Futbolinfo.az “Sport24.ru”ya istinadən xəbər verir ki, təcrübəli mütəxəssisin sözləşməsi 2027-ci ilin yayına qədər uzadılıb.

Onun anlaşması cari mövsümün sonuna qədər idi. Komandanın 9 turdan sonra Premyer Liqaya liderlik etməsi rəhbərliyin 1 illik uzatma bəndini aktivləşdirməsinə səbəb olub.

Lakin tovuzlular bununla kifayətlənmək fikrində deyillər. Qərb təmsilçisi 73 yaşlı çalışdırıcıya daha yaxşı məvacib qarşılığında ən azı daha 3 il müddətinə yeni müqavilə təklif etməyi planlaşdırır. Rəhbərlik rusiyalı məşqçinin komandanın inkişafına verdiyi töhfəni yüksək qiymətləndirir və onu klubun uzunmüddətli inkişaf strategiyasında əsas fiqur kimi görür.

Qeyd edək ki, Kurban Berdiyev ötən ilin yayından “Turan Tovuz”a rəhbərlik edir.

Futbolinfo.az saytının məlumatına görə, bir müddət əvvəl adı “Qarabağ”la birgə hallanan seneqallı hücumçu bu dəfə Premyer Liqanın başqa komandasının maraq dairəsindədir.

Bu ayın əvvəlində Fransanın “Sent-Etyen” klubundan ayrılaraq azad agent statusu alan 30 yaşlı forvardı “Turan Tovuz” heyətində görmək niyyətindədir. Avrokuboklara iddia edəcək kollektiv qurmağı planlaşdıran tovuzlular qol yollarında məhz Vadjiyə etibar etmək istəyir. Hazırda futbolçu ilə danışıq aparılır.

Qeyd edək ki, İbrahima Vadji 2021-2022 mövsümündə “Qarabağ”ın formasını geyinib.

– Gəlin söhbətə “Turan Tovuz” komandasının ötən mövsümdəki çıxışı ilə başlayaq. Avrokuboklara qatılmaq uğrunda sonadək mübarizə aparsalar da, məqsədlərinə çata bilmədilər. Sizcə, bunun səbəbi nə idi?

– Uzun müddət aşağı liqada çıxış edən “Turan Tovuz” komandasının 3 il öncə öz yeri olan Azərbaycan Premyer Liqasına yenidən qayıtması tovuzlu azarkeşlər üçün çox sevindirici bir hadisə idi. Təbii ki, Azərbaycan Premyer Liqasına həm maddi, həm də təşkilati baxımdan uyğunlaşmaq asan bir iş deyil. “Turan Tovuz” azarkeşlərinin liqada söz sahibi olmaqla bağlı alışdıqları hədəflərə çatmaq o qədər də asan deyil. Hər şeydən əvvəl bu məqsədə çatmaq üçün güclü komanda qurmaq lazımdır. Bundan əlavə, belə bir komandanı hədəflərə çatdırmaq üçün başında layiqli bir baş məşqçi dayanmalıdır. Qəbul etmək lazımdır ki, bu baxımdan “Turan Tovuz” rəhbərliyi üzərinə düşəni etdi, 1 il öncə Kurban Berdıyev kimi çox təcrübəli məşqçini komandanın başına gətirdi. Hədəflər aydın idi – çempion olmasalar belə, ən azı avrokuboklara qatılmaq. Mövsümə çox yaxşı başladılar. “Qarabağ”a qarşı oyunlarda əldə edilən nəticələr “Turan Tovuz”un hədəflərinə çata biləcəyinin göstəricisi idi. Ancaq mövsüm davam etdikcə “Turan Tovuz”un performansı aşağı düşməyə başladı. Xüsusilə mövsümün ikinci yarısında bu hal daha aydın hiss olunurdu. Bunun səbəblərini “Turan Tovuz”un texniki heyəti daha yaxşı bilər. Futbolçuların zədələnməsi, cəzalar və ya başqa səbəblər ola bilər. Amma qırmızı xətlə qeyd olunmalı əsas məqam odur ki, “Turan Tovuz”un avrokuboklara qatılmamasının əsas səbəbi birbaşa rəqibi olan “Araz-Naxçıvan”a qarşı matçlarda əldə etdiyi mənfi nəticələrdir. “Turan Tovuz” onlarla dörd oyundan yalnız birində qələbə qazana bildi, ikisində məğlub oldu, birini isə heç-heçə başa vurdu. Xüsusilə sonuncu oyunda rəqib bir nəfər azlıqda qalmasına baxmayaraq, “Turan Tovuz” qələbəni əldən verdi. Məhz bu oyunlar komandanın liqadakı taleyini müəyyən etdi.

