– Üstündən bir neçə gün keçsə də, hələ də millimizin İsveçə böyükhesablı (0:6) məğlubiyyəti haqda danışılır. Ağır yenilginin səbəbi nə idi?

– Açıq şəkildə göründü ki, rəqibin oyunçuları bizim futbolçulardan daha hazırlıqlı idi. Üstəlik, millimiz tam əsas heyətlə çıxış etmirdi. Bu da böyükhesablı məğlubiyyətdə rol oynayan amillərdəndir. Çünki Azərbaycan yığması kimi komandalar maksimum dərəcədə əsas heyəti ilə oynamalıdır ki, bu cür məğlubiyyət qeydə alınmasın. Rəqibin gücünü də qeyd etməliyik.

– Həm son matçda, həm də Estoniya ilə Qəbələdəki görüşdə qapı xəttində Rza Cəfərov yer aldı. Onun çıxışı haqda nə deyə bilərsiniz? Yaxın gələcəkdə millinin əsas qolkiperi olmaq potensialı varmı?

– Rzanın hər iki görüşdə iştirakı müsbət məqamdır. Cəfərovun beynəlxalq təcrübəsi hələ kifayət qədər deyil. Amma belə oyunlarda həmin təcrübəni toplayacaq. Ümid edirəm ki, həm “Neftçi”nin, həm də millinin heyətində növbəti matçlarda da qapıda yer alacaq. Bu cür davam etsə, düşünürəm ki, onun üçün yaxşı olacaq. Çünki potensiallı qapıçıdır və gələcəkdə Azərbaycan millisinin “1 nömrəsi” ola bilər. Onu da əlavə edim ki, daha gənc olan, kifayət qədər keyfiyyətli qolkiperlərimiz də var. Bu isə 3-5 il ərzində millinin qapı xəttində yaxşı rəqabətin yaranacağından xəbər verir.

– Millətlər Liqasında D liqasına düşdük. Bu fiaskonun əsas günahkar(lar)ı kim(lər)dir?

– Bəli, D liqasına düşdük. Sözsüz ki, bu, xoşagəlməz hadisədir. “Cırtdan ölkələr”lə bir sırada olmaq üzücüdür. Lakin bu da bir mərhələdir. Zənnimcə, bu, dönüş nöqtəsi olacaq. Artıq irəliyə doğru addımlamağa başlamalıyıq.

– Millətlər Liqasında fiasko yaşayan yığmamızdan dünya çempionatının seçmə mərhələsində nə gözləyək?

– Millətlər Liqasında D liqasına yuvarlaşmışıqsa, dünya çempionatının seçmə mərhələsində qrupdan çıxmağı ancaq xəyal edə bilərik. Lakin D liqasına düşməyimiz bir təsadüf idi. Ümid edirəm ki, D liqasında keyfiyyətli futbol göstərərək yenidən C liqasına qayıdacağıq. Dünya çempionatının seçmə mərhələsindəki oyunumuzun da buna ümid verəcəyinə əminəm.

– Milli komandamızın nəticələrinin yaxşılaşması üçün çıxış yolunu nədə görürsünüz?

– Azərbaycan Premyer Liqasının rəqabətədayanıqlı çempionat olması vacibdir. Artıq aparıcı oyunçularımız, gənc futbolçularımız Avropanın müxtəlif klublarında çıxış etməlidirlər. Bu amillər əsas yığmamızın səviyyəsini kifayət qədər qaldıra bilər. Sözsüz ki, bu, 1-2 günün, ayın məsələsi deyil. Amma ən azından uğura apara biləcək istiqamət budur və bu istiqamət üzrə adekvat addımlar atmalıyıq.

ABBAS

Futbolinfo.az saytı xəbər verir ki, millimiz bu göstəriciyə görə, Avropanın ən zəifləri sırasındadır.

Fernandu Santuşun yetirmələri qitənin 53 komandası arasında cəmi 4 yığmanı qabaqlayıb. Belə ki, Finlandiya və Malta hərəyə 2 dəfə fərqlənibsə, Qazaxıstanla Andorra turnir zamanı rəqib qapılarına yol tapa bilməyiblər.

