Futbolinfo.az xəbər verir ki, Britaniya mətbuatı qarşılaşma öncəsi “Sabah” barədə geniş araşdırma aparıb.

Bildirilib ki, 2017-ci ildə təsis olunmasına baxmayaraq, bakılılar əhəmiyyətli investisiyalar, iddialı oyunçu cəlb etmə və uğurlu performans sayəsində “qızıl dubl” edib: “Bu da “Sabah”ın tarixi yüksəlişdə olduğunu göstərir. “Sabah” zəngin tarixi olmasa da, istənilən oyunun taleyini həll edə biləcək futbolçulara sahibdir. “Qarabağ”ın uzun müddətdir davam edən dominantlığına son qoyan komanda TNS üçün böyük təhlükə sayılmalıdır”.

Xəbərdə hətta “Sabah”ın transfer siyasətinə də diqqət yetirilib: “Bu klubun ambisiyaları transfer bazarında da öz əksini tapıb. “Sabah” təkcə cari yay transfer pəncərəsində təxminən 950 min avro xərcləyib. Son dörd mövsümdə isə ümumi transfer xərcləri təxminən 4,4 milyon avro təşkil edib. Bu investisiya Avropanın güclü liqalarından təcrübəli oyunçuları cəlb etmək imkanı verdi. Bir sözlə, TNS təkcə Azərbaycan çempionu ilə deyil, maliyyə imkanları və Avropa səhnəsində müntəzəm olaraq yarışmaq ambisiyası olan komanda ilə qarşılaşacaq”.

Britaniyalılar “Sabah”ın ən təhlükəli oyunçuları kimi Coy Lens Mikels, Aaron Maluda və Timoteuş Puxaçı göstəriblər.

Qeyd edək ki, “Sabah”la TNS arasında ilk oyun iyulun 7-də “Bank Respublika Arena”da keçiriləcək.

Futbolinfo.az xəbər verir ki, braziliyalı mərkəz müdafiəçisi karyerasını Rusiyada davam etdirəcək.

31 yaşlı oyunçu “Rostov”la anlaşıb. Azərbaycan çempionundan ayrılan Noqeyra Rusiya Premyer Liqa təmsilçisinə azad agent kimi keçib. Tərəflər müqavilənin şərtlərini artıq razılaşdırıblar və yalnız rəsmi sözləşməyə qol çəkmək qalıb.

Qeyd edək ki, İqor Noqeyra ötən mövsüm “Sabah”ın heyətində bütün turnirlərdə 36 oyuna çıxıb. Bakılılar onun vidasını rəsmən açıqlamayıb. Müqaviləsi bitən braziliyalıya yeni anlaşma təklif edilsə də, o, maliyyə şərtlərində endirimlə razılaşmadığından getmək qərarı verib.

Futbolinfo.az xəbər verir ki, xorvatiyalı mütəxəssis bundan sonra Litvada çalışacaq.

Belə ki, 51 yaşlı məşqçi “Jalgiris”in “sükanı arxasına” gətirilib. O, son bir il yarım ərzində Litva çempionuna rəhbərlik edən Eivinas Çerniauskası əvəzləyib.

Qeyd edək ki, Jelko Sopiç 2019-cu ilin noyabrından 2020-ci ilin iyuluna qədər “Sabah”ı çalışdırıb.

Futbolinfo.az xəbər verir ki, bu yay “Sumqayıt”ı “Tobol”a dəyişən 29 yaşlı əlcəzairli futbolçu Qazaxıstan mətbuatına açıqlamasında Pokatilovun “Sabah”ın ölkə çempionluğunda böyük rol oynadığını deyib: “Əgər Pokatilova belə ciddi klub etimad göstəribsə, deməli, buna layiqdir. Az adam bilir ki, “Sabah”ın rəhbərliyi kadrların inkişafına, infrastruktura və azarkeşlərlə münasibətlərə böyük sərmayə yatırır. Onların Azərbaycanda çox güclü nüfuzu və xüsusi aurası var. Məncə, Stas və “Qarabağ”ın qapıçısı Mateuş Koxalski Azərbaycanda çıxış edən ən güclü iki qapıçıdır”.

Qeyd edək ki, 33 yaşlı Stas Pokatilovun formasını geyindiyi “Sabah” geridə qalan mövsüm həm Misli Premyer Liqasının, həm də Azərbaycan Kubokunun qalibi olub.

