Futbolinfo.az UEFA-nın rəsmi saytına istinadən xəbər verir ki, Azərbaycan klubu 1:1 hesablı heç-heçə edərək mübarizəni dayandırsa da, oyun baxımından buna layiq deyilmiş.

Estoniyakı matçda olduğu kimi, Sumqayıtda da demək olar ki, meydanda futbol oynayan bir komanda olub. Təsadüfi deyil ki, “Zirə”nin futbolçuları düz 19 dəfə qapıya zərbə ilə yadda qalıblar. Təmsilçimiz bunun 8-də “çərçivə”yə düşsə də, rəqibi cəmi 1 dəfə məyus etməyi bacarıb.

Əvəzində “Payde” cəmi 2 dəqiq zərbə ilə yadda qalıb ki, bu da 1 qol vurmaq üçün kifayət edib. “Zirə” bütün göstəricilərdə “Payde”ni qabaqlasa da, bu, mərhələ adlamaq üçün yetərli olmayıb.

Zirə – Payde

Qollar – 1:1

Zərbələr – 19:5

“Çərçivə”yə zərbələr – 8:2

“Çərçivə”yə düşməyən zərbələr – 8:3

Bloklanan zərbələr – 3:0

Künc zərbələri – 9:1

Oyundankənar vəziyyət – 0:0

Sarı vərəqələr – 1:1

Cərimə zərbələri – 13:12

Püşk bu mövsüm klublarımıza elə rəqiblər bəxş etmişdi ki, qitə yarışlarına yollanan 4 klubumuzun hamısı 3-cü təsnifat mərhələsinə yüksəlməliydi. “Sabah” bunu bacardı, “Qarabağ” isə Avropa Liqasından Konfrans Liqasına yuvarlanmaqla siyahıya düşdü. “Zirə” ilə “Neftçi”…

Avrokubokda hər il eyni ssenari təkrarlanacaqsa, mövüm boyu ora yüksəlmək üçün mübarizə aparmağın nə mənası var? Büdcəni transferlərə xərcləməkdənsə, infrastrukturun qurulmasına, gənc nəslin yetişdirilməsinə diqqət ayırmaq daha yaxşı deyilmi? Bir mərhələ keçmək üçün milyonlar xərcləmək nəyə lazımdır?

Açığı, dünən ən azı iki klubumuzun növbəti mərhələyə yüksələcəynə ümid edirdim. İlk oyundakı axmaq səhvləri olmasaydı, “Neftçi”nin də belə şansı var idi. Püşk komandalarımıza ən pis halda bərabər səviyyəli, hətta zəif rəqiblər bəxş etdiyindən, nikbin düşünməyə əsas var idi.

“Zirə” öz səhvlərinin güdazına getdi. Səfərdə oyun üstünlüyünü nəticəyə çevirə bilməyən qəsəbə təmsilçisi Sumqayıtda da eyni aqibəti yaşadı. Erkən qolla ümumi hesabı bərabərləşdirən “qartallar” çoxsaylı qol imkanlarını boşa verdi, sonra isə rəqibin cavab qoluna imkan yaratdı. Hakim səhvi, bəxtsizlik, xırda nüanslar – bu uğursuzluğun bəraəti yoxdur. “Payde” keçiləsi rəqib idi və “Zirə” yalnız öz səhvlərini analiz etməli, bu qədər qol vəziyyətini 180 dəqiqə ərzində boşa verməyin səbəbini tapmalıdır.

“Neftçi” üçün avrokubok mövsümü başlayan kimi bitdi. Mübarizəyə ikinci mərhələdən başlayan bakılıların Minsk “Dinamo”sundan daha yaxşı olduğunu dünənki 1:0 hesablı matç da göstərdi. Amma ilk oyunda baş verənlər aqibəti müəyyənləşdirdi. Bakıda nələrin olduğunu bilmirik, lakin komandada işlərin qaydasında olmadığı dəqiqdir. “Cəbhələr müharibəsi”nin, yoxsa sırf fərdi səhvlərin nəticəsidir – bilmirəm, fakt oldur ki, “Neftçi” üstün olduğu rəqib tərəfindən qitə yarışlarından qovuldu.