2024-25 mövsümündə ən çox qol vuran komanda isə İsveç olub. Skandinaviyalıların zirvəyə yüksəlməsində isə millimizin “əməyi danılmazdır”. İsveç yığması son turda məhz millimizi 6 dəfə məyus etməklə ümumi top fərqini 19-a çatdırıb və turnirin ən məhsuldar komandasına çevrilib.

O ki qaldı ən çox qol buraxanlara, Santuşun kollektivi bu sıralamada Avropanın “zirvəsindədir”. Millimiz keçirdiyi 6 matçda ümumilikdə 17 qol buraxıb ki, bu, ən “parlaq” göstəricidir. Yığmamızla birlikdə Bosniya və Herseqovina ən çox qol buraxan iki komandadan biridir.

Təcrübəli mütəxəssis milli komanda və klub məşqçiləri arasında daim ünsiyyətin olmasının tərəfdarıdır: “Futbol elə bir oyundur ki, tək məşqçi və futbolçulardan asılı deyil. Cəmdə klublardır və futbolçular da həmin klublardan gəlir. O klublara sual vermək lazımdır ki, verdiyiniz oyunçular yığmaya necə təsir edəcək? Niyə klublarda az çıxış edirlər? Öz futbolçularına görə cavabdeh olmalıdırlar. Klub və milli məşqçiləri arasında daim ünsiyyət olmalıdır. Futbolçu klubdan milliyə, eləcə də millidən kluba hansı vəziyyətdə gedir? Bu haqda danışmaq lazımdır. Bu da baş məşqçinin səhvidir ki, klublarda az oynayan futbolçuları milliyə dəvət edir. Amma belə baxanda kimi çağırsın? Axı onlardan artığı Azərbaycanda yoxdur. Bunlar zəncirvari bir-biri ilə əlaqədardır. Əgər futbolçular klubda az oynayırsa, millidə də zəif çıxış edəcək. Bəli, biz zəifik. Amma zəif də İsveçi, Estoniyanı yalnız ürəklə oynasa, məğlub edə bilər. Deməzdim hamısı ürəksiz oynayırdı, lakin Estoniya ilə matçlarda bacardığımız qədər ən yaxşısını göstərməli idik. İndi D Liqasına düşdük. Orada da bizim kimilər var. Amma onları da udmaq üçün indidən plan hazırlamaq lazımdır. Klublarımıza baxdıqda demək olar ki, heç birində mərkəz müdafiəçisi, dayaq yarımmüdafiəçisi, hücumçu mövqelərində yerlilər oynamır. Mən klubları günahlandırmıram. Özüm də klubda işləmişəm. Amma klub rəhbərləri, məşqçilər fikirləşməlidir ki, heç olmasa, 1-2 Azərbaycan uşağını yaxşı hazırlasınlar. Yoxsa daha pis faciə olacaq”.

Mircavadov Fernandu Santuşun 2028-ci ilə qədər hər şeyi düzəldəcəyi fikrinə də münasibət bildirib: “Santuş hər şeyi düzəldəcəyini deyib. Mənə maraqlıdır ki, bunu kimlə edəcək? Elə bu gün millidə çıxış edən oyunçuların çoxunun 22-23 yaşı var. 4 il sonra da onlar olacaq. Əgər onlar bu yaşda “açılmayıbsa”, 4 il sonra da “açılan deyillər”. Lakin bu uşaqlar Avropa klublarında oynasalar, inkişaf ola bilər. Vallah, mən gürcülərə həsəd aparıram. U-21 milliləri Avropa Çempionatının finalına çıxıblar. Gürcüstan millisinin heyətindəki 26 nəfərin 23-ü xaricdə çıxış edir. Niyə bizdə eyni hal yaşanmır? Belə oyunla heç millimizin D Liqasında 6-7 xal qazanacağına inanmıram. Təşkilatçılıq AFFA-nın üzərindədir. Onlar da daim futbol adamları ilə bu barədə ünsiyyətdə olmalıdır. Digər əsas problemimiz isə meydançalarımızdır. Demək olar ki, bölgələrimizdə stadion yoxdur. Ən azından hazırda əllərində olan Lənkəran, İmişli stadionlarını təmir etmək lazımdır. Hər klubun öz stadionu olmalıdıdır. Əgər bir yaş qrupu digər yaş qrupunun vaxtına girməmək üçün meydançadan tez çıxır, bundan nə olacaq? Günə saatyarım məşqlə nə edə biləcəklər? Ona görə uşaqlar akademiyalarda qalmalıdırlar. Necə ki, əvvəl “Qəbələ”nin akademiyasında var idi. Şəxsən mən xaricdən legioner gətirib milliləşdirməyə razı deyiləm. Çünki onda vətən, millət sevgisi olmayacaq. Son olaraq onu demək istəyirəm ki, uşaqlara futbolu sevdirmək lazımdır. Oyunçunun topa sevgisi olmalıdır. O bilməlidir ki, futbolu sevir, oynamaq istəyir. Başqa dilləri öyrənib, xaricə gedib, özünü inkişaf etdirməsinə şərait yaradılmalıdır”.