Futbolinfo.az xəbər verir ki, 36 yaşlı forvardın fikrincə, gənc mərkəz müdafiəçisi “Kayzer Çiffs”i Azərbaycan çempionuna dəyişməklə doğru addım atıb. Cənubi Afrika Respublikasında əksəriyyət bu keçidi birmənalı qarşılamasa da, Ndlovu 22 yaşlı oyunçunun “Sabah”ın heyətində daha da parlayacağına inandığını söyləyib.

O, “Soccer Laduma” nəşrinə açıqlamasında Misli Premyer Liqası barədə müsbət fikirlər səsləndirib: “Onun səhv seçim etdiyini deməzdim. İlk növbədə insanların düşündüyünün əksinə olaraq, o, doğru liqaya gedib. Azərbaycan çempionatı inkişaf edir. Oraya Braziliya və Portuqaliyadan yaxşı oyunçular gətirilir. Azərbaycan çempionatının texniki səviyyəsi bir çoxunun düşündüyündən daha yüksəkdir”.

Qeyd edək ki, Eyden Makkarti “Sabah”la 3+1 illik müqavilə bağlayıb.

Futbolinfo.az xəbər verir ki, tunisli mütəxəssisin fikrincə, bu keçid 22 yaşlı müdafiəçi üçün müsbət, “Kayzer Çifs” üçün isə mənfi haldır.

Məşqçi hesab edir ki, mərkəz müdafiəçisi “Sabah”ın heyətində avrokuboklarda iştirak etməklə daha da inkişaf edəcək. Lakin “Kayzer Çifs” onun kimi oyunçu tapa bilməyəcək: “Ayden ötən mövsüm oyunların 70 faizindən çoxunda iştirak etdi və komandanın ən yaxşı müdafiəçilərindən oldu. Klub indi onun kimi müdafiəçini itirdi. Eydeni əvəzləmək asan olmayacaq. Məncə, futbolçunun “Kayzer Çifs”dən ayrılmasının səbəblərindən biri də komandanın heyətinin xeyli zəifləməsi və rəqabətə davamlı kollektivin olmamasıdır”.

Qeyd edək ki, Eyden Makkarti “Sabah”la 3+1 illik müqavilə bağlayıb.

Futbolinfo.az xəbər verir ki, Britaniya mətbuatı bunu iki ölkə arasındakı uzun məsafə ilə əlaqələndirib.

Bildirilib ki, ardıcıl 5-ci, ümumilikdə isə rekord sayda – 18-ci dəfə Uels çempionu olan TNS ilk çempionluğunu qazanan “Sabah”ın gücündən çox yorucu yolçuluqdan narahatdır: “Düzdür, “Sabah” bu mövsüm Azərbaycanda “Qarabağ”ın hegemonluğuna son qoydu. Lakin bu komandanın böyük avrokubok təcrübəsi yoxdur. Lakin əvvəlcə Azərbaycana səfər etmək və ardından uzun yolu qayıdaraq evdə rəqiblə qarşılaşmaq çətinlik yarada bilər”.

Qeyd edək ki, “Sabah” TNS-lə ilk oyununu iyulun 7-də və ya 8-də evdə, cavab görüşünü isə bir həftə sonra səfərdə keçirəcək.

“Sabah”ın qarşısında tarixi fürsət

Çempionlar Liqasının I təsnifat mərhələsi: TNS (Uels)

Püşk “Sabah” üçün mümkün variantlar arasında ən münasiblərdən birini gətirib. TNS Uels futbolunun son illərdəki dominant komandası sayılsa da, bu klubun avrokuboklarda ciddi uğurları yoxdur. Komanda əsasən ölkədaxili yarışlarda üstünlük nümayiş etdirir və Avropa səhnəsində daha güclü rəqiblərlə qarşılaşanda çətinlik yaşayır.

“Sabah” isə son illərdə Azərbaycan futbolunda sabit inkişaf yolu keçib. Komandanın heyətində legionerlərin sayı kifayət qədərdir. Klubun maliyyə imkanları, infrastruktur bazası və çempionatın səviyyəsi də TNS ilə müqayisədə üstün görünür. Bu baxımdan “Sabah”ın ilk mərhələni keçməsi normal nəticə kimi qəbul edilməlidir.

