Buna baxmayaraq, son illər ölkə çempionatının iddialı komandalarından biri kimi tanınan “Orhus” yay fasiləsində heyətində ciddi dəyişikliklər edib. Komandanın əsas oyunçularından bəzilərinin ayrılması, yeni futbolçuların uyğunlaşma prosesi və taktiki dəyişikliklər “Orhus”un əvvəlki mövsümlə müqayisədə daha fərqli görüntü sərgiləməsinə səbəb olub. Kağız üzərində keyfiyyətli heyətə malik olmasına baxmayaraq, Danimarka təmsilçisinin hazırkı durumundan “Sabah”ın istifadə edə biləcəyinə inam böyükdür.

Baş məşqçi Yakub Poulsen əsasən 3-4-3 taktiki sxeminə üstünlük verir. Komanda topa sahib olmağa, oyunu cinahlardan qurmağa və hücum zamanı müdafiəçiləri də irəli çıxarmağa çalışır. Lakin bu yanaşma top itkisindən sonra müdafiəyə qayıdışda müəyyən problemlər yaradır. Xüsusilə cinah müdafiəçilərinin irəli çıxması arxada boş zonaların yaranmasına səbəb olur ki, sürətli əks-hücumlar quran komandalar bundan yararlana bilir. Məhz bu amil “Sabah” üçün ən vacib üstünlüklərdən biri hesab oluna bilər.

Qapıda komandanın əsas seçimi təcrübəli Yesper Hansen olacaq. O, uzun illər yüksək səviyyədə çıxış etsə də, artıq 40 yaşını geridə qoyub və əvvəlki çevikliyini qorumaq asan deyil. Amma “Lex”lə ilk oyunda onun qırmızı vərəqə alması komandanı çətin vəziyyətə saldı. Ehtiyat qapıçı Mads Hedenstad Kristiansen etibarlı alternativ sayılsa da, avrokubok təcrübəsi baxımından Hansen qədər üstün deyil. Bu mövqedə təcrübə üstünlük olsa da, yaş amili “Orhus” üçün müəyyən risk yaradır. İndi görək, Poulsen bizimlə oyunda hansı qapıçıya şans verəcək?!

Müdafiə xəttində Frederik Tinqager komandanın əsas dayaqlarından biri olaraq qalır. Kolin Rösler və Tobias Mölqaard da fiziki cəhətdən güclü müdafiəçilərdir. Bununla belə, yayda Feliks Beymonun komandadan ayrılması müdafiənin balansına ciddi təsir göstərib. İsveçli mərkəz müdafiəçisi ötən mövsüm 38 oyunda 3 qol və 4 məhsuldar ötürmə ilə yanaşı, müdafiədə də komandanın ən sabit oyunçularından biri idi. Onun “Kopenhagen”ə keçidi liderlik baxımından da böyük itki sayılır. Henrik Dalsqardın karyerasını başa vurması isə sağ cinah müdafiəsində həm təcrübənin, həm də sabitliyin azalmasına səbəb olub. Ötən mövsüm 38 oyunda 2 qol və 3 məhsuldar ötürmə edən futbolçunun yoxluğu cinah müdafiəsində hiss oluna bilər.

Yarımmüdafiədə Kristian Arnstad, Nikolay Poulsen, Maqnus Knudsen, Markus Solbakken, Kevin Yakob və Yens Yönsson kifayət qədər işlək xətt formalaşdırırlar. Bu futbolçular topa nəzarət etməyi bacarsalar da, sürətli pressinq altında bəzən rahat oynaya bilmirlər. Xüsusilə oyunun tempi yüksəldikdə top itkilərinin sayı artır və müdafiə ilə yarımmüdafiə arasında boşluqlar yaranır. Bu isə rəqibə sürətli keçidlər üçün imkan yaradır. “Sabah”ın orta sahədə aqressiv pressinq tətbiq etməsi “Orhus”un oyun quruculuğunu poza biləcək amillərdən biridir.

Cinahlarda Gift Links komandanın ən təhlükəli futbolçularından hesab olunur. Cənubi afrikalı sürəti və fərdi keyfiyyəti ilə seçilsə də, komandanın hücumlarının böyük hissəsinin onun üzərindən qurulması rəqibin müdafiə planını poza bilər. Digər hücumçular Yanni Serra, Yussuf Badji, Tobias Beç, Ceyms Boqere və Sebastian Yörgensen fərqli xüsusiyyətlərə malik olsalar da, onların heç biri son mövsümlərdə sabit qol məhsuldarlığı ilə seçilməyib.