GÜNAY SÜLEYMANOVA

Yankoviç kapitan kimi əsas heyətdə yer alıb və sonadək meydanda olub. O, 22-ci dəqiqədə sarı vərəqə alıb. Monteneqronun 3:1 hesablı qələbəsi ilə yekunlaşan görüşdə Marko 2-ci qolun ötürməsini verib. Kuça gəlincə, 31 yaşlı futbolçu ehtiyat oyunçular sırasında yer alıb. O, 69-cu dəqiqədə Milan Vukotiçin əvəzinə meydana daxil olub.

Azərbaycan millisinin keçmiş baş məşqçisi Robert Prosineçkinin rəhbərlik etdiyi Monteneqro millisi üçün bu, qrupda ilk qələbə və ilk xallar olub. Onlar qrupu sonuncu yerdə tamamlamaqla C liqasına düşüblər. Türkiyə isə yarışı 11 xalla 2-ci yerdə başa vurub. Bu qrupdan A liqasında 12 xal yığan Uels yüksəlib.

– Millətlər Liqasında bu mövsüm Estoniya ilə keçirdiyimiz ikinci görüşdən də qələbə ilə ayrıla bilmədik. Qalibiyyət üçün nə çatışmadı?

– Əslində, oyun baxımından üstünlük bizim millinin tərəfində oldu. Oyuna və topa nəzarət tamamilə Azərbaycan yığmasının tərəfində idi. Real qol imkanları da əldə etdik. Sadəcə, epizodları məntiqi sonluğa çatdıra bilmədik. Məhz bu amil qələbəyə mane oldu. Rəqibin müdafiədən oynayacağı bəlli idi. Bunu eston futbolçuların matçöncəsi açıqlamalarından da anlamaq olurdu. Bizim futbolçular da bunu bilirdilər. Əfsuslar olsun ki, buna rəğmən, yenə də qalib gəlmək mümkün olmadı.

– Millətlər Liqasının cari mövsümündə 5 oyunda cəmi 1 xal qazanmışıq. Bu qədər uğursuz çıxış yəqin ki, sizin üçün də gözlənilməz oldu…

– Belə olacağını heç gözləmirdim. Ümid edirdim ki, ev oyunlarında bütün rəqiblərdən xallar ala biləcəyik. Ancaq əksini gördük.

– Qrupdakı son matçımızı bu gün səfərdə İsveç yığmasına qarşı keçirəcəyik. Evdə uduzduğumuz komanda ilə səfər görüşündə sensasiya etməyə gücümüz çatacaq?

– İsveçlə oyun bu mövsüm Millətlər Liqasında son matçdır. Komandamız bu görüşə rahat çıxmalıdır. Futbolçuların üzərindən təzyiqi götürmək lazımdır. Onlar turnir cədvəlini yaddan çıxartmalı və futboldan zövq almaq üçün oynamalıdırlar. Təbii ki, bunu məşqçinin verdiyi tapşırıqları yerinə yetirmək və taktikadan, strategiyadan çıxmamaq şərtilə etməlidirlər. Düşünürəm ki, bu halda milli İsveçdə yaxşı nəticəyə imza ata bilər.

– Fernandu Santuş Azərbaycana millimizi Millətlər Liqasında D liqasına düşürmək üçün gətirilmişdi?

