Futbolinfo.az xəbər verir ki, gəncəlilərin yubanmasının səbəbi var. Rəhbər postlarda bəzi dəyişikliklərn olması gözlənilir. Məhz bundan sonra həm baş məşqçi, həm də heyətlə bağlı real addımlar atılacaq.

Hazırkı qeyri-müəyyənliyə bu həftənin ilk 3 günü ərzində aydınlıq gəlməlidir. Öncə klubun yeni sponsoru müəyyənləşəcək, daha sonra isə məşqçi məsələsinə nöqtə qoyulacaq.

Təcrübəli mütəxəssisin karyerasını “Şamaxı”da davam etdirəcəyi məlumdur. Tərəflər arasında razılıq əldə olunub və yaxın günlərdə bunun rəsmən açıqlanacağı gözlənilir.

Bəs, bu dəyişiklik nə vaxt rəsmiləşəcək? Futbolinfo.az bununla bağlı “Kəpəz”in Media və Marketinq Departamentinin direktoru Gəray Qiyasovun mövqeyini öyrənib: “Yaxın günlərdə Azər Bağırovun komandadan ayrılması ilə bağlı rəsmi paylaşım olacaq. Lakin yeni təyinatın nə vaxt ediləcəyi dəqiq deyil. Çünki hazırda bir neçə məşqçi ilə danışıqlar gedir. Ona görə də yekun qərar verilməyib”.

GÜNAY SÜLEYMANOVA

“Kəpəz” dünən Premyer Liqada qalmaq üçün çox vacib qələbə qazandı. Çempionluğu təmin edən “Sabah”ın bir az arxayınçılığından, bir az da kubokun finalını düşünüb ehtiyatlanmasından faydalanan gəncəlilər sürpriz nəticəyə imza atdı. Azər Bağırovun yetirmələri “bayquşlar”ın 22 oyunluq məğlubiyyətsiz seriyasını qırmaqla yanaşı, həm keçmiş, həm də indiki çempiona qalib gəlməyi bacaran yeganə komanda oldu. “Qarabağ” gəncəlilər qarşısında bu mövsüm iki dəfə məyusluq yaşayıb.

Təbii ki, “Sabah” qarşıdakı finalı düşünüb bir çox oyunçusunu qorusa da, bu komandanın ikinci heyəti belə gəncəlilərdən daha sanballıdır. Bunu ilk hissədə üstün oyunları ilə göstərdilər. Meydan sahibləri qol vurmağı bacarmadısa, bunu Yusif İmanova borcludur. Gənc qapıçı yetirməsi olduğu komanda ilə görüşdə sanki ikiqat motivasiya ilə oynayırdı.

Gəlişi ilə Yusifin “Sabah”dan ayrılmasına səbəbkar olan Stas Pokatilovsa sanki həmkarının qurtarışlarından məyus olmuşdu. Və bu məyusluq oyunun nəticəsinə təsir edən səhvə səbəb oldu. Mövsüm boyu etibarlı oynayan qazaxıstanlı qolkiper ikinci hissənin startındaca yanlış ötürmə edincə hesab açıldı.

Dünənki qarşılaşma bu komandaların qüvvələr nisbətinin real əksi deyildi. “Sabah”a xal lazım olsaydı, fərqli heyət və fərqli yanaşma görərdik. Lakin gəncəlilərin də haqqını vermək lazımdır. Meydan sahiblərinin hədiyyəsindən düzgün yararlanmaq özü də az iş deyil. Bundan başqa, qonaqlar fədakar oyunla əsas problemlərini həll edə bildilər.

Bu nəticə Valdas Dambrauskas üçün siqnal olmalıdır. “Sabah” rəhbərliyi gələn mövsüm yenə iddiasını davam etdirmək istəyirsə, heyət gücləndirilməli və genişləndirilməlidir. Komanda kubokun finalını düşünən kimi çempionatda məğlubiyyət yaşadı. Bu o deməkdir ki, iki cəbhədə oynamaq üçün qüvvə yetərsizdir. “Qarabağ”ın başına gələnlər də nümunə olmalıdır.