“Orhus”un ən böyük itkisi isə şübhəsiz Patrik Mortensenin gedişidir. Təcrübəli hücumçu ötən mövsüm 38 oyunda 11 qol vuraraq komandanın əsas bombardiri olmuşdu. “Bröndbü”yə keçidindən sonra cərimə meydançasında onun yoxluğu hiss olunur. Mortensen təkcə qolları ilə deyil, hava mübarizələrindəki üstünlüyü və hücum xəttində top saxlamaq bacarığı ilə də komandanın vacib fiqurlarından idi. Hazırkı heyətdə onun rolunu tam şəkildə əvəz edə biləcək futbolçu görünmür.

Yay transfer dövründə əsas heyətdən üç vacib futbolçunun ayrılması “Orhus”un həm müdafiədə, həm də hücumda əvvəlki sabitliyini zəiflədib. Yeni oyunçuların və mövcud heyətin bu boşluğu qısa müddətdə doldurması asan görünmür. Yakub Poulsenin qurmağa çalışdığı oyun sistemi perspektivli olsa da, müdafiədəki boşluqlar və heyətdəki dəyişikliklər hələ də komandanın zəif nöqtələri olaraq qalır.

Bütün bunlar göstərir ki, “Sabah” kifayət qədər ciddi rəqiblə üz-üzə olsa da, Danimarka təmsilçisi keçilməz komanda təsiri bağışlamır. Əgər Azərbaycan çempionu intizamlı müdafiə olunsa, orta sahədə pressinqi düzgün tətbiq etsə və “Orhus”un cinahlarda buraxdığı boşluqlardan yararlansa, növbəti mərhələyə yüksəlmək üçün real şans əldə edə bilər. Bu səbəbdən qarşıdakı iki oyun “Sabah” üçün son illərin ən əlverişli avrokubok imkanlarından biri kimi qiymətləndirilə bilər. Bircə ələ düşən şanslardan yararlanmaq lazımdır. KuPS-la Bakıdakı matçdakı kimi əldə etdiyimiz qol vəziyyətlərini boşa versək, “Zirə”nin “Payde” ilə iki matçdakı aqibəti ilə üzləşə bilərik. Sizi əmin edirəm ki, “Sabah” rəqibdən çəkinməsə, xeyli qol vəziyyəti yaradacaq.

TAHİR MİRZƏ

– Çempionlar Liqasının (ÇL) II təsnifat mərhələsinin KuPS ilə cavab oyununda da qələbə qazanaraq növbəti mərhələyə adladınız. Matç haqda nə deyə bilərsiniz?

– Süni örtüklü meydançaya uyğunlaşmaq üçün bizə müəyyən vaxt lazım oldu. Rəqib də bundan yaxşı istifadə etdi və xüsusilə ilk hissədə bizdən daha üstün təsir bağışladı. Amma ikinci hissədə oyuna tam nəzarəti ələ aldıq, öz futbolumuzu oynamağa başladıq və bunun nəticəsində qollar vuraraq qələbə qazandıq.

– Fasilədə baş məşqçi Valdas Dambrauskas komandaya nə dedi, hansı tapşırıqları verdi ki, oyunun gedişatını dəyişə bildiniz?

– Biz heç vaxt topa sahib olmağı rəqibə verməyi planlaşdırmırıq. Sadəcə, həmin gün süni örtüyə uyğunlaşmaqda çətinlik çəkdiyimiz ilk dəqiqələrdən rəqib faydalandı. Fasilədən sonra daha rahat oynamağa başladıq və oyunun gedişatını dəyişə bildik.

– ÇL-də ikinci mərhələni də keçməklə “Sabah” eyni zamanda Konfrans Liqasının Liqa mərhələsinə vəsiqəni təmin etdi. Minimum missiyanın yerinə yetirilməsi sizin üçün yetərlidir, ya komanda Çempionlar Liqasının, ən pis halda Avropa Liqasının Liqa mərhələsinə düşməyi hədəfləyib?

– Üçüncü təsnifat mərhələsinə yüksəlmək və avrokubokların liqa mərhələsində çıxışı təmin etmək klub üçün böyük uğurdur. Amma biz inanırıq ki, bununla kifayətlənməməliyik. Komandamızın daha böyük uğurlara imza atacaq gücü var və maksimum nəticə üçün mübarizəni davam etdirəcəyik.