– Berdıyevin Azərbaycandakı ilk ilini necə qiymətləndirirsiniz? Ötən mövsümə iddialı başlayan “Turan Tovuz” avrokuboklara vəsiqə qazana bilmədisə, bu, Berdıyevin öz vəzifəsini tam yerinə yetirə bilmədiyi anlamına gəlirmi?

– Hörmət etdiyim həmkarım Kurban Berdıyevin karyerasını müzakirə etmək əbəs olar. Hər dəfə bu ifadəni təkrarlayıram: “İcraatın danışdığı yerdə kəlmələr susar”. Berdıyev bütün ciddiyyəti ilə mövsümə çox yaxşı başladı, lakin sezonun sonluğu uğurlu olmadı. Məhz bu vəziyyəti dərindən təhlil etmək lazımdır. Komandanın fiziki durumu, zədələnmələr, cəza alan oyunçular və ya bəlkə də qış fasiləsində bir-iki transferin vacibliyi – uğursuzluğun səbəbləri məhz bu amillərlə bağlıdır. Üstəlik, dediyim kimi, birbaşa rəqib olan “Araz-Naxçıvan”a qarşı əldə olunan nəticələr də mənfi idi. Bu baxımdan, Berdıyevin ötən mövsüm uğurlu olub-olmadığını ən düzgün şəkildə “Turan Tovuz” rəhbərliyi qiymətləndirə bilər.

– Gələn mövsümdə “Turan Tovuz”dan gözləntiniz nədir? Sizcə, bu dəfə avrokuboklara vəsiqə qazanmağı bacaracaqlar?

– Bəli, “Turan Tovuz” ötən mövsüm hədəfinə çata, avrokuboklara vəsiqə qazana bilmədi. Bu, bir reallıqdır. Qarşıdakı mövsüm üçün atılacaq ən vacib addım keçən sezonun çox detallı şəkildə təhlil olunmasıdır. Düzgün analiz yeni mövsümdə komandanı uğura aparan yol ola bilər. Xüsusilə də eyni baş məşqçi ilə davam edildiyi üçün bu, şübhəsiz ki, üstünlükdür. “Turan Tovuz” azarkeşlərini də unutmaq olmaz. Onların gözləntilərinə cavab vermək mütləqdir. Əgər stadionun dolmasını istəyirlərsə, həm oyunun keyfiyyətini yüksəltməli, həm də avrokuboklara vəsiqə qazanmalıdırlar. Əks halda, azarkeşləri məmnun etmək mümkün olmayacaq.

– Növbəti mövsümdə Azərbaycan Premyer Liqasında 12 komanda mübarizə aparacaq. Sizin ölkəmizdə çalışdığınız dövrdə rəqib kimi qarşılaşdığınız Yevlax və İmişli təmsilçiləri də yenidən Premyer Liqada yer alacaq. Sizcə, “Karvan” və “İmişli” liqaya daha çox həyəcan qatacaq?

– “Karvan” və “İmişli”nin Premyer Liqaya qayıtması çox sevindirici hadisədir. Ümid edirəm ki, “Şəmkir” də ən qısa zamanda yüksək dəstəyə çıxar. Bu mövzuda AFFA-nı təbrik edirəm, çünki Azərbaycan çempionatı, demək olar ki, Bakı liqasına çevrilmişdi. Futbolu bütün rayonlara yaymaq lazım idi və bu, liqanın populyarlaşması üçün önəmlidir. Amma çempionatın keyfiyyətini də düşünmək lazımdır, yəni rəqabət olmalıdır. Çünki keyfiyyət ancaq düzgün rəqabətlə yaranır. Azərbaycan kimi ölkələrdə adətən 10 və ya 12 komandadan ibarət liqalar olur. Mən keçən il Albaniyada çalışmışam, orada da 10 komandalı liqadır. Albaniyada axırdan ikinci yeri tutan komanda da aşağı liqaya düşür, səkkizinci yeri tutan isə pley-off oyunu keçirir. Bu isə liqanı daha maraqlı və rəqabətli edir. Daha önəmlisi isə odur ki, bu, çempionatın “fair-play” ruhuna çox kömək edir, çünki oyun alverinin qarşısını alır.