– Yığmamızın C liqasından düşməmək üçün az da olsa, şansı qalıb. Bunun üçün mütləq səfərdə İsveçə qalib gəlmək lazımdır. D liqasına düşmək çox məyusedici olar.

– Hazırkı gedişat Santuşun səhv seçim olduğunu təsdiqləmir?

– Məşqçi seçimini AFFA edir. Şəxsən mənə görə, Santuşun gəlişindən sonra komandanın hücum xəttində inkişaf var. Bunu oyunlara əsasən deyirəm. Millimiz indi daha çox hücum edir. Digər tərəfdən, müdafiədə ciddi problemlər var.

ABBAS

C Liqasında 1-ci qrupda yer alan Azərbaycan yığması İsveçin qonağı olacaqsa, Türkiyə millisi A Liqasına vəsiqə uğrunda Monteneqro ilə qarşılaşacaq. “Ay-ulduzlular”a mərhələ adlamaq üçün bir xal da kifayət edir.

Almaniya və Niderlandın səfər oyunlarına çıxdığı gün əsas diqqət B Liqasının 1-ci qrupuna yönəlib. Burada bütün komandalar şansını son tura kimi saxlaya bilib.

UEFA Millətlər Liqası, 6-cı tur

A Liqası

3-cü qrup

23:45. Bosniya və Herseqovina – Niderland

23:45. Macarıstan – Almaniya

Xal: Almaniya – 13, Niderland – 8, Macarıstan – 5, Bosniya və Herseqovina – 1.

B Liqası

1-ci qrup

23:45. Albaniya – Ukrayna

23:45. Çexiya – Gürcüstan

Xal: Çexiya – 8, Gürcüstan – 7, Albaniya – 7, Ukrayna – 5.

4-cü qrup

23:45. Monteneqro – Türkiyə

23:45. İslandiya – Uels

Xal: Türkiyə – 11, Uels – 9, İslandiya – 7, Monteneqro – 0.

C Liqası

1-ci qrup

23:45. Slovakiya – Estoniya

23:45. İsveç – Azərbaycan

Xal: İsveç – 13, Slovakiya – 10, Estoniya – 4, Azərbaycan – 1.

D Liqası

2-ci qrup

23:45. Malta – Andorra

Xal: Moldova – 9, Malta – 6, Andorra – 0.

Futbolinfo.az xəbər verir ki, C Liqasında mübarizə aparan yığmamız 1-ci qrupdakı altıncı oyununda İsveçin qonağı olacaq.

Solna şəhərində təşkil olunacaq görüşə Bakı vaxtı ilə saat 23:45-də start veriləcək. Qarşılaşmanı polşalı FIFA referisi Pavel Raçkovski idarə edəcək.

Yığmamız UEFA Millətlər Liqasının cari mövsümündə yalnız bir heç-heçə edib, qalan dörd oyununda uduzub. 1 xalla qrup sonuncusu olan yığmamızın mərhələni elə bu pillədə başa vuracağı dəqiqdir. Amma komandamız hələ D Liqasına düşməmək şanslarını qoruyur. Bunun üçün Fernando Santuşun kollektivi səfərdə İsveçə qalib gəlməlidir. Belə olan halda yığmamız C Liqasında qalmaq üçün pley-off oyunlarında iştirak hüququ qazana bilər.

UEFA Millətlər Liqası
C Liqası, 1-ci qrup
19 noyabr

23:45. İsveç – Azərbaycan
Baş hakim: Pavel Raçkovski (Polşa).
Solna. “Strauberri Arena”.

Bu material “Misli”nin dəstəyi ilə hazırlanıb

Komanda yarışın 6-cı turunda Norveçə 0:5 hesabı ilə uduzub. Nəticədə Qazaxıstan yığmasının cari Millətlər Liqasında buraxdığı qolların sayı 15-ə çatıb. Bu isə turnir tarixinin antirekordudur.

Belə ki, Qazaxıstan millisi cari mövsümdə keçirdiyi 6 oyunda heç bir qələbə qazana bilməyib. Komanda 1 dəfə heç-heçə edib, 5 dəfə isə məğlubiyyətlə üzləşib. Bütün görüşlərin nəticələrinə əsasən, Qazaxıstan komandası B divizionundan aşağı liqaya – C Liqasına düşüb.