Çempionlar Liqasının II təsnifat mərhələsində mümkün rəqiblər: Vardar (Şimali Makedoniya) – KuPS (Finlandiya)

Bu cütdə favorit kimi “KuPS” göstərilsə də, hər iki komanda “Sabah”ın keçə biləcəyi rəqiblər sırasındadır. “Vardar” Balkan futbolunun tanınmış adlarından biri olsa da, klub son illərdə əvvəlki gücünü itirib. Bir vaxtlar Avropa Liqasının qrup mərhələsinə yüksələn şimali makedoniyalılar hazırda həmin səviyyədən uzaq görünürlər.

“KuPS” daha oturuşmuş və nizamlı komandadır. Finlandiya futbolu son illərdə müəyyən inkişaf göstərsə də, “KuPS”un heyəti Avropa miqyasında elit və ya yüksək səviyyəli hesab edilmir. “Sabah” ilk mərhələni uğurla keçərsə, bu rəqiblərə qarşı da şanslarını ən azı bərabər qiymətləndirmək mümkündür. Doğrudur, “KuPS” “Sabah”la müqayisədə avrokuboklarda əsas mərhələyə qədər yüksələ bilib, amma “Qarabağ”ı üstələyib çempion olan komanda üçün finlər problem olmamalıdır.

Konfrans Liqasının II təsnifat mərhələsində mümkün rəqiblər: Flora (Estoniya) – İberiya 1999 (Gürcüstan)

Çempionlar Liqasındakı uğursuzluq ssenarisində belə, “Sabah” üçün yol tam bağlanmır. “Flora” Baltik regionunun ən təcrübəli klublarından biri sayılsa da, Avropada çox uzağa gedə bilməyən komandadır. “İberiya 1999” isə Gürcüstan futbolunun yüksələn komandalarından biridir. Bununla belə, nə “Flora”, nə də “İberiya 1999” Azərbaycan təmsilçisi üçün qorxulu rəqib təsiri bağışlayır. Mövcud heyət potensialı ilə “Sabah” hər iki komanda üzərində üstünlük qurmağa qadirdir.

“Qarabağ” üçün ideal ssenari

Avropa Liqasının I təsnifat mərhələsi: Vestri (İslandiya)

Azərbaycan klubları arasında ən uğurlu püşk bəlkə də “Qarabağ”a qismət olub. “Vestri” Avropa futbolunda ciddi çəkisi olmayan komandadır. İslandiya futbolunun müəyyən inkişafı danılmazdır, lakin “Vestri” nə heyət keyfiyyətinə, nə də beynəlxalq təcrübəyə görə “Qarabağ”la müqayisə oluna bilər. İslandiyanın I Liqasında oynayırlar, nədən qorxuruq?

Qurban Qurbanovun komandası  hər il avrokubokların qrup mərhələsində oynayır, ötən mövsüm Çempionlar Liqasının əsas mərhələsində belə uğurlu çıxış edərək pley-offa yüksəlib. Belə təcrübəyə malik kollektiv üçün “Vestri” səddinin aşılması formal xarakter daşımalıdır. Bu cütdə “Qarabağ”ın favoritliyi müzakirə mövzusu belə deyil.

Avropa Liqasının II təsnifat mərhələsində mümkün rəqiblər: ÇSKA Sofiya (Bolqarıstan) – Derri Siti (İrlandiya)

Bu mərhələdə müəyyən çətinliklər yarana bilər. Xüsusilə ÇSKA (Sofiya) adı müəyyən ehtiyatlılıq tələb edir. Bolqarıstan təmsilçisi zəngin tarixə malik olsa da, son illərdə Avropada ciddi nəticələr qazana bilməyib. Klubun əvvəlki nüfuzu ilə hazırkı gücü arasında böyük fərq var.

“Derri Siti” isə döyüşkən kollektiv kimi tanınır, lakin fərdi keyfiyyət baxımından “Qarabağ”dan geri qalır. Hər iki halda Azərbaycan çempionunun üstün tərəf olması şübhə doğurmur. Son illərdə Avropa nəhəngləri ilə oynayan və bəzən onları məğlub edən “Qarabağ” üçün bu komandalar maneə hesab edilə bilməz.

Konfrans Liqasında mümkün rəqiblər: Qlentoran (Şimali İrlandiya) – RFŞ (Latviya)

Burada ən çətin variant RFŞ sayıla bilər. Latviya klubu son mövsümlərdə müəyyən irəliləyiş əldə edib və avrokuboklarda diqqət çəkən nəticələr göstərib. Bununla belə, “Qarabağ”ın təcrübəsi, oyun sistemi və heyət keyfiyyəti RFŞ-dən də üstündür. “Qlentoran” isə daha münasib rəqib hesab olunur. Ümumilikdə “Qarabağ”ın yolu kifayət qədər açıq görünür.