Bu uğursuzluqda ən böyük pay sahibi Yuri Vernidub sayılmalıdır. Onun ev oyununda güvəndiyi heyət yanlış idi, dünən etdiyi dəyişikliklərlə səhvini özü də etiraf etmiş oldu. Amma nə fayda, qatar getdi. İndi bir neçə gün tənqid eşidəcək, ardınca yeni mövsümə komanda hazırlayacaq. İlləri belə yola vermək olmaz, bəzi şeyləri nizama salmaq lazımdır. “Neftçi” bir əldən idarə olunmayınca əvvəlki nüfuzunu qaytara bilməyəcək, ən yaxşı halda Konfrans Liqasına vəsiqə üçün döyüşəcək.

“Qarabağ” da uduzmayıb sıradan çıxarılanlar siyahısındadır. ÇSKA bəlkə də rəqiblərin içində ən güclüsü idi, lakin bu, ağdamlılara bəraət vermir. Bolqarıstan təmsilçisi bir az dişli çıxdı və Qurban Qurbanovun yetirmələri büdrədi. Saysız qol vəziyyətləri, üstün oyun – bunları sadalamağa dəyməz, tarixdə nəticə qalır.

Əslində, “Qarabağ”ın heyətdə ciddi islahat aparmasının fəsadı olmalı idi. Yenilər heyətə uyğunlaşana kimi qəzalar gözləniləndir. Amma Qurbanov aylardır özünü doğrulda bilməyən Aleksey Kaşuka israrla güvənməyə davam edirsə, uğrusuzluğa ayaq vermiş olur.

Komanda 4 oyunda top buraxmayıb, Avropa Liqasını penaltilərdən sonra tərk edib. Bəlkə də bunu müsbət amil saymaq olar. Amma sofiyalılara 180 dəqiqə ərzində qol vura bilməmək də düşündürücüdür. Komanda toparlanmasa, Konfrans Liqasından uzaqlaşacağı gün də uzaqda deyil. Növbəti rəqib olan Kiyev “Dinamo”su hazırda yaxşı vəziyyətdə olmasa da, ənənəsi olan rəqibdir və “Qarabağ”ı hətta pley-offa buraxmaya bilər.

Bəlkə də ironik taledir. Dünən klublarımızın heç biri uduzmadı. Amma iki heç-heçə və bir qələbə ilk oyundakı eyibləri örtməyə imkan vermədi və təmsilçilərimizin hamısı məğlub sayıldı. Avrokubok mövsümü “Sabah”ın ümidinə qaldı. Ötən illərdə bu missiyanı “Qarabağ” yerinə yetirirdi, indi isə dəyişən çempion iş başındadır. Ağdamlılar növbəti iki rəqibi məğlub edib qruplara qalsa, həm seryasını davam etdirər, həm də reytinq xalları baxımından daha ümidli olarıq. Bunu bacarmasalar, uzun marafon təcrübəsi olmayan tək “Sabah”la işimiz çətin olacaq.

ABBAS

Futbolinfo.az xəbər verir ki, “Qarabağ” Avropa Liqasında, “Zirə” ilə “Neftçi” isə Konfrans Liqasında səhnə alacaq.

Hamıdan öncə “Zirə” meydana çıxacaq. Estoniyada “Payde”yə minimal hesabla uduzmuş Rəşad Sadıqovun komandası Sumqayıtdakı cavab görüşündə revanş almağa və mərhələ adlamağa çalışacaq.

Digər iki təmsilçimizi isə çətin səfər görüşləri gözləyir. Xüsusilə də evdəki ilk oyunda Belarusun “Dinamo” (Minsk) komandasına 2:4 hesabıyla uduzan “Neftçi” Bolqarıstanda baş tutacaq cavab görüşündə çox çətin vəzifənin öhdəsindən gəlməyə çalışacaq.

Son olaraq “Qarabağ” Bolqarıstanın ÇSKA (Sofiya) komandası ilə cavab görüşündə mərhələ adlamaq üçün vuruşacaq. Qurban Qurbanovun kollektivi Bakıdakı ilk görüşdə qolsuz heç-heçəyə razılaşıb. Bu üzdən istənilən hesablı qələbə “Qarabağ”ı növbəti raunda daşıyacaq.

Konfrans Liqası
2-ci təsnifat mərhələsinin cavab oyunları
30 iyul

20:00. Zirə – Payde
Baş hakim: Patrik Kolariç (Xorvatiya).
Sumqayıt şəhər stadionu.

