“Sumqayıt”ın baş məşqçisi Aqil Məmmədov Peşəkar Futbol Liqasının rəsmi saytına müsahibə verib. Futbolinfo.az xəbər verir ki, o, müsahibə zamanı bir sıra maraqlı məqamlara toxunub.
– Azərbaycan milli komandasının oyunları ilə əlaqədar olaraq, Topaz Premyer Liqasında yaranmış fasilədən necə istifadə edəcəksiz?
– “Araz Naxçıvan”la görüşdən sonra futbolçuları istirahətə buraxmışdım. Dörd günlük fasilədən sonra sabah toplaşırıq. 6 futbolçumuz U-21 yığmasının heyətindədi. Buna baxmayaraq, 1 yoxlama oyunu keçirməyə qərar verdik. İnşallah, şənbə günü saat 18:00-da “İnter”lə üz-üzə gələcəyik. Bu oyun “Bakı” klubunun təlim-məşq bazasında reallaşacaq. Oyunun məhz bu arenada keçirilməsi bizim üçün sərfəlidi. Çünki Topaz Premyer Liqasının 5-ci turunda məhz “Bakı” ilə bu meydançada oynayacağıq.
– “İnter”lə oyunda qeydə alınan 1:5 hesablı məğlubiyyətdən sonra heyətdə bir çox dəyişiklik etdiz. “Araz Naxçıvan” üzərində dəyişik heyətlə qələbə qazanmağınız ikinci heyətin daha uğurlu olmasına işarədi?
– Bəli, ikinci heyəti daha uğurlu saymaq olar. İdman prinsiplərində belə bir qanunauyğunluq var ki, uduzan heyətdə mütləq islahatlar aparılmalıdı. Mən “İnter”lə oyunda meydana çıxan 4 futbolçunu “Araz Naxçıvan”la matçda ehtiyatda saxlamışdım. Onlar əsas heyətdəki yerlərini məhz “İnter”lə oyunda itirdilər. Amma sözsüz ki, onlar da bizim oyunçularımızdı. Həmin futbolçular öz yerlərini qaytarmaq üçün mütləq mübarizə aparmalı və 2 qat güclə çalışmalıdılar. Kim güclüdüsə, o da meydançaya çıxacaq.
– “Sumqayıt” hazırda turnir cədvəlinin lideridi. “Sumqayıt”ın liderliyi uzunmüddətli ola bilərmi?
– Deməzdim ki, biz rəqiblərimizi böyük fərqlə üstələmişik. Bəzən idman xoşbəxtliyi bizim tərəfimizdə olub. Biz qələbələri futbolçuların sona qədər döyüşməsi, mübarizədən qopmaması nəticəsində qazanmışıq. Əvvəl də demişəm, yenə də deyirəm: Bizim hədəfimiz çempionluq deyil. Məqsədimiz yaxşı oyun sərgiləmək, qələbələr qazanmaqdı. Kimin çempion olacağı, kimin digər medalları qazanacağını isə çempionatın sonunda görəcəyik.
– Ötən mövsüm əsas oyunçularınızdan sayılan Pərdis Fərcad Azadın zədəsinin sağalması üçün nə qədər zamana ehtiyac var?
– Pərdisin zədəsi ciddidi. Mən istərdim ki, Pərdis tez qayıtsın. Amma hesab edirəm ki, onun qayıdışı ən yaxşı halda, yanvar ayında reallaşa bilər.
– Sumqayıtda həmişə futbol ab-havası olub. Adətən, Sumqayıt stadionuna gələn azarkeşlərin də orta yaş həddi yüksəkdi. Yəni Sumqayıt camaatı artıq “Sumqayıt”ı doğma komanda kimi qəbul edir. Bu barədə düşüncələriniz necədi?
– Bəli, camaatın, xalqın komandası olmaq çətin işdi. Gərək azarkeş rəğbəti qazanasan. Bəli, Sumqayıtda gəlmə komandalar çıxış ediblər. Yəqin ki, həmin vaxt hər hansı bir soyuqluq olub. İndiki məqamda isə vəziyyət fərqlidi. Azarkeşlər bizə hər zaman dəstək olublar və bizi heç vaxt darda qoymayıblar.
– Növbəti turda rəqibiniz “Bakı”dı. Bu komanda ilə bağlı hansı fikirdəsiz?
– Bir məsələni vurğulayım ki, “Bakı” heç də zəif komanda deyil. Məğlub olduqları oyunlarda da yaxşı futbol sərgiləyiblər. Döyüşməyi bacaran komandaya qarşı oynayacağıq. Bu baxımdan işimiz heç də asan olmayacaq.