– Bəs, əsas problem nədir?

– Azərbaycanda ən böyük problem Premyer Liqadan sonrakı liqaların zəif olmasıdır. AFFA mütləq həmin liqaların güclənməsinə önəm verməlidir. Oradakı keyfiyyət, əlbəttə, Premyer Liqanın keyfiyyətinə də təsir edəcək. Məncə, 12 komandadan ibarət liqa Azərbaycan üçün ideal sayıla bilər. Amma vurğuladığım kimi, çempionatın keyfiyyətinin yüksəldilməsi üçün lazım olan addımlar da mütləq atılmalıdır.

– Bu il avrokuboklarda iştirak edəcək təmsilçilərimizdən gözləntiləriniz nədir? Sizcə, “Qarabağ”, “Sabah”, “Zirə” və “Araz-Naxçıvan” komandalarından hansıları liqa mərhələsinə (keçmiş qrup mərhələsi) vəsiqə qazana bilər?

– Bu mövzuda yenə lokomotiv rolunu “Qarabağ” oynayacaq. Qəbul etmək lazımdır ki, onlar da əvvəlki uğurlarından bir qədər uzaqlaşmışdılar. Təbii ki, bu uğurun davamlılığını təmin etmək asan iş deyil. Hər il gedən və yeni gələn oyunçular olur. Onların həm sosial, həm də taktiki cəhətdən komandaya uyğunlaşması tələb olunur və bu, asan məsələ deyil. Bu hal daha böyük komandaların da başına gəlir. Məsələn, “Mançester Siti” eyni məşqçi ilə bir neçə il əvvəl böyük uğurlar qazanırdı, amma bu il əvvəlki nəticələrindən uzaq qaldı. Ümid edirəm ki, çox sevdiyim Rəşad Sadıqovun çalışdırdığı “Zirə” bu il daha böyük uğurlar əldə edəcək. Ən azı, mənim gözləntim bu istiqamətdədir, çünki həm Rəşad gündən-günə daha çox təcrübə qazanır, həm də klub rəhbərliyinin bu sahədə iştahı artır. Ümid edirəm ki, “Sabah” və “Araz-Naxçıvan” da uğur qazanacaq və Azərbaycana UEFA reytinqində xallar gətirəcəklər. Unutmayaq ki, klublar nə qədər uğurlu olarsa, Azərbaycan millisi də bir o qədər fayda görər. Avrokubokda iştirak edəcək komandalara uğurlar arzulayıram. Ümid edirəm ki, ən qısa zamanda yenidən Azərbaycanda işləmək fürsəti qazanaram. Çünki öz beynəlxalq təcrübəmlə Azərbaycan futbolunun inkişafına böyük töhfələr verə bilərəm.

FƏRİD

Futbolinfo.az xəbər verir ki, tovuzlular rəqibin heyətində “lipa” olması ilə bağlı AFFA-ya şikayət edib. Belə ki, onlar “Neftçi”nin 25 nömrəli oyunçusu Sultan Orucovun “lipa” olduğunu iddia edib. Onun yaşı ilə bağlı şübhələr var.

“Turan Tovuz” akademiyasının koordinatoru Ülfət Mədətov məlumatı təsdiq edib: “Bəli, bir hal var. Onunla bağlı şübhələrimiz mövcuddur. Biz də qərara gəldik ki, AFFA-ya rəsmi müraciət edək. U-14 liqasına nəzarət edən Sənan İmanova bu barədə məlumat vermişik. Ona videoları da göndərdim. Oyun protokolunu və uşağın şəkillərini də yolladım”.

Qeyd edək ki, ilk oyunda “Neftçi” “Turan Tovuz”u 2:0 hesablı məğlubiyyətə uğradıb. İkinci oyunda isə Sultan Orucov meydanda olmayıb. Komandalar 1:1-lik bərabərliyə razılaşıb. Nəticədə “Neftçi” ¼ finala çıxıb.