21:00. Dinamo (Minsk) – Neftçi
Baş hakim: Tim Marşall (Şimali İrlandiya).
Beroe şəhər stadionu.

Avropa Liqası
2-ci təsnifat mərhələsinin cavab oyunu
30 iyul

22:00. ÇSKA (Sofiya) – Qarabağ
Baş hakim: Van Driessşe (Belçika).
Sofiya. Vasil Levski stadionu.

Futbolinfo.az xəbər verir ki, mütəxəssis əvvəlcə matçla bağlı fikirlərini bölüşdü:

– Azarkeşlərimizin qarşısında oynayacağıq. Əlimizdən gələni edəcəyik ki, qalib gələk, mərhələ keçək. Rəqibin müəyyən üstünlüyü var. Ən yaxşı oyunlarımızdan birini keçirib, qələbə qazanmağa çalışacağıq.

– “Payde” “Torpedo”dan daha güclü idi?
– Bəzi suallara istədiyim kimi cavab verə bilməyəcəyəm. Rəqib də bizi təhlil edir, verdiyimiz açıqlamalara baxırlar. İki komandanın da üslubu bir-birinə bənzəyir. Lakin fərqli oyunlar alındı. Bəzi sualların cavabını sabah açıqlayarıq. İlk matçda oyun istədiyimiz kimi gedirdi, yaxşı görünən tərəf biz idik. Lakin rəqib nəticəyə oynamağı bacardı və əlinə düşən bir imkandan maksimum yararlandı. Çoxsaylı hücumlarımızı qola çevirə bilmədik. “Payde” müəyyən dəqiqələrdə təzyiqi artırıb, fərqlənməyə çalışırdı. Son 10 dəqiqə isə istəmədiyimiz şəkildə keçdi. Çoxlu standartlar oldu və sonda bir qol vura bildilər. Avrokuboklarda təcrübəliyəm. Burda asan matç yoxdur. Bir oyunu tam üstün oynaya bilərsən, amma rəqib də bir imkandan yararlanır. Belə matçlarda yaxşı oyun kifayət etmir, nəticə də qazanmalısan. “Payde” təcrübəli rəqibdir, yaxşı məşqçiləri də var. Əlimizdən gələni edəcəyik ki, planlarımız işləsin.

– Turu keçəcəyiniz təqdirdə, hansı rəqiblə qarşılaşmaq istərdiniz?
– Bu haqda düşünmürəm. Bütün diqqətim “Payde”dədir. “Torpedo” ilə duellərdə də belə idim. Bu gün məğlub tərəfik, növbəti rəqibi düşünməyə haqqımız yoxdur. Sabahkı oyunda nəticəni xeyrimizə çevirməliyik.

– Sabah öz üslubunuza sadiq qalacaqsınız, ya fərqli sistemi yoxlayacaqsınız?
– Aşağı-yuxarı eyni ssenari olacaq. Ola bilsin, rəqib daha ürəkli oynasın. Çünki ötən matçda ikinci hissədə təzyiq göstərib, irəli atıla bilirdilər. “Payde”nin planı necə olacaq, bilmirəm. İstəklərimiz var, çalışacağıq ki, ilk dəqiqələrdən oyunumuzu oynayaq.

– İssa Cibrilla bu mövsüm yaxşı görünmür. Nəsə problemi var?
– Bütün məsələləri diqqətlə təhlil edirik. Kubokun finalından sonra dedilər ki, nə üçün Cibrillanı əvəzlədiniz? Biri var sual, biri var qınaq. İssa ötən il altı dəfə zədələnib. Bir dəfə 4, bir dəfə 1 ay, bir dəfə 3 həftə buraxıb. Son olaraq finalda zədə aldı və bir aylıq bərpa keçdi. Hələ tam formasında deyil. Düşünürəm ki, sabahkı oyunda ona çox ehtiyacımız olacaq. Ümid edirəm ki, bütün futbolçular mövsümün ən yaxşı oyunlarından birini keçirər.

– Yeni gənc futbolçular heyətə cəlb etmisiniz. “Yeni Suma” axtarışındasınız?
– Futbolçuların potensialına inansaq, heyətə dəvət edəcəyik. Ötən il Abdul Azizi transfer etdik, yaxşı da oynayırdı, amma sonra ciddi zədə aldı. Smit və Kris də gəncdir, onların potensialına inanıram. Birinci Sumanı, birində Cibrillanı axtarırıq. Ümid edirəm ki, onlar da parlaya biləcəklər. İkisinin də ilk peşəkar komandası bizik. Əlimizdən gələni edəcəyik ki, özlərini aça biləcəklər.

