21 yaşlı yarımmüdafiəçi bildirib ki, “Sabah” klubu ilə danışıqlar aparılıb və yeni mövsümdə icarə əsasında başqa komandada çıxış etməsi ehtimalı yüksəkdir: “Sabah”la danışıqlarımız olub. Gələn mövsümü də ehtimal ki, icarə əsasında başqa bir komandada keçirəcəm. Hələ qərar tam dəqiqləşməsə də, bir neçə təklif var və ən çox ehtimal olunan “Sumqayıt” variantıdır. Qərar yaxın günlərdə veriləcək”.

“Şamaxı”da əsas heyətdə oynamaq imkanı qazandığını vurğulayan futbolçu sözlərinə belə davam edib: “Orada çox oyun şansı əldə etdim və bu, inkişafımda böyük rol oynadı. Yeni mövsümdə hansı komandada oynayacağımdan asılı olmayaraq, yenə də əsas heyətdə olmaq və komandama maksimum fayda vermək üçün əlimdən gələni edəcəm. Məqsədim daha çox oynamaq, inkişaf etmək və yenidən milli komandaya dəvət almaqdır. Bu, mənim üçün ən böyük şərəf olar və o hədəfə çatmaq üçün var gücümlə çalışacam”.

GÜNAY SÜLEYMANOVA

Onlardan biri də “Şamaxı”dır. Ötən il I Liqadan Premyer Liqaya qayıdan bölgə təmsilçisinin əsas komandası son mövsümü pis keçirmədi. Baş məşqçi Ayxan Abbasovun təcrübəsi və seleksiya bacarığı sayəsində qısa müddətdə toplanan kollektiv sezonu 7-ci pillədə tamamlamağı, bununla da Premyer Liqada qalmaq missiyasını yerinə yetirməyi bacardı.

Təkcə əsas komanda ilə yara sağalmır axı. “Şamaxı”nın ikinci komandası, eyni zamanda, AFFA-nın aşağı yaş qrupları üzrə liqalarında çıxış edən kollektivləri haqda eyni sözləri demək mümkün deyil. Bu, “Şamaxı”da aşağı yaş qrupları ilə aparılan işin ürəkaçan olmadığını göstərir. Belə olan halda, bu gün “Şamaxı” klub adına nə dərəcədə layiqdir və ya ölkə futbolunun inkişafına hansı töhfəni verə bilər?

Başlayaq “Şamaxı”nın ikinci komandasından. Həmin komanda Məqsəd Yaqubəliyevin rəhbərliyi altında əvəzedicilər liqasının 2024/2025 mövsümünü sonuncu – 10-cu pillədə tamamlayıb. 6 qələbə, 9 heç-heçəsi olan kollektiv 21 görüşdə məğlubiyyət acısı yaşayıb. Vurduğu 48 qolun qarşılığı isə çox ağır olub: 104 qol.

AFFA Gənclər Liqasında “Şamaxı” 13 komanda arasında 8-ci olub. 36 oyunda 49 xal toplayan kollektiv mövsümü 14 qələbə, 7 heç-heçə və 15 məğlubiyyətlə bitirib.

Ən pis göstərici “Şamaxı”nın U-17 komandasındadır. Təsəvvür edirsiniz, 15 komanda arasında sonuncu olan bölgə təmsilçisi 42 oyunun hamısında uduzub. Bu qədər oyuna cəmi 17 qol vuran “Şamaxı” əvəzində 405 (!) top buraxıb. Sezonu 405 qol buraxaraq və 0 xalla bitirmək biabırçılıq deyilsə, bəs nədir?! Bu göstəricilər klub rəhbərliyinin aşağı yaş qruplarına olan münasibətini bariz şəkildə üzə çıxartmırmı?! Sonra da deyirik ki, “Şamaxı” 21 yaşadək futbolçulardan ibarət millimiz üçün baza rolunu oynayacaq. İnanan daşa dönsün.