– Növbəti mərhələdə rəqib “Lex” önündə əla geridönüş edən Danimarka təmsilçisi “Orhus” olacaq. Şansları necə dəyərləndirirsiniz? “Sabah” bu komandanı da keçəcək gücdədir?

– Bizi növbəti mərhələdə çox güclü rəqib və böyük sınaq gözləyir. Bu oyunları səbirsizliklə gözləyirik. Belə komandaya qarşı oynamaq öz gücümüzü qiymətləndirmək üçün əla fürsətdir. Əlimizdən gələni edəcəyik və şanslarımız üçün sona qədər mübarizə aparacağıq.

– Avrokuboklarda bu mövsüm keçirdiyiniz 4 oyundan 3-də aktivinizə qol yazdırmısınız. Fərdi performansınızı necə qiymətləndirirsiniz?

– Öz oyunumu dəyərləndirməyim düzgün olmazdı. Yalnız onu deyə bilərəm ki, komandaya xeyir vermək üçün meydanda əlimdən gələni edirəm. İnanıram ki, bu, məndə alınır.

CAVAD

– KuPS üzərində hər iki matçda qələbə qazanıb növbəti mərhələyə vəsiqə qazandınız. Rəqibi və hər iki oyunu necə analiz edərdin?

– KuPS yaxşı təşkilatlanmış komandadır və öz ölkəsinin çempionudur. Onlara uğurlar arzulayıram. Oyunlar heç də asan keçmədi. Bilirdik ki, rəqib doğma meydanda ilk matçdakı məğlubiyyətin əvəzini çıxmağa çalışacaq.

– Səfər matçının ilk hissəsi heç də yaxşı keçmədi. Bunun səbəbin nədə görürsən?

– Sintetik örtük öz təsirini göstərdi. Həmin şəraitə uyğunlaşmaq və oyuna tam daxil olmaq üçün bizə bir qədər vaxt lazım oldu. Meydana uyğunlaşdıqdan sonra isə ikinci hissədə artıq öz oyunumuzu diqtə edə bildik.

– “Sabah” dörd oyunda qələbə qazanaraq həm ölkə reytinqinə mühüm töhfə verdi, həm də növbəti mərhələyə yüksəldi. Çempionlar Liqasına başlayanda buna inanırdınız?

– Klubumuzdakı hər bir insana inanıram. Axı, biz futbolu məhz birlikdə ən yüksək hədəflərə çatmaq üçün oynayırıq. Artıq minimum bir addımı atmışıq, indi isə işləməyə davam etməliyik.

– Komandanız tarixində ilk dəfə avrokubokların əsas mərhələsində oynayacaq. Sən isə bunu daha əvvəl “Qarabağ”ın heyətində yaşamısan. “Sabah”la əsas mərhələdə çıxış etmək və bu uğura gedən yolda əsas fiqurlardan biri olmaq sənin üçün nə ifadə edir?

– Bu hissləri sözlə ifadə etmək mümkün deyil. “Sabah”da belə uşaqlarla bir yerdə olduğum üçün çox xoşbəxtəm. Onlar mənim üçün ailə kimidirlər.

– Qarşıda daha çətin rəqiblər var. Həmin oyunlar barədə nə düşünürsən?

– Rəqibin kim olmasından asılı olmayaraq, bizi çətin mübarizə gözləyir. Hər rəqib kifayət qədər ciddidir. Əlimizdən gələni edəcəyik ki, meydandan müsbət nəticə ilə ayrılaq.

FƏRİD

İlk matç avqustun 5-i, Bakı vaxtı ilə saat 20:30-da başlanacaq.

Bu komandaların cavab oyunu isə avqustun 11-də Bakıda keçiriləcək.

“Lex” bəlkə də pley-offa yüksəlmək yolunda “Sabah”a daha çox problem yaradardı. Lakin sırf püşk baxımından polşalılarla qarşılaşmaq daha yaxşı perspektiv vəd edirdi.