– Transferlər bitib?
– Xeyr, hələ 4-5 legioner olacaq. Avrokuboklara görə çempionatı qurban verməyəcəyik. İzlədiyimiz oyunçular var. Fürsətdən istifadə edib, “Sabah”ı təbrik edirəm. Digər komandalarımıza – “Qarabağ”, “Neftçi”yə uğurlar arzu edirəm. İnşallah, bütün komandalarımız əsas mərhələdə olarlar. Bu, futbolumuz üçün böyük təkan olar. (Futbolpress)

Futbolinfo.az UEFA-nın rəsmi saytına istinadən xəbər verir ki, nəticə heç də oyuna görə olmayıb.

Belə ki, təmsilçimiz son dəqiqələrdə buraxdığı qolla 0:1 hesabı ilə uduzsa da, oyun baxımından daha üstün nəzərə çarpıb. Qol vəziyyətlərinin sayı belə deməyə əsas verir. Təmsilçimizin 10 cəhdi fonunda meydan sahibləri ümumilikdə 7 zərbə ilə yadda qalıblar.

Payde – Zirə

Qollar – 1:0

Zərbələr – 7:10

“Çərçivə”yə zərbələr – 5:5

“Çərçivə”yə düşməyən zərbələr – 2:4

Bloklanan zərbələr – 0:1

Künc zərbələri – 7:3

Oyundankənar vəziyyət – 0:2

Sarı vərəqələr – 2:1

Cərimə zərbələri – 14:18

İlk 7 oyundakı ardıcıl qələbələrə “Neftçi”nin ev məğlibuyyəti ilə son qoyuldu. Dünən isə iki komandamız qol vurmağı belə bacarmadı. “Zirə”nin səfərdə uduzması, “Qarabağ”ın evdə heç-heçəyə razılaşması heç də sürpriz sayılmamalıdır. Rəqiblər çətinləşdikcə hətta ardıcıl məğlubiyyətləri də görəcəyik.

Komandalarımızın sıralanan qələbələri püşkdə bəxtimizin gətirməsi ilə bağlı idi. Bunun nəticəsndə ilk mərhələdə bütün rəqiblər asanlıqla keçmək mümkün oldu. Artıq ikinci mərhələdəyik və problemlər başlayıb. “Neftçi”, “Zirə” və “Qarabağ”ın qələbəyə həsrət qalması bir yana, “Sabah” da münasib rəqibi çətinliklə yendi.

Digər iki oyundan bəhs etmişik, dünənki qarşılaşmaların üzərində dayanmağa isə dəyər. Xüsusilə “Torpedo”nu 3:0-larla keçən “Zirə”nin gürcülərdən çox da güclü olmayan “Payde”yə uduzması xoşagəlməzdir. Oyunun gedişi bu komandanı məğlub etməyin mümkünlüyünü göstərdi. Estonlar 90 dəqiqə ərzində qonaqların matça diqtə etməsi ilə razılaşdı, son anlarda fəallığı qismən artırıb qol vurmağı bacardı. Rəşad Sadıqov aşkar üstünlüyü nəticəyə çevirməyin niyə mümkün olmadığı sualının cavabını tapsa, evdə bu rəqibi darmadağın da etmək olar.

İstənlən halda, qəsəbə təmsilçisi evdə ilk növbədə 0:1-in əvəzini çıxmağa çalışacaq. Müdafiədə diqqətli, hücumda amansız olmaq şərtdir. Çünki estonlar daha bir qol vursa, revanş daha çətin olacaq.

“Qarabağ”a gəlincə, ÇSKA-nın öndə pressinq etməsi faydasını verdi. Ağdamlılar özünə gələndə artıq matçın yarıdan çoxu geridə qalmışdı. Bolqarlar ilk bir saat ərzində yalnız müdafiə olunmadı, təmsilçimizi öz yarımmeydanına çıxdı, üslubunu tətbiq etməyə imkan vermədi. Yalnız Qurban Qurbanovun dəyişikliklərindən sonra vəziyyət dəyişdi, o zaman isə çox gec idi.