Sabah İsveçlə qarşılaşacaq yığmamızın da beləaqibətlə üzləşməsi realdır.

Hələ o ayrı söhbətdir ki, Canni de Byazinin başçılığı altında estonlardan 4 xal almışdıq. Fernandu Santuşun komandası isə 4 xalı estonlara verdi. Hətta irəli gedib “hədiyyə etdi” də yazmaq olar. Çünki Tallində buraxdığımız qollar rəqib üçün sadəcə, bəxşiş idi. Evdə onları məğlub edə bilməməklə D divizionuna yolumuz açıldı. İndi belə bir komandanın qrupu lider başa vurmaq istəyən İsveçlə səfərdə hansı şanslarından danışmaq olar?! Evdə Estoniya seçməsinə qol vura bilməyən, ümumiyyətlə 2 oyunda estonların qapısından yalnız 1 top keçirən (onu da penalti ilə) bir komanda hazırda yüksəlişdə olan skandinavlara nə edə bilər ki?!

Hər nə qədər xoş olmasa da, “İsveçə qarşı necə oynamaq lazımdır” araşdırması suyun üzərində gəzmək imkan(sızlığ)ına bənzəyir. Biz hətta bu suda üzə belə bilmərik, o ki qala gəzməyə. Milli üzvləri nə edər, nə etməz – bu, onların öz işidir. Amma biz rəqibi təhlil etmək öhdəliyini üzərimizdən ata bilmərik.

Mətləbə keçməzdən əvvəl onu qeyd edək ki (əslində bunun özü də bir mətləbdir), sentyabrın 5-də Bakıda keçirilən oyunla müqayisədə Yon dal Tomassonun komandası çox artırıb. Bakıda komandamız penaltini də nəzərə alsaq, rəqibin qapısı qarşısında xeyli qol imkanı yaratdı. Bəlkə də İsveç qrupda ən çox qol vəziyyətini o matçda verdi. Amma həmin görüşdən sonra “vikinqlər”in oyununda əməlli-başlı yüksəliş oldu. Hələ onu demirik ki, ötən Avropa çempionatının seçmə mərhələsində Bakıda 3:0 hesabı ilə məğlub etdiyimiz yığma ilə müqayisədə bu komanda əməlli-başlı “qladiator”dur. Bizim zəifləməyimizin fonunda onların güclənməsi heç yerinə düşmədi. Yəni, Solnadakı matçda xal qazanmağımız bir kənara dursun, darmadağın olunmamağımız üçün dua etməliyik. Son turda Slovakiya ilə matçda hər hissənin əvvəlində vurduğu qollarla qalib gələrək qrupda liderliyi ələ alan Tomassonun komandası bizim işimizi ümumiyyətlə ilk hissədə bitirməyə çalışacaq.

Bakıda 4-2-3-1 sxeminə üstünlük verən Tomasson həmin görüşdən sonra taktikanı dəyişmək məcburiyyətində qaldı. Hər halda, autsayderlə görüşdə bu qədər çətinliklə üzləşəndən sonra slovaklarla ümumiyyətlə bacarmaq mümkün olmayacaqdı. Nəticədə Tomasson 3-5-2 taktiki düzülüşünə bel bağladı və bunun faydasını gördü. Doğrudur, Avropa çempionatının 1/8 finalçısına qarşı keçirdikləri iki oyunda qapılarında 3 top gördülər. Amma istənilən halda, slovaklardan  4 xal qopara bildilər. Estonlara qarşı keçirdikləri 2 oyunda isə ümumiyyətlə qapılarında top görmədilər.

