Moldovanın "Tiraspol" klubunun hücumçusu Georgi Ovsyannikov Avropa Liqasının birinci təsnifat mərhələsi çərçivəsində "İnter"ə qarşı keçirdikləri ilk oyundan sonra fikirlərini açıqlayıb. Futbolinfo.az xəbər verir ki, o, komandasının 2:3 hesablı məğlubiyyətini belə şərh edib:
"Elə alındı ki, biz erkən qol vura bilmədik. Əvəzində rəqib iki əks-hücum zamanı erkən qollar vurdu. Bütövlükdə, "İnter"in qol epizodları çox olmadı. Amma buna rəğmən üç qol vura bildilər. Məncə, matçı heç-heçə başa vura bilərdik. Bir qədər artıq vaxtımız olsaydı, buna nail olacaqdıq. Penalti oyunun dönüş nöqtəsi oldu. O olmasaydı, oyun tamamilə fərqli keçəcəkdi. Səfərdə minimum iki qol vurmalıyıq. Növbəti mərhələyə adlamaq üçün buna məcburuq. Belə bir oyunda uduzmaq çox üzücüdü. Özü də sənin qol vəziyyətlərin rəqibinkindən daha çox olarkən".