“Qarabağ” Sofiya təmsilçisindən güclüdür. Yəqin ki, cavab matçında bunu daha çox hiss edəcəyik. Yeni legionerlər heyətə uyğunlaşmada yubandığı üçün hələ ağdamlılar tam gücünü göstərə bilmir. Komandanın önünə ÇSKA kimi möhkəm komanda çıxanda isə problemlər yaranır. Qurban Qurbanovun yetirmələri səfər matlarında hər nə qədər yaxşı oynasa da, Bolqarıstanda vəziyyət fərqli olacaq. ÇSKA doğma meydanda daha cəsarətli oynayacaq.

Hələ heç nə bitməyib, “Qarabağ”ın da, “Zirə”nin də cütün taleyini həll etmək üçün imkanı var. Təkcə o dəqiqdir ki, mərhələlər keçildikcə daha güclü rəqiblər qarşıya çıxır və klublarımızın seriyasının heç də fantastik formada olduqları üçün reallaşmadığı aydınlaşır. Növbədi həftə daha gərgin keçəcək.

FƏRİD

Son illərdə Estoniya futbolunun sabit komandalarından biri olan “Payde”nin heyətində yerli futbolçularla yanaşı, Braziliya və Qambiyadan olan legionerlərə də geniş yer ayırıb. Komandanın əsas məqsədi sürətli keçidlər, fiziki mübarizə və cinahlardan istifadə etməklə rəqibə problem yaratmaqdır.

2026-cı ilin aprelindən etibarən komandaya Estoniya millisinin sabiq futbolçusu Tarmo Kink rəhbərlik edir. O, əvvəlcə köməkçi məşqçi olub, daha sonra baş məşqçi səlahiyyətlərini icra etməyə başlayıb.

Qapı xəttində komandanın iki əsas seçimi təcrübəli Marko Meerits və qambiyalı Ebrima Jarjudur. Xüsusilə Jarju son oyunlarda əsas heyətdə meydana çıxaraq etibarlı çıxışı ilə seçilib.

Müdafiədə Estoniya millisinin sabiq üzvü Nikita Baranov əsas fiqurlardan hesab olunur. Onun yanında braziliyalı Viktor Hüqo çıxış edir. Cinahlarda Mikael Lilander və Edqar Tur həm müdafiədə, həm də hücumlara qoşulmaq baxımından komandanın vacib oyunçularıdır. Gerdo Yuhkam, Pedro Andrade Drozina, Hindrek Oyamaa, Kevin Coşua Kanne və Romet Niqula isə müdafiə rotasiyasını formalaşdırırlar, desək, daha doğru olar. Müdafiə xəttində həm təcrübə ön plana çıxır, həm də fiziki güc öz sözünü deyir.

Yarımmüdafiədə oyunun ritmini əsasən Martin Miller və braziliyalı Daniel Kabral müəyyənləşdirirlər. Oskar Höim, Ramon Smirnov, Henri Lehtmaa, Aleksandr Şurögin və Pa Abdu Çam isə mərkəzdə alternativ seçimlərdir. Komandanın kapitanı Henrik Oyamaa həm yarımmüdafiədə, həm də hücum xəttinə yaxın zonalarda çıxış edə bilən ən təcrübəli futbolçulardan biridir. Uzun illər müxtəlif ölkələrdə çıxış etmiş Oyamaa komandanın liderlərindən hesab olunur. Amma Şotlandiyanın “Mozervell” və Polşanın “Legiya” ilə “Vidzev” komandalarıbnın şərəfini qorumuş 35 yaşlı veteran futbolçu Litvanın “Hagelman” komandaları ilə oyunlarda heyətə düşə bilmədi.

Hücum xəttində ən tanınmış ad Henri Anierdir. Estoniya millisinin uzun illər əsas hücumçularından biri olmuş Anier 2025-ci ildə Avropanı və Uzaq Şərqi gəzib yenidən “Payde”yə qayıdıb və komandanın ən təcrübəli futbolçularından biri sayılır. Onun ətrafında qambiyalı Abdurahman Badamosi, Momodu Jobarte və Pa Modu Sohna, həmçinin Uilyam Lins, Siim və Daniel Luts qardaşlıarı  və Kristofer Pit kimi oyunçular hücum potensialını artırırlar. Xüsusilə Badamosi və Sohna sürətləri və fərdi mübarizələri ilə diqqət çəkən futbolçular hesab olunurlar.

