Yevlaxlıların arzuları elə öz gözləri önündə puç olur. Şəhərin komandası son pillədə ikən stadionunu bölüşdüyü “Kəpəz” xeyli irəli gedib. Dünən isə bu meydanda “Qəbələ” qələbə qazanaraq xal fərqini 11-ə qaldırdı. İndiyədək cəmi 8 xal qazana bilmiş autsayderin 8 oyuna bu fərqi aradan qaldırması mümkünsüzdür. Riyazi cəhətdən şans var – lakin elə yalnız riyazi cəhətdən…

“Kəpəz” dünən qələbə qazansaydı, Premyer Liqada qalmaq problemini böyük ölçüdə həll edəcəkdi. Hətta heç-heçə də gəncəlilərin pley-offdan qaçmasına yardım edə bilərdi. Amma “Qəbələ” toparlanmağı bacardı. Səfər oyununda qazanılan layiqli qələbə bölgə təmsilçisinin son pillədən uzaqlaşmasına, digər əsas rəqbləri irəli buraxmamasına kömək etdi. Növbəti turlarda əsas mübarizə 11-ci olmamaq uğrunda gedəcək. Kaxaber Sxadadzenn yetirmələri növbəti həftə “İmişli”ni yenə bilsə, bu rəqibini də həyəcanın içinə çəkəcək. “Karvan-Yevlax” – “Kəpəz” oyunu da çox suala aydınlıq gətirəcək.

Ardıcıl 10 oyundur qələbə görməyən “Sumqayıt” isə tezliklə 7-ci pilləni də əldən verə bilər. “Kimyaçılar” qitə yarışlarına vəsiqə verən pillədən 10 xal geridədir. Dünənki məğlubiyyətlə daha bir əsas rəqibindən xeyli geri düşən komandada xaos hökm sürür. Baş məşqçi Saşa İliçin oyunçuları hədəf göstərməsi, konkret adlar çəkərək danışması vəziyyətin ümidsiz olmasının xəbərçisidir. Qarşılıqlı inamı olmadığı mühitdə isə uğursuzluq qaçılmazdır.

Əvəzində “Neftçi” vəziyyətini xeyli yaxşılaşdırıb. Sumqayıtda qazanılan inamlı qələbə bakılıların avrokubok ümidini artırıb. Düzdür, qarşıda çətin oyunlar və öndəkilərlə xal fərqi var. Amma Yuri Vernidubun yetirmələri dünənki kimi oynamağa davam etsə, heç nə mümkünsüz deyil. Növbəti turda “Araz-Naxçıvan”ı məğlub etmək alınsa, bu komandanın ümidləri də azalacaq və 3-4-cü pillələr uğrunda mübarizədə cəmi iki rəqib qalacaq.

FƏRİD

– Dünən Azərbaycan Kubokunun ¼ finalında “Sabah”la səfərdə heç-heçə etdiniz. Bu nəticədən razısınız?

– Bəli, bu iki oyunluq qarşılaşmadır və biz yaxşı nəticə əldə etməli idik. Çünki cavab oyununu evdə keçirəcəyik və evdə daha güclüyük.

– Cavab görüşünü evdə oynayacağınız üçün özünüzü daha üstün sayırsınız?

– Bəli, əvvəl də dediyim kimi, düşünürəm ki, biz evdə daha güclü komandayıq. Qarşımızda çox güclü rəqibin olduğunu bilirik, amma mərhələni keçmək üçün kifayət qədər şansımızın olacağına inanıram.

– “Qəbələ” mövsümün ikinci yarısına uğurlu başlayıb: 3 oyunda 2 qələbə, 1 heç-heçə. Bunun sirri nədədir?

– Gündəlik iş və komanda olmaq. Heyətdə çoxlu yeni futbolçular var idi, amma indi getdikcə bir-birimizi daha yaxşı tanıyırıq və bu da meydanda özünü göstərir.

– Çempionat oyunlarında 2 matça 7 qol vurmusunuz. Sanki hücum xətti daha da güclənib. Bununla razılaşırsınız?

– Çox yaxşı transferlər etmişik. Amma hələ görüləsi çox iş var. Çalışmağa davam etməliyik.

– “Sabah”la ağır kubok oyunundan sonra “Neftçi” ilə səfərdə çətin çempionat qarşılaşması var. Orada da xal qazana biləcəyinizi düşünürsünüz?