Keçək AFFA U-16 Liqasına. “Şamaxı” bu liqada da 15 komanda arasında sonuncu olub. 28 oyuna cəmi 1 qələbə və 2 heç-heçə görən əyalət təmsilçisi 25 dəfə meydanı başıaşağı tərk edib. 31 qol vuran şamaxılılar 148 dəfə topu qapılarından çıxartmalı olublar. Yekunda mövsümü cəmi 5 xalla tamamlayıblar. “Şamaxı”nın U-16 komandasının tək təsəllisi U-17-dən şükürlü vəziyyətdə olmasıdır.

AFFA U-15 Liqasında “Şamaxı” 15 komanda arasında 12-ci yeri tutub: 28 oyuna 4 qələbə, 3 heç-heçə, 21 məğlubuiyyət. 23 qol vuran şamaxılılar 115 dəfə mərkəzə dəvət olunublar. Mövsümün qazancı isə vur-tut 15 xal olub.

AFFA U-14 Liqasında final mərhələsinə adlayan “Şamaxı” 1/4-də “Ulduz”a hər iki oyunda uduzub – 2:3, 0:4. Digərlərinə baxanda U-14 toya getməlidir…

AFFA U-13 Liqasında isə “Şamaxı” pley-off mərhələsini 3-cü pillədə tamamlayaraq final mərhələsinə vəsiqə qazana bilməyib.

Daha aşağı yaş qrupları üzrə liqalarda turnir cədvəli olmur. Aydın məsələdir ki, uşaq futbolunda nəticə tələb edilməsi düzgün deyil. Heç kim demir ki, “Şamaxı”nın bütün aşağı yaş qrupları çempion olsun və ya turnir cədvəlində ön sıralarda qərarlaşsın. Amma bir mövsümə 400-dən çox qol buraxıb, 1 xal belə qazanmayaraq qapazaltı olan komandanın gələcəyinə necə ümidlə baxasan?! “Şamaxı”nın bir neçə komandası mövsümü sonuncu pillədə bitiribsə, bölgə təmsilçisi milli üçün necə baza sayıla bilər?! Bu qədər bərbad nəticələrin səbəbi “Şamaxı” rəhbərliyini heç narahat etmirmi? Etsəydi, qarşılarına klub olmaq məqsədi qoysaydılar, uşaq futboluna bu qədər bivec yanaşmazdılar.

Maraqlıdır ki, klubda bu qədər problem olduğu bir zamanda uşaq komandalarının koordinatoru olan Ramiz Məmmədov yeni iş axtarışındadır. Həm də “Şamaxı”nın İdarə Heyətində sədr müavini kimi təqdim edilən mütəxəssis tezliklə I Liqa klubu “Mingəçevir”in baş məşqçisi olacaq. Görünür, Şamaxıda futbolun inkişafı üçün ümid işığı görmədiyindən, o, seçimini edib.

AĞA

– “Şamaxı”ya gəlişiniz necə baş tutdu? Digər təklifləriniz də var idi? Nəyə görə məhz bu kluba keçməyi üstün tutdunuz?

– “Şamaxı”ya keçidim agentim sayəsində baş tutdu. O dedi ki, mənimlə maraqlanan bir klub var, nəticədə bura gəldim. Bəli, başqa variantlarım var idi, digər ölkələrdən də təkliflər almışdım. Amma mən daha çox Azərbaycana gəlməyə köklənmişdim. Təklif alan kimi ilk olaraq hazırkı komanda yoldaşım, qapıçı Rikardo Fernandeslə məsləhətləşdim. Nəticədə “Şamaxı”ya keçməyə qərar verdim, çünki keçən mövsüm Premyer Liqada yaxşı çıxış etdiklərini düşünürəm. Bundan əlavə, Ayxan Abbasovun çox güclü mütəxəssis olduğuna, oyunumu inkişaf etdirməyimə yardımçı olacağına əminəm.