Tarmo Kink baş məşqçi təyin olunduqdan sonra “Payde” sabit bir oyun modelinə tam keçməsə də, son görüşlərdə əsasən 4-3-3 və 4-2-3-1 sxemlərindən istifadə edib. O, qapanmaq lazım gələndə daha ehtiyatlı 5-4-1 düzülüşünə üstünlük verir. Bu da göstərir ki, Kink rəqibdən asılı olaraq taktiki dəyişikliklər etməyə meyillidir.

Rəşad Sadıqov “Torpedo” ilə ikinci oyundan sonra Dirk Şusterin onu aldatdığını söylədi. Kink də eyni hoqqalardan çıxa bilər.

Komanda topa uzun müddət sahib olmaqdan daha çox, onu qazandıqdan sonra sürətli hücuma çıxmağa çalışır. Cinah müdafiəçilərinin irəli qoşulması və hücumçuların boş zonalara hərəkəti “Payde”nin əsas hücum silahlarından biridir. Standart vəziyyətlərdə isə uzunboylu müdafiəçilərin irəli çıxması əlavə təhlükə yaradır.

Müdafiədə “Payde” adətən sıxlıq yaratmağa üstünlük verir və rəqibi mərkəzdən deyil, daha çox cinahlara yönəltməyə çalışır. Top itkisindən sonra bütün komanda ilə yüksək pressinq tətbiq etməkdənsə, mövqeləri qorumağa cəhd edirlər. Buna görə də sürətli kombinasiya və dəqiq ötürmələrlə oynayan komandalar onların müdafiə xəttinin arxasında boşluqlar tapa bilirlər.

“Payde” balanslı və fiziki cəhətdən yaxşı hazırlıqlı kollektiv təsiri bağışlayır. Heyətdə Estoniya millisində çıxış etmiş futbolçuların olması komandanın təcrübəsini artırır, braziliyalı və qambiyalı legionerlər isə sürət və fərdi keyfiyyət baxımından hücum xəttinə dinamika qatırlar. Bununla yanaşı, komandanın oyun modeli daha çox keçid hücumlarına əsaslandığından, topa nəzarəti sevən və sürətli kombinasiyalar quran rəqiblərə qarşı çətinlik yaşaya bilir.

“Zirə” üçün əsas diqqət tələb edən futbolçular Henrik Oyamaa, Henri Anier, Martin Miller, Daniel Kabral və Nikita Baranov olacaq. Qarşılaşmanın taleyində mərkəz zonasında mübarizə, cinahların effektiv istifadəsi və standart vəziyyətlərdən maksimum faydalanmaq həlledici rol oynaya bilər. Amma onları məğlub etməyin yolunu tapmaq çətin olmamalıdır. “Zirə”nin heyəti daha keyfiyyətli futbolçulardan qurulub. Sadəcə, meydanda qaçmaq və döyüşmək lazımdır!

ABBAS

Futbolinfo.az UEFA-nın rəsmi saytına istinadən xəbər verir ki, Azərbaycan təmsilçisi 3:0 hesablı qələbə qazansa da, matçda cüzi üstünlüyə malik olub. Qapıya doğru və “çərçivə”yə zərbələrdə güc nisbətləri çox yaxın olub.

“Torpedo” – “Zirə”

Qollar – 0:3

Zərbələr – 10:12

“Çərçivə”yə zərbələr – 3:3

“Çərçivə”yə düşməyən zərbələr – 5:9

Bloklanan zərbələr – 2:0

Künc zərbələri – 4:2

Oyundankənar vəziyyət – 0:1

Sarı vərəqələr – 0:1

Cərimə zərbələri – 14:16

2004-cü ildə yaradılan “Payde Linnameeskond” Estoniyanın Payde şəhərini təmsil edir. Klub fəaliyyətə aşağı liqadan başlayıb və cəmi dörd il ərzində ardıcıl yüksələrək 2009-cu ildə ölkənin yüksək liqasına vəsiqə qazanıb. Həmin vaxtdan bəri komanda Meistriliqanı tərk etməyib və hər mövsüm elitada mübarizə aparıb.

İlk illərdə əsas məqsədi yüksək liqada möhkəmlənmək olan “Payde” zaman keçdikcə inkişaf edərək Estoniyanın güclü kollektivlərindən birinə çevrilib. Komanda 2014/15 mövsümündə ölkə kubokunun finalına yüksəlsə da, həlledici oyunda məğlub olub. Əsl yüksəliş isə Vyaçeslav Zaxovaykonun baş məşqçi olduğu dövrdə başlayıb. Klub peşəkar idarəetmə modelinə keçib, 2020-ci ildə ölkə çempionatının gümüş mükafatını qazanıb və tarixində ilk dəfə avrokuboklara vəsiqə əldə edib.