“Neftçi”nin mətbuat xidmətinin rəhbəri Asəf Zerynallı isə iddiaları rədd edir: “Sultan Orucov “Neftçi”nin futbolçusudur. U-14 komandamızın üzvüdür. Qış transfer dönəmində heyətə cəlb olunub. Futbolçumuz 2011-ci il təvəllüdlüdür və AFFA-da qeydiyyatdan keçib. Sənədləri də qaydasındadır. Yayılan iddiaların heç bir əsası yoxdur. Belə məsələlərlə heç kim “Neftçi”nin imicinə xələl gətirə bilməz. Buna imkan vermərik. “Neftçi” həmişə uşaq futbolunda önəmli rol oynayıb. Yetirmələrimiz hər zaman müxtəlif milli komandalara cəlb olunublar. Yayılan xəbərlər həqiqəti əks etdirmir”.

AĞA

Əvəzində “Qarabağ” izləyiciləri ilə xal fərqini bir az da açdı. Artıq ağdamlılar “Araz-Naxçıvan”dan 12 xallıq məsafədədir. “Zirə” ilə “Turan Tovuz” isə Elmar Baxşıyevin yetirmələrini haqlamaq üzrədir. Qış fasiləsinə böyük üstünlüklə yollanan, hətta çempionluğa ümidlənən muxtar respublika təmsilçisi izləyicilərini çox yaxına buraxıb.

Dünən Tovuzda qeydə alınan nəticə də göstərdi ki, “Araz-Naxçıvan” 1-2 futbolçudan asılı komandadaır. Felipe Santos və Ramon Maçadodan bir olmayan kimi Baxşıyevin yetirmələrinin hücumda işləri qaydasında getmir. 23 tura cəmi 23 qol vuran naxçıvanlılar heyəti yaxşı komplektləşdirməyib, yarımmüdafiə xəttində yersiz say çoxluğu var, hücumda Maçadoya alternativ gətirilməsi isə yaddan çıxıb.

Son 7 oyunda cəmi 5 xal toplayan “Araz-Naxçıvan”ın çöküşünün digər səbəbi rəqiblərinin bu komandaya daha diqqətli yanaşması, mövsümün əvvəlində olduğu kimi barmaqarası münasibət bəsləməməsidir. AFFA da nəzarəti gücləndirib, Naxçıvan klubunun rəhbərliyi əvvəlki kimi istədiyi hakimi öz oyununa təyin etdirə bilmir. Hakm köməyi olmayanda isə Baxşıyevin yetirmələrinin bacarığı mümkün 21 xaldan 16-nı itirməyə imkan verir.

İndi Elmar bəy hakimlərdən gileylənməyə başlayıb. Dünən komandası haqlı qərarla azlıqda qaldı, şikayətləndi, halbuki rəqiblərinin əlindən alınan xalları hesablasaq, “Araz-Naxçıvan” indi heç ilk “beşlik”də olmamalıydı. Zarımaqdansa heyəti düzgün komplektləşdirmək, futbolçuların geriləməsinin səbəbini araşdırmaq lazımdır. 12-ci oyunçu ilə qələbəyə öyrəşən naxçıvanlılar indi “azlıqda qalıb”.

“Turan Tovuz”un parlaq oynadığını demək olmaz. Mövsümdə ən az uduzan ikinci komanda olan qərblilər heç-heçə çoxluğunun əziyyətini çəkir. Qeyri-sabitlik Kurban Berdıyevin yetirmələrinin əsas qüsurudur. Meydan sahibləri dünən də az qala büdrəyəcəkdi, amma yenə dada standart vəziyyət çatdı. İstənilən halda, naxçıvanlılarla xal fərqi beşə endi, komanda avrokuboka vəsiqə uğrunda mübarizədə yoluna davam edir.

Turun mərkəzi oyununda isə ənənə pozulmadı. 4 ildir “Qarabağ”ı məğlub edə bilməyən “Neftçi” yenə Azərbaycan derbisində məyus tərəf oldu. Baxmayaraq  ki, oyunun gedişi tilsimin qırılması ehtimalını yaratmışdı.

