Digər idman növləri
Xoşagəlməz presedent və ya Usmanovun Məmmədova faydası
Beynəlxalq Qılıncoynatma Federasiyası onlayn şəkildə keçirdiyi iclasda Rusiya və Belarus idmançılarının yarışlarda iştirak etməsinə icazə verib. Bu addım keçən il baş verən hadisələrin tam əksidir.
Rusiya – Ukrayna müharibəsi başlayandan sonra bütün federasiyalar rus və Belarus atletlərin çıxışlarına qadağa qoymuşdu. 21-ci əsrdə, bəlkə də, ilk dəfə idi ki, idman bu cür siyasətin qurbanına çevrilmişdi və dünyanın əksər ölkələri bu qadağaya razı idi. Sonuncu dəfə siyasətlə idmanın bu qədər qarışdığını 1980 və 1984 Olimpiadalarında görmüşdük.
İclasda səsvermədə 84 ölkə qadağanın ləğvinə qərar verdi, 49 ölkə isə hələ də rus və Belarus idmançıların qayıtmasını istəmir. Lakin səs çoxluğu ilə artıq qərar qəbul edilib. Aprel ayından etibarən Rusiya və Belarus atletləri beynəlxalq yarışlarda iştirak edə biləcəklər.
Məsələnin hansı səbəbdən baş verdiyni aydınlaşdırmağa çalışaq. Bunun üçün federasiyanın rəhbərinin kimliyini bilmək lazımdır. Son 20 ildə FİE-nin prezidenti Əlişir Usmanovdur. Keçənilki hadisələrdən sonra sanksiyaya düşən Usmanov prezidentlik funksiyasını dondurub. Bu, faktiki olaraq belədir, amma, əslində, federasiya yenə də onun maliyyəsi və əmrləri ilə idarə edilir.
Burada başqa vacib bir məsələni də qeyd etmək lazımdır. Qılıncoynatma elə də populyar idman növü olmadığından rentabelli deyil. Bu cür idman növlərinin ayaqda durması üçün mesenatlara gərək var. Son illərdə özbək oliqarx bu yükü üzərinə götürüb. Məhz onun sayəsində dünya və qitə çempionatları problem olmadan keçirilir və yarışlar digər idman növləri ilə rəqabət aparmağa cəhd göstərir. Buna görə dünyanın bütün muşketyorları Əlişir Usmanova minnətdar olmalıdırlar.
Beləliklə, qərar verilib. Həmyerlimiz İlqar Məmmədovun rəhbərlik etdiyi Rusiya Qılıncoynatma Federasiyasının idmançıları gələnilki olimpiadada çıxış etməyə də artıq ümidlidirlər. Lakin məsələnin digər bir tərəfini də nəzərdən qaçırmaq olmaz. Əleyhinə səs verən ölkələrin idmançıları ruslar və belaruslarla yarışmaqdan imtina edəcəkləri halda nə olacaq? Əgər belə hal tək-tük olsa, ciddi bir təsirə malik olmayacaq. Əgər kütləvi hal alarsa, necə olacaq? Bundan başqa, yarışlar Avropa ölkələrində keçirildikdə viza məsələsi həllini necə tapacaq? Azarkeşlərin onlara qarşı reaksiyasını da yaddan çıxarmaq lazım deyil.
İstənilən halda, FİE-nin bu qərarı yeni presedentə yol aça bilər. Nəzərə almalıyıq ki, rus oliqarxların maliyyələşdirdiyi bir neçə federasiya var. Qarşıdakı vaxtlarda həmin federasiyaların da belə bir addım atacağını gözləmək olar. İlk növbədə boks və şahmatdan belə bir qərar gələ bilər. Ardınca isə digər federasiyalar və BOK da düşünəcək.
İstənilən halda, idmançıların müharibəyə heç bir aidiyyəti yoxdur, lakin bu müharibəni dəstəkləyirlərsə, onların da bu sivil dünyada yeri yoxdur.
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Premyer-liqa2024-04-12 20:56
“Sumqayıt”la “Zirə”dən heç-heçə