“Neftçi” üçün münasib başlanğıc

Konfrans Liqasının II təsnifat mərhələsində mümkün rəqiblər: Dinamo Minsk (Belarus) – Sileks (Şimali Makedoniya)

İkinci mərhələdən mübrizəyə başlayacaq “Neftçi” üçün püşk qənaətbəxş sayıla bilər. Potensial rəqiblər arasında ən ciddi variant Minsk “Dinamo”sudur. Belarus çempionatı son illərdə müəyyən rəqabət qabiliyyətini qoruyub saxlayır və “Dinamo” avrokubok təcrübəsinə malik komandadır.

Bununla belə, “Neftçi” heyət dəyəri, futbolçu potensialı və avrokubok təcrübəsi baxımından rəqiblərindən geri qalmır. Əksinə, komanda optimal formasını tapsa, “Dinamo” üzərində də favorit ola bilər. Nəzərə alaq ki, Yuri Vernidub Soliqorsk “Şaxtyor”unu çempion edən adam kimi “Dinamo”nu 5 barmağı kimi tanıyır.

“Sileks” isə kağız üzərində daha münasib variantdır. Şimali Makedoniya klubu avrokubokların daimi iştirakçısı deyil və “ağ-qaralar” belə rəqibi keçməyə borcludur.

“Zirə”nin də şansları yüksəkdir

Konfrans Liqasının I təsnifat mərhələsi: Torpedo (Kutaisi, Gürcüstan)

İlk baxışdan “Zirə” üçün ən çətin püşk məhz bu görünə bilər. “Torpedo” Gürcüstanın köklü klublarından biridir və son illərdə ölkə futbolunun inkişafı fonunda müəyyən irəliləyiş əldə edib.

Ancaq “Zirə” artıq avrokubokların təcrübəsiz komandası deyil. Komanda ötən mövsümlərdə Avropa səhnəsində kifayət qədər vacib oyunlar keçirib. Rəşad Sadıqovun rəhbərliyi altında formalaşan sistemli oyun üslubu “Zirə”yə belə rəqiblərə qarşı üstünlük qazandıra bilər. Bu cütdə balans bərabərə yaxın olsa da, Azərbaycan klubunun şansları daha yüksək görünür.

Konfrans Liqasının II təsnifat mərhələsində mümkün rəqiblər: Hegelmann (Litva) – Payde (Estoniya)

Əgər “Zirə” ilk mərhələni keçərsə, növbəti raund da münasib görünür. “Hegelmann” Litva futbolunun orta səviyyəli klublarıdır. “Payde” isə Estoniya çempionatında çıxış etsə də, Avropada böyük təcrübəyə malik deyil. Hər iki komanda keçilə bilən rəqiblərdir və “Zirə” bu mərhələdə favoritlərdən biri sayılmalıdır.

Nəticə etibarilə, püşkatmanın yekunları Azərbaycan futbolu üçün kifayət qədər ümidverici görünür. Ən rahat vəziyyət “Qarabağ”ın payına düşsə də, “Sabah”, “Neftçi” və “Zirə” də ciddi maneələrlə üzləşməyiblər. Təbii ki, futbol sürprizlərlə zəngindir və heç bir rəqibi kiçiltmək olmaz. Ancaq mövcud reallıq, heyət potensialı, beynəlxalq təcrübə və son illərin nəticələri göstərir ki, Azərbaycan klubları bu püşkdən maksimum yararlanmalıdır və ən azı bir neçə mərhələ irəliləmək üçün bütün imkanlara malikdirlər. Yəni, bəhanəyə yer yoxdur.

Bu komandalara məğlubiyyət aşkar uğursuzluq sayılacaq. Klublarımızın maddi imkanları rəqiblərindən üstündür. Pul varsa, yaxşı komanda qurmağa və mərhələ keçməyə borcludurlar!

TAHİR MİRZƏ

Səpələnməmişlər səbətində yer alan Azərbaycan təmsilçisi mərhələ adlayacağı təqdirdə “Srvena Zvezda” (Serbiya), Lex (Poznan, Polşa), “Floriana” (Malta) – “Şemrok Rovers” (İrlandiya) cütünün qalibi, “Vardar” (Şimali Makedoniya) – “Kups” (Finlandiya) cütünün qalibi, “Jalqiris” (Litva) – “Drita” (Kosovo) cütünün qalibi və ya “Linkoln” (Cəbəllütariq) – “İnter” (Eskaldes, Andorra) cütünün qalibi ilə üz-üzə gələcək.