Komandaların hazırkı durumu fərqli olsa da, azarkeş sayında mövsümün rekordunun qırılması faktı da oyuna necə önəm verildiyini göstərir. Bəlkə elə buna görədir ki, matça əla motivasya olunan bakılılar ilk yarıda ciddi ərazi üstünlüyü qazanmışdı. Komanda Samir Abasovun təyinatından bəri ən yaxşı oyununu göstərirdi. Ardıcıl 3 qələbə ilə yüksələn qrafikin davamını meydanda görmək olurdu.

Kevin Medina yersiz hərəkət üzündən meydandan qovulanda “Neftçi”nin yaxşı oyunu qolla taclandıracağını düşünmək olardı. Orta sahədə ciddi problem yaşayan ağdamlılar məcburi əvəzləmə üzündən Aleksey İsayevi də itirincə paytaxt təmsilçisinin əl-qolu açılmalı idi. Lakin Qurban Qurbanov taktikanı dəyişdi, ağıllı yerdəyişmələrlə azlıqda qalmalarını hiss etdirmədi.

Fasilədən sonra artıq “Qarabağ” üstün oynamağa başladı. Xarakter göstərən qonaqlar təhlükəli vəziyyətləri sıralamağa girişdi. Üstünlüyün rəqibə keçməsində Abasovun səhvlərinn də rolu oldu. Aqressiv oynayan, meydanın mərkəzində üstünlüyü təmin edən Edvin Kuçun əvəzlənməsi həlledici amil sayılmalıdır. Bəlkə də bu legionerin sarı vərəqə iləoynaması Samir bəyi ehtiyatlandırdı. Onun ardınca irəli xətdə hərəkətli olan Ağadadaş Salyanski və Filip Ozobiçin oyundan çıxması ilə vəziyyət dəyişdi. Əvəzetmədən meydana çıxanlar “Qarabağ”dan “oynamağa başladı”.

Qurbanovun Kadi Borgesi meydana buraxması ilə qonaqların üstünlüyü daha da artdı. Meydanın dərinliklərində, bəzən cinahda top qəbul edib cərimə meydançasına şığıyan braziliyalı epizodların birində istəyinə çatdı. Onun qazandığı penaltini dəqiq yerinə yetirən Marko Yankoviç derbinin qalibini müəyyənləşdirdi. Qələbənin azlıqda kən qazanılması onun dəyərini daha da artırdı.

Oyuna baxmağa gələn azarkeşlər peşman olmadı. Hər hissədə bir komanda üstün olsa da, gərgin mübarizənin şahidi olduq. Yekunda “Neftçi” yuxarı pillələrdən bir qədər də uzaq düşdü, “Qarabağ” isə növbəti çempionluğa doğru inamlı addım atdı. Bakılılar mövsümün əvvəli ilə müqayisədə müsbət siqnallar verməyə başlayıb. “Qarabağ” isə yayda azı 5-6 yaxşı transfer etməlidir, əks halda yeni çempionat daha çətin keçəcək.

FƏRİD

Futbolinfo.az xəbər verir ki, 2023-cü ilin yayında Tovuz klubuna gələn hücumçunun anlaşması mövsümün sonunda bitəcəkdi. Yeni müqavilə imzalamayan forvard, aldığı 11 təklifdən birini dəyərləndirmək niyyətində idi. Amma klubu onu azad agent kimi itirməkdənsə, elə indi sataraq pul qazanmağı lazım bilib.

“Turan Tovuz”un tələb etdiyi pulu yalnız “Al Madina” ödəməyə razılaşıb. Liviya klubu Oto Conun özünü də razı saldığından, anlaşma reallaşıb.

Nigeriyalı yeni klubunda aya 25 min dollar maaş alacaq. Bu, onun Azərbaycanda qazandığından bir neçə dəfə çoxdur. İlk ilində 4, bu mövsümdən 6 min dollar maaşa oynayan Otoya ümumilikdə heç 100 min xərclənməmişdi. Tovuzlular onu bu məbləğin iki qatına satmağı bacarıb.