– Düşünürəm ki, hazırda çox yaxşı formadayıq və bu mümkündür. Futboldur, meydanda 11-in 11-ə qarşı mübarizəsi gedir, hər şey baş verə bilər.

– Sonuncu pillədən 8 xal öndəsiniz. Bu, sizə müəyyən rahatlıq verir və bu inam komandanın daha yaxşı oynamasına kömək edir?

– Bizim üçün əsas olan hər gün işimizi davam etdirmək və bu cür yaxşı nəticələr qazanmağı sürdürməkdir. Ən vacib məqam da budur.

FƏRİD

Futbolinfo.az saytının məlumatına görə, bölgə təmsilçisi qış transfer dönəmində heyətini gücləndirməkdə davam edəcək.

Baş məşqçi Kaxaber Sxadadzenin hədəfindəki daha bir əcnəbi futbolçu müəyyənləşib. Belə ki, “Qəbələ” yarımmüdafiənin mərkəzini Zambiya millisinin üzvü Emmanuel Banda ilə gücləndirmək niyyətindədir. İsrailin “Makkabi” (Bney Reyne) klubunda çıxış edən 28 yaşlı oyunçu ilə danışıqlar artıq müsbət yekunlaşmaq üzrədir. “Qəbələ” rəhbərliyi Bandanın transferini ən geci fevralın əvvəllərinə qədər yekunlaşdırmağa çalışır.

Qeyd edək ki, Emmanuel Banda ötən yaydan “Makkabi” formasını geyinir. O, 2017-ci ildən bəri Zambiya yığmasının heyətində 37 oyun keçirib, 1 qol vurub.

Futbolinfo.az saytının məlumatına görə, 18 yaşlı qolkiper Premyer Liqanın digər klublarının maraq dairəsinə düşüb.

U-19 millimizin üzvünün keçidində xüsusilə “Qarabağ” maraqlıdır. Ağdam təmsilçisi onun gələcək perspektivinə böyük ümid bəsləyir. Ölkə çempionu Həbibi transfer edərək, onu müvəqqəti başqa kluba icarə verməyi düşünür. Lakin “Qəbələ” də oyunçusunu buraxmaq fikrindən uzaqdır.

Qeyd edək ki, “Qəbələ”nin yetirməsi olan Həbib Hüşənov ötən ilin yanvarından əsas komandaya cəlb olunur.

Futbolinfo.az saytının əldə etdiyi məlumata görə, “qırmızı-qaralar” 31 yaşlı İbrahim Sanqare ilə razılığa gəlib. Klubun adını gizli saxlamağa çalışdığı forvard komandanın düşərgəsinə qoşulub və məşqlərə start verib.

Peşəkar karyerası ərzində bir sıra klublarda forma geyinmiş Sanqare son mövsümü “Hapoel Hadera”da keçirib. O, həmçinin “Otelle Afien”, “Le Puy Foot”, “Orlean”, “Kretel”, “Oser” “Giresunspor” və “Menemenspor” kimi komandaların heyətində çıxış edib.

GÜNAY SÜLEYMANOVA

– I Liqanın son turunda “Qaradağ Lökbatan” üzərində 3:0 hesablı qələbə qazandınız və qollardan birinə siz imza atdınız. Halbuki autsayderə 1 saat ərzində qol vurmaqda çətinlik çəkdiniz. Oyunla bağlı fikirləriniz necədir?

– Bəli, 1 saat ərzində rəqib qapısına yol tapa bilmədik. Amma bu, futboldur və bəzən belə də olur. Bəzən heç gözləmədiyin halda meydanda çətinlik çəkirsən. Lakin ən vacib olan özünə güvənmək və heç vaxt təslim olmamaqdır. Biz də həvəsdən düşmədik. 1 saat ərzində qol vura bilməsək də, qalan dəqiqələrdə rəqibi 3 dəfə mərkəzə dəvət etdik.

– “Qəbələ” I Liqanı çempion kimi tamamladı və növbəti mövsüm yenidən Premyer Liqada iştirak edəcək. Yəqin ki, bu nəticə sizin üçün də gözlənilməz olmadı…

– Qətiyyən! Bu nəticə mənim üçün də sürpriz olmadı. Çünki biz mövsümə çox yaxşı hazırlaşmışdıq və nəhayət, istədiyimizə nail olduq. Buna görə Allaha şükür edirəm. Məqsədimiz Premyer Liqaya dönmək idi, onu da bacardıq.

