Tovuzluların qələbə həsrəti – bu dəfə rəqibə özləri yardım etdi

Sumqayıtda daha yaxşı oynayan, 3 xala daha çox layiq olan qələbə qazandı. Ötən tur “Qarabağ”la başabaş mübarizə aparan “Turan Tovuz” bu gün həmin komandanın kölgəsini belə xatırlatmırdı. Və qonaqların belə sönük oyunu “Sumqayıt”ın meydanda istədiyini eməsinə şərait yaratmışdı.

Ümumiyyətlə, qərblilərin zəif oyunu fərdlərə bağlı deyildi. “Turan Tovuz” komanda halında bərbad təsir bağışladı. Xəttlərarası əlaqə çox bərbad, hücumla müdafiə arasında hissolunacaq dərəcədə boşluq var idi. İlk yarıda hücumçular öndə pressinq etməklə komanda oyununa fayda verirdisə, fasilədən sonra onlar yalnız uzun ötürmələri qəbul etməklə məşğul oldular. Bu da yarımmüdafiənin işinin öhdəsindən gəlməməsinin nəticəsi idi.

Lakin hətta bu oyunla da xal qazanmaq olardı. Komanda hər nə qədər bərbad oynasa da, kifayət qədər qol epizodu yaratdı. Həmin şanslardan faydalanmaq mümkün olsaydı, ən azı heç-heçənin qeydə alınması mümkün idi.

“Turan Tovuz” faktiki hər iki qolu özü özünə vurdu. İlk epizodda qapıçı Tərlan Əhmədli uşaq səhvi sayəsində hesabın açılmasına töhfə verdi. Komanda standart zərbədən sonra cavab qolunu vursa da, bu dəfə “qəhrəmanlıq” etmək növbəsi Şəhriyar Əliyevə çatdı – mərkəz müdafiəçisi sadə epizodda topu itirib sumqayıtlıların yenidən önə çıxmasına şərait yaratdı.

“Sumqayıt” bu qələbə sayəsində bir qədər rahat nəfəs ala biləcək. Mövsümdə əldə edilən 3-cü qələbə “kimyaçılar”a ən azı bir rəqibi geridə buraxmağa imkan verəcək. Bu turda “Kəpəz”lə “Səbail” üz-üzə gəlir və Bayılda heç-heçə Samir Abasovun yetirmələri üçün daha sərfəli olar.

Mövsümə yaxşı başlayan “Turan Tovuz” isə mütləq toparlanmalıdır. Komandanı son pillədən cəmi 7 xal ayırır. Qərblilər son qələbəsini məhz “Sumqayıt” üzərində – 8 tur əvvəl qazanıb. Gələn həftə Şamaxıda da uğursuzluq qeydə alınsa, komanda 6-cı pillə ilə vidalaşıb zirzəmiyə yaxınlaşacaq. Sindroma son qoymaq üçün “Şamaxı” və “Kəpəz”ə qarşı matçlar həlledicidir. Çünki daha sonra “Sabah” və “Zirə” kimi çətin rəqiblərlə oyunlar var.

FƏRİD