“Turan Tovuz” forması ilə 56 oyunda meydana çıxan Oto Con kritik qollar vursa da, yerli publika və məşqçilər korpusu ondan tam razı deyildi. Qışda yeni hücumçuların alınmasının da səbəbi bu idi. Ona görə anlaşma qərblilərin ürəyincə olub. Hücumçunun Liviyanı seçməsi isə karyeranı yox, pulu düşündüyünü göstərir.

Təbii ki, Berdıyevə qədər də Azərbaycana xeyli məşhur əcnəbi məşqçi gəlib. Hətta sabiqlərin arasında türkmənistanlı çalışdırıcıdan daha çox tanınanlara da rast gəlmişik. Heç də ulduzların hamısı ölkəmizdə adından söz etdirə bilməyib. Bu mənada Berdıyevin də Azərbaycanda sözünü deyə bilib-bilməyəcəyi maraqla gözlənirdi.

72 yaşlı mütəxəssisin “Turan Tovuz”da işi hələ pis getmir. Tovuzlular ölkə kuboku ilə vidalaşsalar da, Misli Premyer Liqasında hazırda 4-cü pillədə qərarlaşıblar və 3-cü yerdən 1, 2-ci yerdən isə 7 xal geridədirlər. Berdıyevin rəhbərliyi altında Qərb təmsilçisinin qarşısına avrokuboklara vəsiqə qazanmaq tapşırığı qoyulub. Bu missiyanın öhdəsindən gələ bilsə, Azərbaycandakı ilk mövsümünü tam uğurlu keçirdiyini söyləyə biləcəyik.

Berdıyevlə bağlı əsas diqqətçəkən məqam onun gəlişindən bəri hazırda Azərbaycanın ən güclü məşqçisi sayılan adaşı Qurban Qurbanova uduzmamasıdır. Bəs “Turan Tovuz”un “sükanı arxasında” digər həmkarları ilə duellərdə üstünlük kimin tərəfindədir? Berdıyevin Azərbaycanda qalib gəlmək bir yana, hətta xal ala bilmədiyi mütəxəssis kimdir? Bu yazıda təcrübəli məşqçinin ölkəmizdəki 6 aylıq fəaliyyətinə nəzər salacağıq.

Azərbaycanda indiyədək 20 çempionat və 2 kubok görüşündə iş başında olan Berdıyev üçün ən böyük çətinliyi Qurban Qurbanovun yaşadacağı ehtimal olunsa da, statistika heç də bunu əks etdirmir. Buvaxtadək 3 dəfə qarşılaşan adaşların mübarizəsində Berdıyev hələ məğlubiyyət üzü görməyib. Belə ki, 2 dəfə Qurbanova qalib gələn (1:0, 2:1), özü də bunlara səfər matçlarında nail olan Berdıyev digər matçda heç-heçə (0:0) edib. Bu isə o deməkdir ki, Berdıyevin yetirmələri Qurbanovun komandasından 3 oyunda 7 xal qoparıblar. Əla göstəricidir!

Kurban Berdiyevin “Zirə”nin çalışdırıcısı Rəşad Sadıqovla qarşılaşmalarına nəzər salaq. Tərəflər buvaxtadək 2 dəfə üz-üzə gəliblər və bunlardan birində Berdıyev qələbə qazanıb (1:0), digərində isə heç-heçə qeydə alınıb (0:0). Ümumilikdə Berdıyev Sadıqovdan 4 xal götürüb.

“Turan Tovuz”un çalışdırıcısı komandanın sabiq baş məşqçisi, hazırda “Şamaxı”da yaxşı işlər görməyə çalışan Ayxan Abbasovla da buvaxtadək 2 dəfə üz-üzə gəlib. Şamaxıda baş tutan görüşdə heç-heçə (2:2) qeydə alınıb, Tovuzdakı matçdakı isə Berdıyev çətin də olsa, həmkarına qalib gəlməyi (3:2) bacarıb. Beləliklə, türkmənistanlı mütəxəssis Sadıqov kimi, Abbasovdan da 4 xal alıb.

Berdıyevin Azərbaycanda kabusuna çevrilən qorxulu rəqibi də var! Sevindirici haldır ki, həmin mütəxəssis azərbaycanlıdır. Söhbət “Araz-Naxçıvan”ın çalışdırıcısı Elmar Baxşıyevdən gedir. 44 yaşlı mütəxəssis təcrübəli həmkarının “gözünü qıra” bilib. Həm birinci dövrədə (2:1), həm də ikinci dövrədə (1:0) Berdıyevi üstələyən Baxşıyev türkmən mütəxəssisdən 2 oyunda maksimum xal (!) almağı bacarıb.