ABBAS

Futbolinfo.az xəbər verir ki, görüşün 80-ci dəqiqəsində Rəhman Hacıyev ayağından zədə aldıqdan sonra komandanın həkimi xərəyin gəlməsini gözləmədən onu qucağına alaraq meydandan çıxardı. Həmin görüntülər sosial şəbəkələrdə geniş yayılıb.

Olayın qəhrəmanı olan Elman Məmmədov həmin epizodla bağlı futbolinfo.az saytına danışıb. Həkim bildirib ki, Rəhmanın yerində başqa oyunçu da olsaydı, eyni addımı atardı: “Həmin epizodda həm vaxt itkisi olmasın, həm də daha rahat müdaxilə edə bilim deyə belə etdim. Bəzən ani qərarlar maraqlı məqamlar yaradır, bu da onlardan biridir. Komandamızın hər bir üzvü mənim üçün əzizdir”.

Məmmədov oxşar hadisənin daha əvvəl də yaşandığını xatırladıb: “Turan Tovuz”la kubok oyununda Ohorinin ayağı zədələnmişdi və meydanı tərk etməli oldu. Paltardəyişmə otağına gedərkən əvvəlcə əlini çiynimə atıb bir neçə addım atdı. Lakin ağrıları çox olduğu üçün məndən onu daşımağımı xahiş etdi, mən də kömək etdim və onu belimdə apardım”.

Qeyd edək ki, “Kəpəz” – “Qəbələ” oyunu qonaqların 2:0 hesablı qələbəsi ilə yekunlaşıb.

– Son oyunda məğlubiyyətin əsas səbəbi nə oldu?

– “Sabah”la oyunun son dəqiqələrində qol buraxdıq və məğlub olduq. Bu, həqiqətən də çox məyusedicidir. Yaxşı oynamışdıq, mübarizə aparmışdıq. Amma son dəqiqələrdə qol buraxdıq. Uduzduq.

–  Komandanın əsas problemi nədir?

– Bizə lazım olan əsas şey qol vurmaqdır. Düşünürəm ki, oyunlarda epizodlar yaradırıq, amma bundan istifadə edə bilmirik.

– Bu problemi aradan qaldırmaq üçün nə etmək lazımdır?

– Daha çox düşünməliyik ki, qol vurmaq üçün nə edək. Bu gün əsas problemimiz budur və onu aradan qaldırmalıyıq. Komanda rəqib qapısına yol tapmalıdır və bu mövqedə özümüzü necə inkişaf etdirməyimizi analiz etməliyik, düşünməliyik.

– Komandanın liqada qalması üçün nə edəcəksiniz?

– Komandanın Premyer Liqada qalması üçün əlimdən gələni edəcəyəm. Mən şəxsən bütü bacarıqlarımı ortaya qoyacam. Ümid edirəm ki, istədiyimizi əldə edib Premyer Liqada yerimizi qoruyub saxlaya bilərik.

– Qarşıda “Sumqayıt”la oyun var. Qələbəyə inanırsınız?

– Əlbəttə, komanda olaraq hər zaman qələbəyə inanırıq. Hər oyunda bunun üçün meydana çıxırıq. Oyuna yaxşı hazırlaşacağıq və qalib gəlmək üçün əlimizdən gələni edəcəyik. Aktivimizə 3 xal yazmaq istəyirik.

– Ötən tur “Neftçi” ilə matçda meydana çıxmadın və bu söz-söhbətlərə yol açdı. Bakı klubundan icarə əsasında “Kəpəz”ə keçəndə müqaviləndə onlara qarşı oynamayacağına dair bənd yer alır?

– Bu suala cavab vermək istəmirəm.

AĞA

– Komanda xallarını 9-a çatdırdı və 10-cu pilləyə yüksəldi. Mövqeyinizi daha da yaxşılaşdıra biləcəksiniz?