“Orhus”un təmslçimizə rəqib olması ilə Azərbaycan çempionunun pley-off mərhələsinin püşkatmasında səpələnməmişlər səbətində yer alacağını dəqiqləşdirib. Püşkdə cütlərdən reytinqi ən yüksək olana görə səbət müəyyənləşir. Əgər “Lex” “Orhus”la matçda mərhələ adlasaydı, yüksək UEFA reytinqi (27.250) sayəsində “Sabah” – “Lex” cütü səpələnmişlər arasında yer alacaqdı. Lakin “Orhus”un reytinqi (8.421) buna kifayət etmir. “Sabah”ın klub reytinqi isə 6.000-dir və bu, daha güclü rəqib gözləmək məcburiyyəti yaradır.

Ona görə də “Sabah” pley-off mərhələsinə yüksələcəyi təqdirdə səpələnmiş komandalardan biri ilə qarşılaşacaq. Artıq onların da siyahısı bəllidir. Belə ki, “Qarabağ”dan tranfer olunan Kamilo Duran bu dəfə ölkəmizə rəqib kimi gələ bilər. Onun çıxış etdiyi “Seltik” (Şotlandiya) “Sabah”ın potensial rəqiblərindən biridir. AEK (Yunanıstan) da pley-offda rəqibini gözəyir.

“Srvena Zvezda” (Serbiya) – “Hapoel” Ber-Şeva (İsrail), “Dinamo” (Zaqreb, Xorvatiya) – “Jalgiris” (Litva) və “Slovan” (Slovakiya) – “Myalbü” (İsveç) cütlərinin qalibi də “Sabah”la “Orhus”un mübarizəsində qalib olacaq komandanı gözləyəcək.

Çempionlar Liqasının pley-off mərhələsinin püşkatma mərasimi avqustun 3-də keçiriləcək. “Sabah” isə 3-cü təsnifat mərhələsində “Orhus”la avqustun 4/5-i və 11-də üz-üzə gələcək.

Zəngin tarixə, titullara və Avropa təcrübəsinə malik rəqib son mövsümdə yenidən ölkə futbolunun zirvəsinə yüksələrək qitənin ən nüfuzlu klub turnirinə vəsiqə qazanıb. Gəlin, “Lex”i dramatik mübarizə şəraitində adlayan rəqibimizi daha yaxından tanıyaq!

1880-ci ildə əsası qoyulan “Orhus” Danimarka futbolunun ən zəngin tarixə malik klublarından biridir. Əvvəlcə gimnastika və qılıncoynatma cəmiyyəti kimi fəaliyyət göstərən klub 1902-ci ildə futbol bölməsini yaradıb və sonradan məhz bu sahədə ölkənin ən tanınmış komandalarından birinə çevrilib.

“Orhus” ilk rəsmi futbol oyununu 1902-ci ilin noyabrında keçirib və “Orhus İdretsklub Olimpiya”ya 2:5 hesabı ilə uduzub. Komanda altı il sonra ilk böyük uğurunu qazanaraq Yutland çempionu olub. Klub həmin turnirdə ümumilikdə yeddi dəfə qalib gəlib, daha sonra isə Danimarka futbolunun ən güclü komandaları sırasında möhkəmlənib.

AGF adı ilə tanınan klub 6 dəfə Danimarka çempionu adını qazanıb. Ötən mövsüm çempion olan klub 1986-cı ildən sonrakı həsrətə son qoyub. Komanda həmçinin 9 dəfə Danimarka Kubokunun qalibi olub.

Beynəlxalq arenada da diqqətçəkən nəticələrə imza atan “Orhus” 1961-ci ildə Avropa Çempionlar Kubokunun, 1989-cu ildə isə Kuboklar Kubokunun 1/4 finalına qədər irəliləyib. Hər iki halda danimarkalılar sonradan turnirin qalibi olan, müvafiq olaraq, “Benfika” və “Barselona”ya uduzublar. Klub 2018 və 2020-ci illərdə Atlantik Kubokunu da qazanıb.

Komanda uzun illər ərzində müxtəlif enişli-yoxuşlu dövrlər yaşayıb. 1950-ci illərin ortalarından etibarən ölkə futbolunda güclü mövqe tutan AGF qısa müddətdə dörd çempionluq və beş kubok əldə edib. 1968 və 1973-cü illərdə aşağı liqaya yuvarlansa da, 1976-cı ildə elitaya qayıdaraq uzun müddət yüksək dəstədə çıxışını davam etdirib.

