Ölkə futbolu
“Zirə” və “Neftçi”yə qalib gəlməyə gücümüz çatar”
“Biz komandamıza inanırıq. Düzdür, qrafikimiz çətindir. Amma ardıcıl olaraq “Zirə” və “Neftçi” ilə matçlarda qalib gəlməyə çalışacağıq. Buna gücümüz çatar. Maksimumuzu ortaya qoyacağıq”. Bunu futbolinfo.az saytına açıqlamasında “Qəbələ”nin yarımmüdafiəçisi Stefan Vukçeviç deyib.
O, komandanın qarşıdakı oyunlarından danışıb. Monteneqrolu yarımmüdafiəçi “Qəbələ”nin son qarşılaşmalarda qələbə üzünə həsrət qalmasından da söz açıb: “Razıyam ki, son oyunları yaxşı oynamırıq və nəticələr də yaxşı deyil. Lakin bu, futboldur və bəzən bu cür hallarla üzləşirsən. Təbii ki, heç də yaxşı hal deyil. Amma dediyim kimi, komandamıza inanıram və düşünürəm ki, biz geridönüş edib əvvəlki çıxışımızı ortaya qoyacağıq. Düşünürəm ki, son 5 matçda bütün gücümüzü ortaya qoyub nəticələrimizi yaxşılaşdıra bilərik”.
Vukçeviç komandanın çempionata yaxşı başlamasından və sonrakı düşüşdən danışıb: “Liqaya yaxşı başlamışdıq. Avrokuboklar uğrunda mübarizə aparırdıq. Amma indi vəziyyət dəyişib. Düşünürəm ki, bundan sonrakı durum özümüzdən asılı olacaq. Öz ən yaxşı oyunumuzu ortaya qoysaq, yenə yüksək yerlərə qalxacağıq”.
Təcrübəli futbolçu komandanın motivasiyasının hazırda aşağı olmasına toxunub: “Ola bilər ki, motivasiyamız aşağıdır. Amma istənilən halda biz birlikdə güclü olmalıyıq, güc toplamalıyıq. Mən inanıram ki, “Qəbələ” keyfiyyətini ortaya qoyacaq”.