– Azərbaycan futbolu haqda hansı informasiyaya sahibsiniz? Bizim klublardan hansıları tanıyırsınız?

– Əslində, Azərbaycandakı bəzi klublar haqqında məlumatım var idi. Mən futbolu çox sevirəm, ona görə də digər ölkələrin klubları haqqında da daim maraqlanıram. Amma Portuqaliyada ən çox “Qarabağ” haqqında eşitmişdim. Yəqin ki, bu, “Qarabağ”ın son illərdə Portuqaliya klubları ilə oyunlar keçirməsi ilə əlaqədardır.

– Azərbaycan çempionatında oynayan və ya vaxtilə oynamış portuqaliyalı futbolçulardan kimləri tanıyırsınız?

– Tanış adlar var, amma şəxsi tanışlığımız yox idi. “Şamaxı”ya keçənə qədər Leandro Andrade, Tiaqo Silva və Rikardo Fernandes haqqında eşitmişdim.

– Yeni klubunuza və yeni çempionata, həmçinin ölkəyə uyğunlaşmaq üçün sizə nə qədər vaxt lazım olacaq?

– Mümkün qədər tez uyğunlaşacağıma ümidliyəm. İnanıram ki, komanda yoldaşlarımın köməyi ilə bu proses sürətli keçəcək.

– “Şamaxı” ötən mövsümü 7-ci pillədə tamamladı. Yeni sezonda daha yaxşı nəticəyə imza ata biləcəksiniz?

– Bəli, ümid edirəm ki, belə olacaq. Yeni transferlər mövcud heyətə dəstək olmaq üçün gəliblər. Məqsəd birlikdə ən yaxşı nəticələrə imza atmaqdır.

– Məqsədiniz ölkəmizdə uzun müddət futbol oynamaqdır, yoxsa Azərbaycan çempionatından tramplin kimi faydalanmaq niyyətindəsiniz?

– İlk məqsədim vaxtı gələndə hazırkı sözləşməmin müddətini uzatmağa nail olmaqdır. Komandaya hədəflərinə çatmaqda kömək etmək və mümkünsə, liqada iz qoymaq istəyirəm.

CAVAD

Futbolinfo.az saytının məlumatına görə, mövsümün sonuna 2 tur qalmış komandadan gedəcək futbolçulardan bəziləri bəllidir. Müqaviləsi başa çatacaq serbiyalı müdafiəçi Vasiliye Radenoviçlə yeni sözləşmə imzalanmayacaq. Onun adaşı və həmyerlisi Vasiliye Bakiçlə də yollar ayrılacaq.

Baş məşqçi Ayxan Abbasov bu iki futbolçunun xidmətində maraqlı deyil. Digər əcnəbilərdən də bəzilərini yola salınması mümkündür. Eyni zamanda klubun yeni müqavilə təklifindən imtina edən legionerlər də var. Tam siyahı mövsüm bitincə dəqiqləşəcək.

Qışda Azərbaycan U-21 yığmasının baş məşqçisi təyin edilən mütəxəssis əvəzində komandasına bu milinin futbolçularını cəlb etmək istəyir. O, “Neftçi”dən hücumçu Ağadadaş Salyanskini və yarımmüdafiəçi Murad Məmmədovu heyətə qatmaq niyyətindədir. Bölgə təmsilçisi bu iki futbolçunu icarəyə götürmək üçün “ağ-qaralar”a müraciət edib. Bakı klubu isə bu məsələyə yayda baxa biləcəkləri cavabını verib.

Abbasov keçmiş klubu “Turan Tovuz”un da heyətindən bir futbolçunu da gözaltı edib. O, hazırda “Kəpəz”də icarədə olan Sadiq Şəfiyevin xidmətində maraqlı olduğunu tovuzluların diqqətinə çatdırıb.