– Əlbəttə, buna inanırıq. Hazırda komanda daxilində ab-hava tam fərqlidir. Hər qazanılan xal bizə həm cədvəldə, həm də psixoloji baxımdan əlavə güc verir. Qarşıda hələ çox oyun var və əsas məqsədimiz bu tempdə davam edib mövqeyimizi mərhələli şəkildə daha da yaxşılaşdırmaqdır. Heç kim rahatlaşmır, hamı məsuliyyətini anlayır.

– “Kəpəz”də öz çıxışını necə dəyərləndirirsən? Səncə, özünü yenidən sübut edib daha yaxşı klublara gedə biləcəksən?

– Hələlik öz çıxışıma çox yüksək qiymət verməzdim. Mənim üçün əsas olan stabil oyun göstərmək və komandaya fayda verməkdir. Bunun üzərində çalışıram. Əgər “Kəpəz”də bunu bacarsam, təbii ki, gələcəkdə daha yaxşı imkanlar yarana bilər. Amma hazırda bütün fikrim buradadır, çünki nəticə olmadan fərdi hədəflərdən danışmaq düzgün deyil.

– Son turdakı qalibiyyət komandada özünəinamı qaytarıb və ümid edirsiniz ki, mövsümün ikinci yarısı sizin üçün daha uğurlu olacaq?

– Bəli, o qələbə komanda üçün çox vacib idi. Bəzən bir oyun hər şeyi dəyişir — həm inamı, həm də psixoloji yükü. İndi məşqlərdə də bu hiss olunur. Ümid edirik ki, ikinci yarıda daha sabit, daha inamlı və nəticəyə oynayan “Kəpəz” görəcəyik.

– Ümumiyyətlə, qış fasiləsindən necə yararlanacaqsınız və bu, sizə daha yaxşı nəticələr qazanmağa kömək edəcəkmi?

– Qış fasiləsi bizim üçün çox önəmlidir. Bu dövrü həm fiziki, həm də mental baxımdan düzgün dəyərləndirmək lazımdır. Komanda olaraq çatışmazlıqlar üzərində işləmək, oyun planını daha da təkmilləşdirmək üçün yaxşı fürsətdir. Mən də fərdi olaraq bu fasilədən maksimum faydalanmağa çalışacağam ki, ikinci yarıya daha hazır çıxım.

– Karyeranda bir müddət çətinliklər oldu və Azərbaycan millisindən də kənarda qaldın. Yenidən milliyə qayıtmaq istəyirsən? Düşünürsən ki, bunu bacaracaqsan?

– Milli komandada oynamaq hər futbolçu üçün böyük şərəfdir və təbii ki, yenidən orada olmaq istəyirəm. Son dövrdə yaşananlar məni ruhdan salmadı, əksinə, daha çox çalışmağa vadar etdi. Düşünürəm ki, davamlı meydana çıxsam, milli komanda məsələsi özü-özünə gündəmə gələcək.

– Növbəti turda Qərb derbisi var. “Turan Tovuz”u da məğlubiyyətə uğratmaq mümkün olacaq?

– Qərb derbisi hər zaman xüsusi oyun olub və olacaq. “Turan Tovuz” güclü, formalaşmış komandadır. Asan olmayacaq, amma biz də meydanda əlimizdən gələni edəcəyik. Düzgün yanaşma, konsentrasiya və komanda oyunu ilə hər rəqibə qarşı mübarizə aparmaq mümkündür. Məqsədimiz yaxşı oyun və nəticədir.

FƏRİD

Düzdür, komanda mövsümün startı ilə müqayisədə daha inamlı təsir bağışlayır. Xüsusilə Vensan Abubakarın gəlişindən sonra bakılılarda özünəinam yaranıb. Dünən “Qarabağ”la matçda da Samir Abasovun yetirmələri əlacsız görünmürdü.

Bununla belə, ortada əlahəzrət fakt var: paytaxt klubu hətta ən yaxın izləyicisindən – 6-cı pillədəki “Araz-Naxçıvan”dan 4 xal geri qalır. lk “dördlüy”ə düşmək üçün qələbə seriyası yaxalamaq, birbaşa rəqibləri yenmək lazımdır. Mümkündür, amma çətindir.