1980-ci illər klubun ən uğurlu dövrlərindən biri hesab olunur. Henninq Yensen, Fleminq Poulsen, Yan Bartram və Con Stampe kimi futbolçuların çıxış etdiyi illərdə “Orhus” 1986-cı ildə beşinci çempionluğunu qazanıb, 1987, 1988 və 1992-ci illərdə isə ölkə kubokunu muzeyinə aparıb. 1990-cı illərdə də çempionluq uğrunda yarışan bu komanda 1996-cı ildə dramatik şəkildə titulu əldən versə də, mövsümü Danimarka Kubokunda titulla başa vurub.

Sonrakı illərdə maliyyə problemləri klubun nəticələrinə mənfi təsir göstərib. AGF bir neçə dəfə aşağı liqaya düşsə də, hər dəfə qısa müddətdə yenidən Superliqaya qayıtmağı bacarıb. 2014-cü ildən sonra rəhbərlikdə aparılan dəyişikliklər və yeni inkişaf strategiyası klubun sabitliyini bərpa edib. Müxtəlif baş məşqçilərlə işləyən kollektiv tədricən əvvəlki iddiasını geri qaytarıb və 2019/20 mövsümündə bürünc medal qazanaraq yenidən liderlər sırasına yüksəlib.

2025/26 mövsümü isə AGF üçün tarixi əhəmiyyət daşıyıb. Baş məşqçi Yakob Poulsenin rəhbərliyi altında komanda çempionatın sonlarına yaxın inamlı çıxışı ilə fərqlənərək səfərdə əzəli rəqibi “Bröndbü” üzərində 2:0 hesablı qələbə sayəsində 40 illik çempionluq həsrətinə son qoyub. Məhz bu uğur sayəsində “Orhus” UEFA Çempionlar Liqasının təsnifat mərhələsinə vəsiqə qazanıb.

Beləliklə, “Sabah”ı təkcə Danimarkanın son çempionu deyil, həm də zəngin ənənələrə və böyük Avropa təcrübəsinə malik rəqib gözləyir. Bununla belə, son illərdə yenidən yüksəlişə keçən AGF üçün də Azərbaycan təmsilçisi ciddi sınaq olacaq və bu cütün qarşıdurmasının gərgin mübarizə şəraitində keçəcəyi gözlənilir.

Hə, onu da qeyd edim ki, keçiləsi rəqibdir. Niyə belə düşündüyümü isə oyun  ərəfəsində yazacağam. Təbii ki, rəqibin heyətini və oyununu təhlil etməklə…

TAHİR MİRZƏ

Bu komandaların ilk görüşündə “Lex” səfərdə 4:1 hesabı ilə qələbə qazanmışdı. Poznan şəhər stadionunda keçirilən cavab qarşılaşmasında isə bu dəfə Danimarka təmsilçisi eyni hesabla qalib gəlib – 4:1. Əsas vaxt 3:0 hesabı ilə bitib, əlavə vaxtda komandalar hərəsi daha bir dəfə fərqlənib.

Beləliklə, qalibi penaltilər seriyası müəyyən edib. Burada daha dəqiq olan “Orhus” (4:3) növbəti mərhələyə yüksəlməklə “Sabah”a rəqib olub.

Qeyd edək ki, ÇL-də 3-cü təsnifat mərhələsinin matçları 4/5 və 11 avqusta təyin edilib. “Sabah” ilk oyununu Danimarkada keçirəcək.

Nuutinen “Sabah”ın hesabı açmasından sonra oyunun dəyişdiyini vurğulayıb: “Rəqibin ilk qolunun qarşısını daha yaxşı ala bilərdik. Bundan sonra oyuna əvvəlki kimi nəzarət edə bilmədik və enerjimiz də azaldı. Evdə 0:2 hesabı ilə uduzduğumuz üçün çox məyusuq. Amma Bakıda keçirdiyimiz ilk oyundan fərqli olaraq, bu dəfə olmaq istədiyimiz KuPS-a daha çox bənzəyirdik” (qol.az).

KuPS-un baş məşqçisi “Sabah”ı komanda kimi yüksək qiymətləndirib: “Biz çox keyfiyyətli və yaxşı məşqçi tərəfindən hazırlanan komandaya uduzduq. “Sabah”ı təbrik edirəm”.

Xatırladaq ki, ilk matçda da qalib gələn (1:0) “Sabah” UEFA Çempionlar Liqasında 3-cü təsnifat mərhələsinə yüksəlib.