Berdıyevin Qərb derbisindəki statistikası da maraq doğurmaya bilməz. Buvaxtadək 3 dəfə “Kəpəz”lə üz-üzə gələn mütəxəssis rəqibin “sükanı arxasında” iki fərqli məşqçi ilə qarşılaşıb. Gəncə təmsilçisinin sabiq çalışdırıcısı Adil Şükürovla duel Berdıyevin 3:0 hesablı qələbəsi ilə nəticələnib. “Kəpəz”in hazırkı baş məşqçisi Azər Bağırovla ilk görüş də qocaman mütəxəssisin qalibiyyəti (2:1) ilə başa çatıb. Ancaq bu məşqçilərin 3-cü dövrənin ilk turuna təsadüf edən növbəti qarşıdurmasında Bağırov təcrübəli həmkarı üzərində böyükhesablı (5:2) qələbəyə sevinib. Beləliklə, Kurban Berdıyev Misli Premyer Liqasındakı 3 məğlubiyyətin ikisini Elmar Baxşıyevdən, birini isə Azər Bağırovdan alıb.

Təcrübəli çalışdırıcı iki fərqli məşqçinin “Neftçi”si ilə üz-üzə gəlib və hər iki oyundan 1 xalla ayrılıb. 1-ci tura təsadüf edən matçda Bakıda Roman Qriqorçukun komandası ilə qolsuz heç-heçə edən Berdıyevin “Turan Tovuz”u 18-ci turda Samir Abasovun “Neftçi”si ilə də sülh bağlayıb – 1:1.

Ancaq Berdıyevin üstələdiyi məşqçilər sırasında Abasovun da adı var. Bu, Samir Abasovun “Sumqayıt”ı çalışdırdığı dönəmə təsadüf edib. Həmin görüşdə Berdıyevin komandası 1:0 hesablı qələbəyə sevinib. “Rubin”in sabiq çalışdırıcısı “Sumqayıt”la ikinci qarşılaşmasında isə Vaqif Cavadovdan üstün olub (4:2).

Berdıyev “Səbail”də də iki məşqçini sınağa çəkib. Şahin Diniyevlə dueldə 1:0 hesablı qələbə əldə edən mütəxəssis “dənizçilər”lə ikinci görüşündə müvəqqəti baş məşqçi Elvin Məmmədovla xalları yarı bölüb – 1:1.

72 yaşlı çalışdırıcı “Sabah”ın “sükanı arxasında” da iki məşqçi görüb. O, çempionatdakı hər iki sınaqda “bayquşlar”ın sabiq baş məşqçisi Krunoslav Renduliçlə üz-üzə gəlib. Həm Bakıdakı (2:2), həm də Tovuzdakı matçda (1:1) sülh qeydə alınıb. Berdıyev “Sabah”ın hazırkı çalışdırıcısı Vasili Berezutski ilə isə ölkə kubokunda qarşılaşıb. Matçın əsas və əlavə vaxtında qalib müəyyənləşmədiyindən, penaltilər seriyasına ehtiyac duyulub, burada isə sevinən tərəf Berezutskinin komandası olub.

Kurban Berdıyevin Azərbaycandakı hələlik ən böyükhesablı qələbəsi isə Vüqar Nadirov üzərində olub. “Turan Tovuz” Nadirovun vaxtilə çalışdırdığı “Hypers Guba” komandasını (II Liqa)Azərbaycan Kubokunda 7:2 hesablı məğlubiyyətə uğradıb.

ABBAS

Hücumçu səfərdə “Qarabağ”a 2:1 hesabı ilə qalib gəldikləri qarşılaşmanın çətinliyindən də danışıb: “Çətin və maraqlı oyun oldu. Azərbaycanın ən yaxşı komandasına qarşı oynayırdıq. Bu qarşılaşmada yaxşı nəticə əldə etmək istəyirdik. Bunun üzərində çalışdıq və sonda qələbə qazandıq. İlk hissədə buraxdığımız qol bizi bir qədər ruhdan salsa da, vəziyyəti dəyişməyi bacardıq. İkinci hissədə daha yaxşı çıxış etdik və bəzi riskləri göz önünə alaraq irəlilədik. Nəticədə hər şey xeyrimizə yekunlaşdı”.