“Payde” Avropa arenasında debütünü 2020-ci ildə UEFA Avropa Liqasında edib. Daha sonra UEFA Konfrans Liqasında ilk uğurlu nəticələrini qazanan Estoniya təmsilçisi Gürcüstanın “Dinamo” (Tiflis) və Ermənistanın “Ararat-Armeniya” klublarını penaltilər seriyasında məğlub edərək növbəti mərhələyə yüksəlib. Komandanın həmin mövsümdə Belçikanın “Anderlext” klubu ilə qarşılaşması da Avropa təcrübəsinin artmasına töhfə verib.

Klub tarixinin ilk böyük kubokunu 2022-ci ildə qazanıb. “Payde” Estoniya Kubokunun finalında “Nımme Kalyu”nu əlavə vaxtda vurulan qolla məğlub edərək tarixində ilk titulunu əldə edib. Bir il sonra isə Estoniya Superkubokunu qazanaraq növbəti uğurunu rəsmiləşdirib.

Son illərdə klubun inkişafı yalnız meydandakı nəticələrlə məhdudlaşmayıb. “Payde” Qambiyanın “Real de Banjul” klubu ilə əməkdaşlıq quraraq Afrika futbolçularının Avropaya çıxış platformalarından birinə çevrilib. Vaxtilə İngiltərənin “Liverpul” klubunda çıxış etmiş Estoniya millisinin sabiq kapitanı Raqnar Klavanın komandaya transferi də klub tarixinin ən diqqətçəkən hadisələrindən biri olub. 2025-ci ildə isə Abdulie Cisseyin Almaniyanın “Sankt Pauli” klubuna keçidi Estoniya futbolu üçün tarixi transfer kimi qiymətləndirilir.

“Payde” hazırda ev oyunlarını süni örtüklü stadionunda keçirir. UEFA tələblərinə cavab vermədiyi üçün isə avrokubok matçlarını daha böyük arenalarda oynayır. Klub rəhbərliyi yaxın illərdə 4500 azarkeş tutumuna malik yeni stadion inşa etməyi planlaşdırır ki, bu da komandanın uzunmüddətli inkişaf strategiyasının bir hissəsidir.

Tarixinə görə “Payde” Estoniya futbol tarixinin siması olmasa da, son illərdə göstərdiyi inkişaf və müntəzəm avrokubok çıxışları onun iddialı rəqibə çevrildiyini sübut edir. Məhz buna görə də “Zirə” bu qarşılaşmalara tam hazırlıqlı çıxmalı olacaq. Estoniya təmsilçisi gənc, dinamik və sürətlə inkişaf edən kollektiv təsiri bağışlayır ki, bu da Konfrans Liqasının ikinci təsnifat mərhələsində maraqlı mübarizə vəd edir.

TAHİR MİRZƏ

Futbolinfo.az xəbər verir ki, mütəxəssislər Kutaisi “Torpedo”su ilə keçiriləcək qarşılaşmanı dəyərləndiriblər.

Ekspertlərin demək olar ki, hamısı “Zirə”nin mərhələ adlayacağına əmindir. Bakılıların ilk matçda 3:0 hesablı qələbə qazanması və “Torpedo”nun son vaxtlar Gürcüstan çempionatında uğursuz nəticələri belə düşünməyə əsas verib.

“Torpedo” doğma azarkeşləri önündə rəqibinə yalnız müqavimət göstərə bilər. Ancaq komanda daxili birincilikdə bənzər rəqiblərə eyni ssenarilərlə məğlub olur. Nəzərə alaq ki, “Zirə” də sürətli əks-hücumları sevən kollektivdir. “Torpedo”nun etibarsız müdafiə xətti də azərbaycanlılar üçün əla fürsətdir. Bu səbəbdən “Zirə”nin səfərdə də qalib gəlməsi olduqca realdır”, – deyə araşdırmada bildirilib.

Qeyd edək ki, Kutaisidəki “Şengelia Arena”da keçiriləcək matç Bakı vaxtı ilə saat 20:00-da başlayacaq.