AĞA

Son 6 turda 12 xal itirən “Sabah” turnir cədvəlinin 5-ci pilləsindən yuxarı qalxa bilmir. “Səbail”lə heç-heçə ötən tur məğlub etdikləri “Turan Tovuz”la xal fərqinin daha da artmasına səbəb oldu. Qərblilər əsas izləyicisindən 7 xal öndədir və avrokuboklara vəsiqə şansını saxlayır. “Bayquşlar”ın da şansı tükənməyib, hələ kubokda da ümidlər davam edir. Lakin Berezutskinin oynatdığı futbolla uzağa getmək olmaz.

“Səbail” dünən daha yaxşı oynadı. Cavid Hüseynov komandasına daha düşünülmüş futbol oynatdı, yetirmələri daha real qol şansları yaratdı. “Sabah”ın ikinci hissədə ümumiyyətlə, düşünülmüş bircə hücumu olmadı ki, bu da məşqçi bacarıqsızlığının nəticəsidir. Krunoslav Renduliçin vaxtında da nəticələr yaxşı deyildi, amma komanda indikindən xeyli baxımlı oynayırdı.

Ümumiyyətlə, komandanın mövsüm ərzində qazandığı 32 xaldan 18-ni Renduliç əldə edib. Düzdür, Berezutskinin oyun sayı azdır, sələfinin göstəricisini yaxşılaşdıra bilər. Ancaq o da var ki, qışa kimi reallaşan nəticələri rusiyalının ayağına yazmaq olmaz. Vasilinin özünün hazırladığı komanda yalnız 2025-dəki göstəricilərə görə fərqləndirilə bilər. Burada isə 5 oyuna toplanan 6 xal var.

Turun bağlanış günündəki digər bərabərlik Tovuzda qeydə alındı. Həm “Kəpəz”, həm də “Şamaxı” ehtiyatlı oynadı, daha çox uduzmamağa çalışdılar. Hər iki komandanın qələbə qazanmaq üçün də şansı var idi, lakin ədalətli nəticə tərəfləri razı saldı.

Ümumiyyətlə, cari turda autsayderlərdən yalnız “Sumqayıt” xalsız qaldı. Bu, son pillədəki komanda ilə aradakı fərqin 5 xaladək əriməsinə səbəb oldu. Son 3 yerin sahibi dəyişməsə də, mübarizə daha da qızışdı. Yəqin ki, mövsümün sonunadək bu temp davam edəcək.

FƏRİD

Futbolinfo.az xəbər verir ki, 23 yaşlı yarımmüdafiəçi karyerasını Qırğızıstanda davam etdirəcək. Çünki Əhmədov Qırğızıstanın yüksək liqa təmsilçisi “Alay”a keçib.

Bir müddətdir komandanın düşərgəsində Türkiyədə təlim-məşq toplanışında olan sabiq “Şamaxı”lı ilə müqavilə imzalanması qərara alınıb. Əhmədov yeni komandası ilə 1 illik sazişə qol çəkib.

Qeyd edək ki, Ramin Əhmədov cari mövsümün ilk yarısını “Şamaxı”nın heyətində keçirib. O, daha əvvəl “Zaqatala” və “Zirə” klublarının formasını geyinib.

Futbolinfo.az saytının məlumatına görə, 20 yaşlı sol cinah oyunçusu Norveçin “Sarpsborq” klubunun maraq dairəsinə düşüb.

Norveç yüksək liqasında çıxış edən sarpsborqlular Abbasovu diqqət mərkəzində saxlayırlar. Hətta rəhbərlik U-21 millimizin üzvünü yerində izləmək istəyib. Bu səbəbdən “Şamaxı”nın Misli Premyer Liqasının 21-ci turunda “Neftçi” ilə bu gün keçiriləcək oyununa nümayəndə göndərilməsi nəzərdə tutulmuşdu. Lakin viza ilə bağlı problem yarandığı üçün bu variant baş tutmayıb.

