qruplara qalsa, həm seryasını davam etdirər, həm də reytinq xalları baxımından daha ümidli olarıq. Bunu bacarmasalar, uzun marafon təcrübəsi olmayan tək “Sabah”la işimiz çətin olacaq.

ABBAS

Mütəxəssis “Qarabağ”la ÇSKA arasında Avropa Liqasının 2-ci təsnifat mərhələsində keçirilən ilk görüşü dəyərləndirib və cavab qarşılaşmasında Ağdam təmsilçisinin diqqət etməli olduğu məqamları açıqlayıb: “Topa sahib olmaq müasir futbolda vacib amildir. Lakin əsas məsələ bu üstünlüyü rəqibin cərimə meydançası ətrafında yaratmaqdır. Hesab edirəm ki, “Qarabağ” ilk matçda, xüsusilə meydanın mərkəzində topa kifayət qədər nəzarət edə bilmədi. ÇSKA-nın pressinqi nəticəsində çoxlu top itkisinə yol verildi və bu da komandamızın təhlükəli qol epizodları yaratmasına mane oldu.

Rəqib Bakıda konkret oyun üslubu nümayiş etdirmədi. Daha çox aqressiv müdafiə planına üstünlük verdi. Xüsusilə ikili mübarizələrdə sərt oynayırdılar. Düşünürəm ki, “Qarabağ” Bolqarıstanda bu məqama hazır olmalıdır. Eyni zamanda standart vəziyyətlərə və əks-hücumlara qarşı da diqqətli olmaq lazımdır. Bakıda “Qarabağ” bu istiqamətdə tam istədiyini edə bilmədi, rəqib isə əks-hücumlarda imkan yaratmağa çalışırdı. Bu səbəbdən ÇSKA-nın qazandığı toplarla sürətli hücumlar qurmağa cəhd göstərəcəyi gözləniləndir. Yalnız topa sahib olmaqla “Qarabağ”ın qapısına qol vuracaqlarını düşünmürəm”.

Kərimov iki oyundan ibarət duellərdə taktiki intizam və matçın ritmini dəyişə bilməyin əhəmiyyətinə də toxunub: “Belə görüşlərdə intizamlı oyun və matçın ritmini dəyişə bilmək vacib amillərdəndir. Hər iki komandanın bu baxımdan imkanları var. Bakıda da gördük ki, komandalar taktiki planlarından kənara çıxmadılar. Oyunun tempini dəyişmək isə daha çox futbolçuların fərdi keyfiyyətlərindən asılıdır. Burada məşqçinin müdaxilə imkanları o qədər də geniş deyil. Lazım gəldikdə tempin artırılması və ya aşağı salınması birbaşa meydandakı futbolçuların qərarlarından asılı olur.

Açıq şəkildə qeyd etmək lazımdır ki, “Qarabağ”ın ötən mövsümkü futbolçu keyfiyyəti ilə hazırkı heyət arasında müəyyən fərq var. Bir sıra mövqelərdə dəyişikliklərin olması istər-istəməz komandanın oyun səviyyəsinə təsir göstərib. Amma bu, onların zəif olması demək deyil. Sadəcə, yeni futbolçuların uyğunlaşması üçün müəyyən vaxt lazımdır. Gördüyümüz qədərilə komanda artıq tədricən bir-birinə uyğunlaşmağa başlayıb. Buna baxmayaraq, “Qarabağ”ın şanslarını ÇSKA ilə müqayisədə daha yüksək qiymətləndirirəm. Bu baxımdan təmsilçimizi cütün favoriti hesab etmək olar”.

Aslan bəy baş məşqçinin təcrübəsinin belə qarşılaşmalarda hansı məqamlarda ön plana çıxa biləcəyindən də danışıb: “Çempionlar Liqasını qazanmış baş məşqçi də gətirsəniz, onun oyuna birbaşa müdaxilə imkanları məhduddur. Çünki meydanda məşqçinin tapşırıqlarını həyata keçirən futbolçulardır. Bununla belə, 0:0 hesabından sonra baş məşqçinin avrokubok təcrübəsi futbolçulara inam və motivasiya vermək baxımından mühüm rol oynaya bilər. Qurbanovun bu sahədə kifayət qədər böyük təcrübəsi var. Amma taktiki planın icrası və meydandakı performans birbaşa futbolçulardan asılıdır. Onlar tapşırıqları yerinə yetirə bilmədikdə məşqçinin nə qədər təcrübəli olmasının da oyuna təsiri məhdudlaşır”.