“Qarabağ”la derbidə “Neftçi” zaman-zaman təşəbbüsü ələ alsa da, oyuna meydan sahibləri diqtə edirdi. Hələ bu, natamam əsas heyət idi, Qurban Qurbanov bəzi oyunçulara istirahət vermişdi. Ağdamlılar zirvəyə yüksəlməklə növbəti çempionluğa kökləndiyinin, daxili yarışlara da barmaqrası yanaşmadığının siqnalını verdi.

Lakin bütün biletlərin satılmasının, tribunların dolmasının səbəbi yalnız oyunun bayram günü keçirilməsi, “Qarabağ”ın avrokubokdakı parlaq çıxışı deyildi. Azarkeşlər həm də dirçəlmək istəyən “Neftçi”ni izləməyə gəlmişdi. Bu komandalar çempionluq mübarizəsi aparsaydı, yəqin ki, “Azersun Arena”dan daha böyük stadionda oynamaq lazım gələrdi.

“Turan Tovuz”, “Kəpəz”, “Qarabağ”, “Neftçi”, “Sumqayıt” – çempionatın canı bu komandalardır. Onlar hamısı iddialı olsa, azarkeş azlığından şikayətlənməyə şansımız olmaz. Azarkeşlər yaxşı komanda, gərgin mübarizə istəyir. Ağdamlılar ehtiyatdakı oyunu da udsa, “Neftçi”dən 11 tura 11 xallıq məsafədə olacaq. Belə rəqabət tamaşaçı marağı çəkməz. Dünən tribunlara həm də qolları sıralayan Abubakara görə dolmuşdu. Amma hamı gördü ki, bir güllə bahar olmur. “Neftçi” daha yaxşı oynamalı, çempionata rəng qatmalıdır.

Hələliksə liderlik uğrunda başqa komandalar döyüşür. Ehtiyatda bir oyunu olan “Sabah” həmin matçda “Qarabağ”ı yensə, zirvəyə qalxacaq. Hətta indi də komanda avrokuboklara vəsiqə uğrunda yarışda önəmli üstünlük qazanıb.

Amma “bayquşlar”ın oyunu hətta baş məşqçi Valdas Dambrauskası da razı salmır. Qarşıdakı fasilədə, xüsusilə də qışda legioner çalışdırıcı öz oyun üslubunu təkmilləşdirməli, komandanı daha yaxşı vəziyyətə gətirməlidir. Qeyri-sabitlik davam etsə, hətta ilk “dördlük”dəki yeri itirmək an məsələsidir.

“Kəpəz”ə gəlincə, növbəti məğlubyyət 10-cu oldu. Gəncəlilər hələ də 12-ci pillədədir və ümidin tam qırılmasına digər autsayderlərin ardıcıl məğlubiyyətləri imkan vermir.

FƏRİD

– Ötən tur “Şamaxı” üzərindəki qələbədən sonra hamı “İmişli”yə qarşı daha uğurlu çıxış edəcəyinizi gözləyirdi. Amma…

– Hər oyuna qələbə üçün çıxırıq. 0:3 hesablı məğlubiyyət gözlənilməz oldu. Amma bu futboldur və gözlənilməz hadisələr oyunu bu yerə gətirib çıxardı.

– Qırmızı vərəqə aldığın epizod çox müzakirə olundu. Həmin epizodla bağlı nə deyə bilərsən? Səncə, hakim “qırmızı”nı ləğv etməli idi?

– Epizod zamanı, hələ toqquşmadan əvvəl qapıdan çıxıb qaçarkən təəssüf ki, sol baldır əzələm yırtıldı. Əzələm yırtıldıqdan sonra kəskin ağrının təsiri altında və anlıq zaman ərzində kontrolu tamamilə itirdim. Nə özümü dayandıra, nə də topa yetişib düzgün müdaxilə edə bildim. Nəticədə belə bir vəziyyə yarandı.