– Növbəti mövsümdə də sizi “Qəbələ”nin heyətində görə biləcəyik? Yoxsa başqa komandalardan təkliflər almısınız və ayrılıq ehtimalınız var?

– Mən “Qəbələ”nin futbolçusuyam, klubla müqaviləm davam edir. Gələcəkdə necə olacağını heç kim təxmin edə bilməz. İnşallah, nə baş verəcəyini birlikdə görəcəyik.

– Sizcə, 1 illik aradan sonra Premyer Liqaya qayıdan “Qəbələ” yüksək dəstədə iddialı komandalardan ola biləcək?

– Yüz faiz əminəm ki, Premyer Liqada hər kəs “Qəbələ”ni güclü rəqib sayacaq. Biz istənilən komandaya qarşı oynamağa tam hazır olacağıq. Çünki biz yaxşı komandayıq. “Qəbələ” Premyer Liqa komandasıdır. Hər şeyi zaman göstərəcək. O vaxta qədər gözləyək.

– Sabiq komandanız “Kəpəz”in bu mövsümkü çıxışını necə dəyərləndirirsiniz? Gəncə klubunun növbəti sezonda daha iddialı olacağı gözlənilir. Bu barədə nə deyə bilərsiniz?

– Onların adına sevinirəm. Həqiqətən də, “Kəpəz” bu mövsüm yaxşı çıxış etdi və liqadakı yerini qorumağı bacardı. Komandanın növbəti sezondakı iddiası haqda isə indidən nəsə demək çətindir. Mövsümün startına qədər heç kim bu barədə dəqiq söz deyə bilməz. “Kəpəz”in iddiasının artıb-artmaması yeni sezon başlayandan sonra dəqiq bilinəcək. Sabiq komandama uğurlar arzulayıram.

ABBAS

32 yaşlı müdafiəçi “Cəbrayıl” ilə keçirilən oyun haqda da danışıb. O, qarşılaşmanı belə dəyərləndirib: “Çətin oyun oldu. Əvvəlcədən bilirdik ki, “Cəbrayıl” güclü komandadır. Əziyyət çəksək də, əsas odur ki, 2:0 hesabı ilə qalib gəldik. Xüsusilə müdafiədə etibarlı oynayaraq qol buraxmamağımız bizi sevindirir. Bundan başqa, “Karvan” ilə xal fərqimizi 4-ə çatdırmağımız müsbət məqamdır. Amma bu, bizi rahatlaşdırmır. 2 tur əvvələ qədər ikinci yerdə idik. Bundan sonra da nəticənin necə olacağını zaman göstərəcək. Məqsədimiz Premyer Liqaya yüksəlməkdir. Yalnız bu məqsədə çatdıqdan sonra rahat nəfəs ala bilərik”.

GÜNAY SÜLEYMANOVA

– Yenidən Azərbaycandasan. Özünü burada necə hiss edirsən?

– Allaha şükür edirəm. Ona görə ki, yenidən futbol oynamaq imkanım var. Bu, məni hədsiz sevindirir. Düzdür, “Qəbələ” Birinci Liqada mübarizə aparır. Amma burada səviyyə heç də pis deyil. Özümü bu klubda çox xoşbəxt hiss edirəm.

– Premyer Liqadan sonra aşağı səviyyəli çempionatda mübarizə aparmaq çətin gəlmir?

– Premyer Liqa ilə aşağı dəstə arasında böyük fərq var. Çünki orada böyük oyunçular mübarizə aparır. Amma bir futbolçu olaraq özünüzü hər yerdə tapa bilərsiniz. Bu, normal haldır. Premyer Liqada da, aşağı divizionda da oynamaq mümkündür. Amma mənə nə verildisə, ona sevinirəm. Həyatımın yeni mərhələsidir və bundan narazı deyiləm.

– “Kəpəz”dən ayrılanda problemlər yaşadınız. Nə baş vermişdi?

– Bu barədə çox danışmaq istəmirəm. Amma problem sağlamlıq vəziyyətim idi. İndi çox yaxşıyam.

– Amma Hepatit B virusuna görə klubdan ayrılmışdınız. Bu məsələ həll olundu?

