Rusiya Premyer Liqasının lideri “Zenit” son turda səfərdə Yuri Syominin çalışdırdığı “Mordoviya”ya minimal hesabla məğlub olub – 0:1. Futbolinfo.az xəbər verir ki, ötən günkü qarşılaşmada Sankt-Peterburq təmsilçisinin heyətində əslən azərbaycanlı olan Ramil Şeydayev də çıxış edib. O, matçın 80-ci dəqiqəsində Viktor Fayzulinin əvəzinə meydana daxil olub. Böyük gələcək vəd edən Şeydayevin oyuna daxil olması nəticəni dəyişməyib.
Bu, Ramilin “Zenit”in əsas heyətində meydana çıxdığı ikinci oyunudu. O, ümumilikdə yeni mövsümdə meydanda 21 dəqiqə olub.
Maraq üçün bildirək ki, Ramil Rusiya Premyer Liqasında çıxış edən ən gənc azərbaycanlı futbolçudu. Hücumçunun atası Kürdəmirdən olsa da, özü 1996-cı il martın 15-də Sankt-Peterburqda anadan olub. 9 yaşından “Zenit”də çıxış edən futbolçunun ilk peşəkar müqaviləsi də elə bu klubla olub. Ramilin anası rusdu. Atası Rüstəm hərbi xidməti bitirəndən sonra qonşu ölkədə qalıb. Valideynləri Rusiyada tanış olaraq ailə qurublar.
Onu da qeyd edək ki, Ramil Şeydayevin perspektivini görən AFFA rəsmiləri də bir müddət əvvəl onu yığmamıza cəlb etmək üçün hərəkətə keçmişdi. Ancaq Ramil seçimini Rusiya milisindən yana edir. O, haqlı olaraq Rusiya millisində daha çox irəli gedəcəyinə inanır. Yeni mövsümdə “Zenit” forması ilə iki dəfə Premyer Liqa matçına çıxan Şeydayev bir halda millimizə gələ bilər – o da, Rusiya yığmalarına dəvət almasa. Bunu futbolçunun özü də müsahibəsində təsdiqləyib. İşinə peşəkar yanaşdığını bildirir.
Amma bu, bizim üçün ümidverici deyil. Belə ki, futbolçunun istedadlı olması Rusiyanın 21 yaşlılardan ibrarət yığmasının baş məşqçisi Nikolay Pisarevin də diqqətini cəlb edib. Mütəmadi olaraq Ramili başçılıq etdiyi yığmaya çağırır. O, hazırda 96-çı il doğumlulardan ibarət millinin kapitanıdı.
Rusiya Premyer Liqasının yeni mövsümündə cəmi 21 dəqiqə forma şansı qazanması Şeydayevin pis çıxışı ilə bağlı deyil. Nəzərə almaq lazımdı ki, “Zenit”in hücum xəttində Halk, Rondon və Kerjakov kimi futbolçular çıxış edir. Əvəzedici heyətdə isə o, daha məhsuldardı. Meydana çıxdığı 20 oyunda rəqib qapıçıları 14 dəfə məyus etməyi bacarıb.
EMİN SƏFƏROV