– Hakimin həmin epizodla bağlı verdiyi qərarlardan narazı deyilsən? Çünki sonradan oyundankənar vəziyyət olduğu ortaya çıxdı…

– Hakim qərarları haqqında danışmaq istəmirəm. Sadəcə mənə sərt müdaxiləyə görə qırmızı verildiyi deyildi. Əgər belə qərar verilibsə, başqa nəsə deyə bilmərəm.

– Oyundan sonra İnstaqramda paylaşım etmişdin. Zədələdiyin Vüsal Qənbərovla danışdın və yanına getdin?

– Vüsal Qənbərovla aramızda dostluq əlaqələri var. Əlaqə saxlayıram, danışırıq. Sadəcə öz zədəmlə bağlı yanına getmək qismət olmayıb. Hələ ki, doğru-düzgün gəzə bilmirəm. Tez bir zamanda yanına gedəcəm.

– “Kəpəz”in durumu barədə nə düşünürsən? Komanda vəziyyəti dəyişə biləcək?

– Bu klubda olan hər kəs – istər rəhbərlik, istər məşqçilər, istər biz futbolçular buna inanırıq. İnşallah, hər şey bizim üçün yaxşı olacaq.

CAVAD

48 yaşlı mütəxəssis “Kəpəz”dəki uğursuzluqlara görə bütün günahı özündə görüb-görmədiyi ilə bağlı sualı belə cavablandırıb: “Ümumiyyətlə, komandada bütün nəticələrə təbii ki, cavabdeh olan şəxs baş məşqçidir. Ona görə də məşqçi komandanın üzdə olan cavabdeh adamıdır. Hamı üçün maraqlı olan komandanın nəticəsidir. Nəticə hər bir işdə önəmlidir. Amma bəzən nəticəni qısa müddətdə qazanmaq mümkün olur, bəzən isə ən yaxşı futbolçular bir komandada toplaşsa belə, nəticə mümkünsüz olur. Ona görə çalışdığın komandada həmişə nəticə verməlisən”.

Şükürov azarkeşlərlə arasında yaşanan qalmaqaldan sonra rəhbərliklə görüşdüyünü də vurğulayıb: “Rəhbərliklə münasibətim yaxşıdır. Onlara uğurlar arzulayıram”.

Futbolinfo.az xəbər verir ki, hələlik klub gedənlərlə bağlı rəsmi açıqlama verməyib. Bununla belə, İdarə Heyətinin sədr müavini Erkin İbrahimov postundan öz istəyi ilə ayrıldığını təsdiqləyib. Tezliklə digər vidalarla bağlı da açıqlamaların veriləcəyi gözlənilir.

Növbə İlqar Nadiriyə də çatıb. Gəncə klubunun icraçı direktoru tezliklə postundan qovulacaq. “Kəpəz”də daha öncədən çalışan, yeni himayədarların səlahiyyətlərini əlindən alaraq postunda saxladığı funksioner bu dəfə kludan birdəfəlik uzaqlaşdırılacaq.

Ümumiyyətlə, “Kəpəz”də başverənlərin araşdırılmasına ehtiyac var. Əvvəlki heyətin tamamilə dağıdılması, yeni transferlər zamanı edilən “əməliyyatlar” üzə çıxdıqdan sonra daxili gərginlik yaranıb. Həm köhnələrin, həm də yenilərin “təmiz” işləməməsi aydınlaşdıqdan sonra qovulmalar sıralanıb.

Qarşıdakı həftədə daha gözlənilməz xəbərlər eşidəcəyik. Baş məşqçi Adil Şükürov postundan istefa versə, təəccüblənməməliyik. Çünki onu kluba qaytaranlar özü artıq kənardadır.

Yeni sponsorun gəlişi ilə ümidlənən gəncəlilər indi ötən günlərin həsrətini çəkməsə yaxşıdır. Daha yaxşı “Kəpəz” görməyi arzu edənlər daha miskin durumda olan kluba tamaşa etməkdədir. Hakimiyyət eşqində olanlar, büdcəni bölüşə bilməyənlər tarixi klubun süqutunu reallaşdırır.