UEFA Çempionlar Liqasının II təsnifat mərhələsinin ilk oyunları 17 iyulda, cavab matçları 21-22 iyulda baş tutacaq.

Xatırladaq ki, “Sabah” turnirin I təsnifat mərhələsində TNS (Uels) ilə münasibətləri aydınlaşdıracaq. Bu mərhələnin oyunları iyulun 7-8-i və 14-15-də keçiriləcək.

Püşkatma mərasimi İsveçrənin Nyon şəhərində, UEFA-nın mənzil-qərargahında keçiriləcək. Tədbir Bakı vaxtı ilə saat 14:00-da başlayacaq.

Eyni məkanda 15:00-da başlayacaq mərasimdə Avropa Liqasında mübarizə aparan “Qarabağ”ın da potensial rəqibi bilinəcək.

Ağdam təmsilçisi bu raundda da səpələnmişlər səbətində yer alacaq. “Köhlən atlar”ın mümkün rəqibləri bunlardır: “Beşiktaş” (Türkiyə), “Tvente” (Niderland), “Tromse” (Norveç), “Hammarbü” (İsveç) və ya ÇSKA (Sofiya, Bolqarıstan) – “Derri Siti” (İrlandiya) cütünün qalibi.

Xatırladaq ki, “Qarabağ” UEFA Avropa Liqasının I təsnifat mərhələsində İslandiyanın “Vestri” komandası ilə üz-üzə gələcək. Bu raundun oyunları iyulun 9-u və 16-da keçiriləcək.

Bakı vaxtı ilə saat 16:00-da isə “Neftçi”nin də rəqibi bilinəcək. Həmçinin I təsnifat mərhələsində Gürcüstanın “Torpedo” klubu ilə oynayacaq “Zirə” də növbəti potensial rəqibini tanıyacaq. Bununla yanaşı, UEFA Avropa Liqasının I təsnifat mərhələsində baş tutacaq “Qarabağ” – “Vestri” duelinin məğlubunun hansı komanda ilə qarşılaşacağı bilinəcək.

II təsnifat mərhələsinin səpələnmişlər səbətində “Braqa” (Portuqaliya), “Ayaks” (Niderland), “Kopenhagen” (Danimarka), “Gent” (Belçika), “Rapid” (Avstriya), “Panatinaikos” (Yunanıstan), “Ludoqorets” (Bolqarıstan), FKSB (Rumıniya), “Rakuv” (Polşa), “Partizan” (Serbiya), “Luqano” (İsveçrə), AEK (Kipr), “Başakşəhər” (Türkiyə), “Riyeka” (Xorvatiya), “ÇFR Kluj” (Rumıniya), HİK (Finlandiya), “Zrinski” (Bosniya və Herseqovina), “Brann” (Norveç), “Spartak” (Slovakiya), “Hradets-Kralove” (Çexiya), “Avstriya” (Avstriya), “Katovitse” (Polşa), “Vaduts” (Lixtenşteyn), “Norşellann” (Norveç), “Tobol” (Qazaxıstan), “Apollon” (Kipr), “Hibernian” (Şotlandiya), “Torshavn” (Farer adaları) və “Syon” (İsveçrə) klubları yer alıblar.

Daha 13 komanda ilk raundun nəticələrinə əsasən müəyyənləşəcək.

Qeyd edək ki, UEFA Konfrans Liqasının 2026/2027 mövsümünün II təsnifat mərhələsinin matçları iyulun 23-də və 30-da keçiriləcək.

Futbolinfo.az Britaniya mətbuatına istinadən xəbər verir ki, Uels klubu hücumçusu Ken Çarlzla vidalaşıb.

25 yaşlı forvardın yeni komandası da artıq məlumdur. O, vətəni İngiltərədə “Maidstone Yunayted” klubu ilə müqavilə imzalayıb. Adıçəkilən komanda İngiltərənin Milli Liqasının cənub zonasında mübarizə aparır.

Qeyd edək ki, “Sabah”la TNS arasında ilk oyun iyulun 7-də və ya 8-də Azərbaycanda, cavab görüşü isə bir həftə sonra rəqib meydanında keçiriləcək.