Futbolinfo.az xəbər verir ki, “Sabah”a qədər daha 3 klubumuz – “Neftçi”, “Qarabağ” və “Qəbələ” də bunu bacarıb. 2012-13 mövsümündə Çempionlar Liqasında mübarizəyə başlamasına baxmayaraq, sonradan Avropa Liqasına düşən “ağ-qaralar” qrupa qədər irəliləməklə ilkə imza atıb. “Qırmızı-qaralar” isə ardıcıl iki mövsüm bunu həyata keçirməyi bacarıb. Həm də “Qəbələ” bütün təsnifat mərhələlərində rəqiblərini yenib iki dəfə istəyinə çatan yeganə komandadır.

Ağdam təmsilçisi isə ardıcıl son 12 mövsümdə avrokubokların qrupunda iştirak edə bilib. İlk iki mərhələdə 4 qalibiyyət əldə edən “Sabah” “Qarabağ”ın ötən mövsümdə startdakı nailiyyətini təkrarlayıb. Lakin təsnifat mərhələlərində qələbə rekordunu təkrarlamaq üçün Valdas Dambrauskasın yetirmələrinə daha bir qələbə lazımdır. Çünki “Qarabağ” 2, “Qəbələ” isə 1 dəfə təsnifatlarda 5 dəfə rəqiblərini məğlub edib.

Klublarımızın avrokuboklarda qruplara vəsiqə qazandıqları mövsümlərin əsas mərhələlərinə gedən yolu:

QARABAĞ

Çempionlar Liqası

2017-2018: 4 qələbə, 1 heç-heçə, 1 məğlubiyyət

2022-2023: 3 qələbə, 3 heç-heçə, 2 məğlubiyyət

2024-2025: 3 qələbə, 0 heç-heçə, 3 məğlubiyyət

2025-2026: 5 qələbə, 0 heç-heçə, 1 məğlubiyyət

Çempionlar Liqası / Avropa Liqası

2014-2015: 3 qələbə, 2 heç-heçə, 1 məğlubiyyət

2015-2016: 3 qələbə, 2 heç-heçə, 1 məğlubiyyət

2016-2017: 2 qələbə, 3 heç-heçə, 1 məğlubiyyət

2018-2019: 3 qələbə, 3 heç-heçə, 2 məğlubiyyət

2019-2020: 4 qələbə, 2 heç-heçə, 2 məğlubiyyət

2020-2021: 3 qələbə, 0 heç-heçə, 1 məğlubiyyət (penaltilər seriyası ilə)

2023-2024: 5 qələbə, 2 heç-heçə, 1 məğlubiyyət

Konfrans Liqası

2021-2022: 4 qələbə, 2 heç-heçə, 0 məğlubiyyət

QƏBƏLƏ

Avropa Liqası

2015-2016: 3 qələbə, 3 heç-heçə, 2 məğlubiyyət

2016-2017: 5 qələbə, 1 heç-heçə, 2 məğlubiyyət

NEFTÇİ

Çempionlar Liqası / Avropa Liqası

2012-2013: 2 qələbə, 3 heç-heçə, 1 məğlubiyyət

SABAH

Çempionlar Liqası

2026-2027: 4 qələbə, 0 heç-heçə, 0 məğlubiyyət

Qeyd: Çempionlar Liqası / Avropa Liqası yazılan mövsümlərdə komanda mübarizəyə Çempionlar Liqasında başlayıb, təsnifat mərhələlərində Avropa Liqasına yollanıb.

Futbolinfo.az UEFA-nın rəsmi saytına istinadən xəbər verir ki, Azərbaycan klubu 2:0 hesablı qələbə qazansa da, bu, heç də asan başa gəlməyib.

Hətta təmsilçimizin müəyyən mənada şanslı olduğunu da demək olar. Çünki finlandlar qapıya zərbə sayında “Sabah”dan üstün olub. Lakin meydan sahiblərinin 14 zərbəsindən cəmi 2-si “çərçivə”yə ünvanlanıb. Əvəzində “Sabah”ın 4 belə həmləsinin yarısı – 2-si qolla yekunlaşıb.

KuPS – Sabah

Qollar – 0:2

Zərbələr – 14:10

“Çərçivə”yə zərbələr – 2:4

“Çərçivə”yə düşməyən zərbələr – 7:4

Bloklanan zərbələr – 5:2

Künc zərbələri – 8:6

Oyundankənar vəziyyət – 1:4

Sarı vərəqələr – 3:1

Cərimə zərbələri – 14:16