“Sarpsborq”un nümayəndələri “Neftçi” ilə qarşılaşmanı televiziya vasitəsilə canlı izləyəcəklər. Norveçdə yeni mövsüm martda start götürəcəyindən, klub Rüfəti izləməkdə davam edəcək.

Qeyd edək ki, “Neftçi”nin yetirməsi olan Rüfət Abbasov bu mövsümdən “Şamaxı”nın formasını geyinir.

– Söhbətə Misli Premyer Liqasının XIX turunda “Qarabağ”la keçirdiyiniz oyundan başlayaq. Liderə iki qol vura bilsəniz də, yekunda məğlubiyyətlə (2:3) üzləşdiniz. Oyundan xalla ayrılmağınız üçün nə çatışmadı?

– “Qarabağ”la keçirdiyimiz ilk matçda olduğu kimi, yenə kiçik detallar üzündən uduzduq. İndiki halda görünən odur ki, biz bu komandadan xal ala bilmirik. Amma müsbət cəhətlər də gördüm. Komandamızın birləşdiyini hiss etdim və bu, gələcək üçün çox müsbət haldır. “Qarabağ”la görüşdə çoxlu qol vəziyyəti yaratdıq. Bunun qarşılığında meydançanı xalsız tərk etmək bizi məyus etdi.

– Qış fasiləsi müddətində komandaya bir neçə yeni futbolçu cəlb olundu. Sizcə, onlar “Şamaxı”ya əlavə güc qata biləcəklər? Yeni transferlərlə bağlı fikriniz necədir?

– Düşünürəm ki, yeni gələnlər məqsədimizə çatmağa kömək edəcəklər. Hamının bildiyi kimi, bu mövsüm üçün hədəfimiz Premyer Liqada qalmaqdır. Biz futbolçular və komandanın bütün personalı əlindən gələni edir ki, yeni transferlər kollektivə mümkün qədər tez uyğunlaşsınlar. Adaptasiya prosesi nə qədər tez keçsə, “Şamaxı” üçün bir o qədər əllərindən gələni edəcəklər.

– Növbəti turda “Zirə” ilə qarşılaşacaqsınız. Bu oyunda hansı nəticəyə ümid edirsiniz?

– Mən bütün rəqiblərimizə hörmətlə yanaşıram. Amma biz hər bir oyuna xal və ya xallar qazanmaq məqsədilə çıxırıq. Çempionatın bütün iştirakçıları bir-birlərinə rəqibdirlər və hər bir komanda digərlərini qabaqlamağa çalışır.

– Baş məşqçi Ayxan Abbasovun ən çox güvəndiyi futbolçulardan birisiniz. Onunla bağlı da fikrinizi bilmək istərdik. Abbasovla birgə işləmək sizin üçün rahatdır?

– Abbasov ötən mövsümdən, hələ “Turan Tovuz”u çalışdırdığı dönəmdən məni komandasında görmək istəyən məşqçidir. O, 6 ay futbolsuz qalmağıma baxmayaraq, mənə “Şamaxı”ya qoşulmaq imkanı yaratdı. Mənə bu inamı aşıladığı üçün ona təşəkkür edirəm. Hər məşqdə və oyunda Abbasovun etimadını doğrultmağa çalışıram. Onun tətbiq etdiyi oyun sistemi mənə tam uyğun gəlir.

– Hazırda 8-ci pillədə qərarlaşan “Şamaxı”nın mövsümün ikinci yarısı ilə bağlı əsas planı nədir? Turnir cədvəlində daha yuxarı pillələrə qalxmaq üçün yetərli qədər gücünüz varmı?

– Bütün komandalar gücləniblər. Bu isə o deməkdir ki, mövsümün ikinci yarısı hamı üçün daha çətin keçəcək. Ancaq mən komandama güvənirəm. Zəhmət və əzmin hesabına əsas məqsədimizə çatacağıq.

– Azərbaycan Premyer Liqasının səviyyəsi sizi tam qane edir? Çempionatımızda çıxış edən hansı futbolçuları bəyənirsiniz?