– Dediyim kimi, hər şey qaydasına düşdü. Mən indi yenidən futbola qayıtmışam, futbol oynayıram. Özümü tamamilə futbola kökləmək niyyətindəyəm. Olan oldu, keçmişdə qaldı.

– Agentin bu barədə Azərbaycan mediasına danışmışdı. Onunla nə problem yaşamışdınız?

– Agentimlə hazırda heç bir problem yoxdur. Nəvaxtsa insanların etdiyi söz-söhbətə görə problem yaşamışdıq. Bunu yaxşı başa düşdük. İndi isə hər şey yaxşıdır. Aramızda heç bir problem, çətinlik yoxdur.

– “Qəbələ”dən təklifi necə aldınız?

– Dostumdan zəng gəldi. Dedi ki, “Qəbələ”dən təklif var. Mən də bu klubu tanıyırdım. Danışdıq, razılaşdıq və nəhayət bura gəldim. Həqiqətən özümü çox xoşbəxt hiss edirəm. “Qəbələ” kimi klubda çıxış etməkdən məmnunam.

– Azərbaycan Kubokunun 2-ci təsnifat mərhələsini adladınız. Növbəti mərhələdə rəqibiniz “Qarabağ”dır. Kubokda yolun sizin üçün bura qədər olduğunu demək olar?

– Futbolda hər şey mümkündür. “Qarabağ”la dəfələrlə qarşılaşmışam. Təbii ki, biz onlarla oyunda qazana bilərik. Bu, hər zaman mümkündür. Əlimizdən gələni edəcəyik ki, yaxşı nəticə qazanaq. Buna çalışacağıq.

– Səncə, “Qəbələ” yenidən Premyer Liqaya qayıda biləcək?

– Məqsədim komandama Premyer Liqaya yüksəlməkdə kömək etməkdir. Hər şey Allahın əlindədir. Amma mən komandama inanıram. Bundan daha yaxşı olacağıq.

FƏRİD

Müdafiəçi Azərbaycan Kubokunun II təsnifat mərhələsinində “Baku Sportinq”ə 4:0 hesabı ilə qalib gəldikləri matçda komandalarının çox yaxşı oyun göstərdiyini bildirib: “Hər şeydən öncə komandamızı təbrik edirəm. Dünən “Baku Sportinq”ə qarşı çox yaxşı oyun göstərdik. Qalib gəldiyimiz üçün sevinirik. Meydanda olmasam da, bunun heç bir fərqi yoxdur. Biz bir komandayıq və hər birimizə sıra ilə şans verilir. Məşqlərdə də hər kəsdən istifadə edilir. Kimin oynamasından çox komandanın qalibiyyəti bizim üçün önəm daşıyır. Növbəti mərhələdə rəqibimiz “Qarabağ”dır. Bizi maraqlı oyun gözləyir. Rəqibin gücü hər kəsə məlumdur. Amma çalışacağıq ki, öz evimizdə, azarkeşlərimiz önündə, bacardığımız qədər ən yaxşısını edək. Mənim üçün köhnə komandama qarşı oynamaq xoşdur. “Qarabağ”da yaxşı günlərim olub. Bu, mənə ikiqat motivasiya verir.  Hələ ki, vaxtımız var. İnşallah, həmin matça lazım olduğu kimi, var gücümüzlə hazırlaşacağıq”.

GÜNAY SÜLEYMANOVA

Futbolinfo.az PFL-in rəsmi saytına istinadən xəbər verir ki, 30 yaşlı braziliyalı müdafiəçinin yubileyi Misli Premyer Liqasının IX turuna təsadüf edib. Ruan “Turan Tovuz”la səfər matçına start heyətində çıxıb. O, Premyer Liqada  çıxdığı 100 oyunda 5 qol vurub.

Renato Azərbaycanda iki komandada forma geyinib. “Qəbələ”də 59 görüşdə 4 dəfə qola sevinən müdafiəçi “Zirə”də keçirdiyi 41 qarşılaşmada 1 dəfə fərqlənib.

Onun debütü 2021/22 mövsümünə təsadüf edib. Ruan 2021-ci il avqustun 15-də “Neftçi” – “Qəbələ” oyununda (2:2) şans qazanıb.

Qeyd edək ki, “Turan Tovuz” – “Zirə” görüşündə qərblilər 1:0 hesabı ilə qələbə qazanıblar.