Bu o deməkdir ki, bu komanda hazırda müdafiədə də etibarlıdır. Amma bizimlə oyun ərəfəsində müəyyən problemlərlə üzləşiblər. Belə ki, slovaklarla görüşdə “Atalanta”nın üzvü İsak Heyn cəzalı vəziyyətə düşdüsə, “Mançester Yunayted”in arxa xətt oyunçusu Viktor Lindelöf zədələnərək meydanı tərk etdi. Onun bizə qarşı meydana çıxması inandırıcı görünmür. Lap sağalsa belə, bu səviyyədə oyunçunu autsayder komandaya qarşı görüşdə odun içinə atmağa risk etməzlər. Amma Tomassonun əlinin altında “Selta”da çıxış edən Karl Starfelt və “Malmö”də oynayan Nils Zatterström kimi müdafiəçilər var. Müdafiədə “3-lü halqa”nın daha bir üzvü olan Qabriel Qudmundssonla bağlı isə heç bir problem yoxdur. Onun bizə qarşı meydana çıxacağına şübhə yoxdur. Onları narahat etmək üçün yalnız cinahlarda fəallığı artırmalıyıq. Çünki cinalara təhkim olunan AEK-li Niklas Eliassonla “Uotford”lu Ken Sema irəli atılarkən arxanı boş qoyurlar. Nəzərə alaq ki, Semadan fərqli Eliasson heç müdafiəçi də deyil. Ona görə də biz sol cinahdan fəallığı artırmalıyıq. Slovaklar da buna cəhd edirdi, sadəcə, bitiricilkdə problem yaşayırdılar.

Mərkəz yarımmüdafiəçiləri fiziki cəhətdən çox möhkəmdir. Təkcə “Tottenhem”dən tanıdığımız Deyan Kuluşevskinin adı kifayətdir. Doğrudur, o, hazırda özünə doğma olan mövqedə oynamır.  Məsələn, Slovakiya ilə oyunda Lobotka ilə Duda ona göz açmağa imkan vermirdi. Amma Azərbaycanla görüşdə bizdən kim onun əl-qolunu bağlaya bilər ki?  Nəzərə alaq ki, “Brayton”la Yassin Ayari ilə AİK-dən Anton Saletros da döyüşkənliyi ilə seçilən oyunçulardır. Cinahlar da onlara dəstək olanda problem problem üstünə gəlir.

Bizim üçün ən böyük kabus hücumun sivri ucunda qərarlaşan “Nyukasl”ın ulduzu Aleksander İsakla “Sportinq”in göz bəbəyi Viktor Dyökereşdir. Bu iki oyunçu bir-birini gözüyümulu başa düşür. Slovakiyanı elə bu duet bitirdi. Həm qol vurdular, həm də məhsuldar ötürmə müəllifi oldular. Arxaya çəkilib zərgər dəqiqliyi ilə ötürmələrlə rəqib müdafiəsini iflic vəziyyətinə salırlar. Mümkün qədər onlar arasında koridoru bağlamaq lazımdır. Santuş onların Slovakiyaya vurduğu ilk qolu bizim futbolçulara göstərib çarə tapmalıdır. Hələ eyni epizodu sonra yenə yaxaladılar.  Sadəcə, Dyökereş Dubravkanı keçə bilmədi.

İsveçin mənfi və müsbət cəhətlərindən çox danışmaq olar. Məsələ ondadır ki, qarşılarına çıxarmağa heç kimimiz yoxdur. Hətta de Byazinin dövründə qismən normal oynayan millimiz belə İsveçdə qapısında 5 top görmüşdü. Hələ onda skandinavlar indiki kimi parlaq oynamırdılar. Heç olmasa, millimiz C divizionundan darmadağınla yola salınmasın. Santuşun Portuqaliyaya qazandırdığı Avropa çempionluğundan ayıbdır…

Azərbaycan – İsveç rəqabəti:

1. 02.09.2000. Bakı. DÇ, seçmə mərhələ. Azərbaycan – İsveç 0:1

2. 07.10.2001. Stokholm. DÇ, seçmə mərhələ. İsveç – Azərbaycan 3:0

3. 27.03.2023. Stokholm. AÇ, seçmə mərhələ. İsveç – Azərbaycan 5:0

4. 16.11.2023. Bakı. AÇ, seçmə mərhələ. Azərbaycan – İsveç 3:0

5. 05.09.2024. Bakı. Millətlər Liqası. Azərbaycan – İsveç 1:3

FƏRİD

Millinin sabiq kapitanı, hazırda baş məşqçinin köməkçisi olan Adam Şalai huşunu itirib. Həkimlərin ilkin müdaxiləsindən sonra veteran futbolçu xəstəxanaya çatdırılıb. Onun vəziyyətinin sabit olduğu bildirilir.

Qeyd edək ki, oyun Niderland millisinin 4:0 hesablı qələbəsi ilə başa çatıb.