– Azərbaycan çempionatı çox səviyyəli liqadır. Burada yaxşı futbolçular çıxış edirlər. Bəyəndiyim oyunçular çoxdur.

ABBAS

Əslində, Ayxan Abbasovun yetirmələri indiyəqədərki hər 3 matçda yenilməsinə rəğmən, “Qarabağ”la başabaş mübarizə aparıb. Lakin ustalıq səviyyəsindəki qeyri-bərabərlik özünü nəticədə göstərib. Dünən də belə oldu. “Şamaxı” iki dəfə hesabı bərabərləşdirdi, yekunda isə xalsız qaldı.

“Qarabağ”ın oyununa heyətdəki itkilər də təsirini göstərmişdi. Baş məşqçi Qurban Qurbanov gələn həftə Avropa Liqasında keçirəcəkləri oyunu da nəzərə alaraq müəyyən rotasiyalar etmişdi. Anasının xəstəliyi, daha sonra vəfatı üzündən komanda ilə toplanış keçməyən Yassin Benzia hələ Azərbaycana qayıtmadığından, onu ən azı daha 3-4 matçda görməyəcəyik. Bədavi Hüseynovun zədələnməsi, bəzi oyunçuların tam hazır olmaması dameydan sahiblərinin döyüşkən heyətlə oynamamasına səbəb olmuşdu.

Heyətində ciddi dəyişikliklər olan “Şamaxı”da isə əsas itki Leroy Mikels idi. Sınaq matçında zədələnən legionerin yoxluğunda qonaqların hücumda işləri qaydasında deyildi. Komanda iki qol vursa da, irəlidə əvvəlki hərəkətlilik yox idi.

Oyuna gəlincə, Brahim Konate ilk qolda kobud səhvə yol verdi, Cəlal Hüseynov isə debüt matçında avtoqolla yadda qaldı. “Qarabağ”ın müdafiənin mərkəzindəki səhvləri isə rəqibin fərqlənməsinə səbəb oldu. Qurbanovun FCSB ilə matçadək bu problemləri aradan qaldırması lazımdır. Əks halda, rumınlarla görüşdə uğurlu nəticəyə ümid edə bilməyəcəyik.

İstənilən halda, “Qarabağ” start matçlarına xas olan zəif oyuna rəğmən, 3 xal qazanmağı bacardı. Bu isə ağdamlıların çempionluq yarışında rəqibsiz olmasına işarədir. Əsas isləyici ilə 11 xallıq fərq var, “Araz-Naxçıvan”ın bu yarışda sonadək tab gətirməsi inandırıcı deyil. Lakin ağdamlılar arxayınlaşmamalıdır. Olavio Juninyonun yoxluğu həlledici matçlarda özünü göstərə bilər.

FƏRİD

Futbolinfo.az xəbər verir ki, ukraynalı Vladislav Veremeyev mərkəz müdafiəçisidir. “Dnepr” yetirməsi ölkəsində “Çernomorets”, “Zirka”, “Sumı” və “Skoruk”da forma geyib. Estoniyada “Nimme Kalyu”da oynadıqdan sonra Latviya “Elqava”sında çıxış edən 26 yaşlı oyunçu Çexiya “Mixalovçe”sində 6 ay keçirib. Yayda yenidən “Elqava”ya qayıdan ukraynalı Şamaxıya azad agent kimi gəlib.

“Şamaxı”nın digər yenisi Alfonse Msanqadır. Tanzaniyalı sağ cinah müdafiəçisi yaydan bəri klubsuzdur. Vətənində “Allianse”dən ayrıldıqdan sonra 2022-ci ilin fevralında Çexiyaya gələn oyunçu Subotiça “Spartak”ı ilə müqavilə bağlayıb. Bir il “Novi Sad”da icarədə olan Msanqa ölkəmizə azad agent kimi gəlib.