Oyunun son dəqiqələrində qalibiyyəti təmin edən qolu vuran Otto Con azarkeşlərə təşəkkür etməyi də unutmayıb: “Həmişə başımı aşağı salıb işimi görürəm və məşqlərimi davam etdirirəm. Oyuna sonradan daxil oldum və komandama kömək etməyə çalışdım. Son saniyələrdə vurduğum qol ilə komandamıza qələbə qazandırdığım üçün çox sevinirəm. Buradan azarkeşlərimizə təşəkkürümü bildirirəm. Uzaq məsafədən gəlib bizə dəstək olurlar. Artıq diqqətimizi digər oyunlara yönəltməliyik. Daha yüksək pillələrə qalxmaq və onları sevindirmək üçün əlimizdən gələni edəcəyik”.

GÜNAY SÜLEYMANOVA

Yarımmüdafiəçi ötən tur “Kəpəz”ə qarşı alınan 2:5 hesablı məğlubiyyətin komandaya dərs olduğunu vurğulayıb: “Çempionatımızda zəif komanda yoxdur. Lakin hər birimiz də bilirik ki, “Qarabağ” digərlərindən fərqlənir. Biz də hər oyuna “Qarabağ”a qarşı hazırlaşdığımız kimi çıxsaq, hər birində meydandan qələbə ilə ayrılarıq. Keçən tur Tovuzda turnir cədvəlində sonuncu pillədə qərarlaşan “Kəpəz”ə məğlub olduq. Bundan sonra məşqçimiz bizi bir az yüksək səslə ayıltdı. Arada belə də olmalıdır. Həmin oyunda sanki özümüzdə deyildik. Məncə, o məğlubiyyət bizə yaxşı dərs oldu ki, səfərdə “Qarabağ”a qqalib gəldik”.

25 yaşlı futbolçu gələn tur “Səbail”lə qarşılaşma öncəsi komandasının məqsədlərindən də danışıb:

“Gələn tur Tovuzda “Səbail” ilə qarşılaşacağıq. Çalışacağıq ki, azarkeşlərimiz önündə qələbə qazanaq. Rəqib fasilədən sonra yaxşı çıxış edir, çıxdıqları hər 2 oyunda qələbə qazanıblar. Bizim ən böyük motivasiyamız isə doğma meydanda azarkeşlərimizi sevindirməkdir. Çünki onlar bizi heç bir oyunda yalnız qoymurlar. Onları sevindirmək bizim üçün ən böyük uğurdur. Prezidentimiz və baş məşqçimiz qarşımıza Avropaya yollanmaq hədəfini qoyub. İnşallah, mövsüm sonu bu hədəfi yerinə yetirər, azarkeşlərimizi daha da sevindirərik”.

GÜNAY SÜLEYMANOVA

Futbolinfo.az PFL-in rəsmi saytına istinadən xəbər verir ki, IV turun 2024-cü il avqustun 24-də keçirilən matçında “Turan Tovuz”la ev matçında 0:1 hesabı ilə uduzan Qurban Qurbanovun yetirmələri yenə eyni rəqibə məğlub olub. Ardıcıl 16 qarşılaşmadan xalla ayrılan Ağdam klubu yenə evdə, bu dəfə 1:2 hesabı ilə yenilib.

“Turan Tovuz” “Qarabağ”la eyni mövsümün hər iki səfər görüşündə 3 xal qazanan 3-cü komanda olub. 2001/02 mövsümündə “Şəmkir” (3:1, 2:0), 2020/21 mövsümündə “Neftçi” (2:1, 2:1) Ağdam klubunun meydanında 6 xal əldə edib.

Qeyd edək ki, ölkə çempionatları 2013/14 mövsümündən 4 dövrədə keçirilir. Bunadək iki mərhələdə keçirilən 1998/99, yarımçıq qalan2001/02 və 2009/10-2012/13 mövsümlərində də bir komanda eyni rəqiblə iki dəfə səfərdə qarşılaşa bilib.