Kərimov cavab görüşündə “Qarabağ”ın qələbə qazanması üçün top itkilərinin minimuma endirilməsinin vacibliyini vurğulayıb: “Qələbə qazanmaq istəyiriksə, ilk növbədə top itkilərini azaltmalıyıq. Bakıda xüsusilə meydanın mərkəzində, dayaq yarımmüdafiəsində çıxış edən Bikalyo və Kadi çoxlu top itkisinə yol verdilər. Belə zonalarda top itirmək təhlükəlidir və bu, rəqibin birbaşa qapı qarşısında qol epizodu yaratmasına səbəb ola bilər. Bundan başqa, hücum zamanı cərimə meydançasına daha çox futbolçu ilə daxil olmaq lazımdır. Zubirin ilk oyunda rəqib müdafiəçiləri aldatdığını və əvvəlki üstünlüklərindən istifadə etdiyini çox görə bilmədim. Cinahlarda birəbir mübarizələrə girmək və rəqibi keçmək onun əsas üstünlüklərindən biridir. Bu səbəbdən cavab qarşılaşmasında cinahlarda daha qətiyyətli olmaq lazımdır”.

Təcrübəli mütəxəssis sonda cütün favoriti ilə bağlı fikirlərini də bölüşüb: “İki komandanı müqayisə etsək, bu cütün favoriti “Qarabağ”dır. Dəqiq hesab proqnozlaşdırmaq çətindir, amma qələbənin Ağdam təmsilçisinin tərəfində olacağına inanıram. Hətta düşünürəm ki, cavab görüşü Bakıdakı matçdan daha asan keçə bilər. Çünki ÇSKA Bakıda kifayət qədər qapalı futbol nümayiş etdirirdi. Öz meydanında və azarkeşləri qarşısında isə istəsə də, istəməsə də bir qədər daha açıq və öndə oynamaq məcburiyyətində qala bilər. Bu isə “Qarabağ” üçün əlavə imkanlar yarada bilər”.

GÜNAY SÜLEYMANOVA

Futbolinfo.az xəbər verir ki, qarşılaşma öncəsi yerli mətbuat Sofiya klubunun şanslarını dəyərləndirib.

Ağdamlıların zəngin avrokubok təcrübəsi və son illər stabil nəticələr göstərməsi əsas diqqətçəkən məqam olub. Lakin o da vurğulanıb ki, “Qarabağ”ın heyətində baş verən dəyişikliklər, həmçinin Bakıdakı qolsuz bərabərlik ÇSKA-nı xeyli ümidləndirib.

Üstəlik, sofiyalılar Bolqarıstan çempionatının 2-ci turu çərçivəsində evdə “Botev”ə 3:2 hesabı ilə qalib gəlib. Bolqarlar həmin matçda komandanı qələbəyə daşıyan Yannis Pittasın “Qarabağ”la görüşdə də əsas silah olacağını düşünür: “Yannis Pittas və Stefano Sensi fasilədən sonra meydana daxil olaraq oyunun axarını dəyişməklə komandanın əsas futbolçuları olduqlarını göstərdilər. Xüsusən də, Pittas 1 qol, 1 assistlə ÇSKA-nı qələbəyə daşıdı. Kipr millisinin üzvü “Qarabağ”la görüşdə də komandanın əsas silahı olacaq”.

Qeyd edək ki, ÇSKA – “Qarabağ” oyunu Bakı vaxtı ilə saat 22:00-da başlayacaq.

Futbolinfo.az xəbər verir ki, “Qarabağ” Avropa Liqasında, “Zirə” ilə “Neftçi” isə Konfrans Liqasında səhnə alacaq.

Hamıdan öncə “Zirə” meydana çıxacaq. Estoniyada “Payde”yə minimal hesabla uduzmuş Rəşad Sadıqovun komandası Sumqayıtdakı cavab görüşündə revanş almağa və mərhələ adlamağa çalışacaq.

Digər iki təmsilçimizi isə çətin səfər görüşləri gözləyir. Xüsusilə də evdəki ilk oyunda Belarusun “Dinamo” (Minsk) komandasına 2:4 hesabıyla uduzan “Neftçi” Bolqarıstanda baş tutacaq cavab görüşündə çox çətin vəzifənin öhdəsindən gəlməyə çalışacaq.

Son olaraq “Qarabağ” Bolqarıstanın ÇSKA (Sofiya) komandası ilə cavab görüşündə mərhələ adlamaq üçün vuruşacaq. Qurban Qurbanovun kollektivi Bakıdakı ilk görüşdə qolsuz heç-heçəyə razılaşıb. Bu üzdən istənilən hesablı qələbə “Qarabağ”ı növbəti raunda daşıyacaq.

Konfrans Liqası
2-ci təsnifat mərhələsinin cavab oyunları
30 iyul

20:00. Zirə – Payde
Baş hakim: Patrik Kolariç (Xorvatiya).
Sumqayıt şəhər stadionu.

21:00. Dinamo (Minsk) – Neftçi
Baş hakim: Tim Marşall (Şimali İrlandiya).
Beroe şəhər stadionu.

Avropa Liqası
2-ci təsnifat mərhələsinin cavab oyunu
30 iyul

22:00. ÇSKA (Sofiya) – Qarabağ
Baş hakim: Van Driessşe (Belçika).
Sofiya. Vasil Levski stadionu.