Bu gün Topaz Premyer Liqasında qış fasiləsinə rəsmən yekun vurulacaq. Futbolinfo.az xəbər verir ki, bir aydan artıq davam edən fasilədən sonra baş tutacaq 19-cu turun ilk oyun günündə cəmi bir görüş keçiriləcək.
Əslində bu gün iki oyun baş tutmalıydı. Lakin ölkə ərazisində yağan qar Topaz Premyer Liqasına da təsirsiz ötüşmədi. Nəticədə, "Sumqayıt" – "Qəbələ" qarşılaşması şənbədən bazara keçirildi.
Günün yeganə oyunu mərkəzi arenada baş tutacaq. Tofiq Bəhramov adına Respublika stadionunda "Qarabağ" "Xəzər Lənkəran"ı sınağa çəkəcək. Qurban Qurbanovun komandası liderliyini qorumaq üçün 3 xal qazanmağa çalışacaq. Əks təqdirdə ən yaxın izləyicilər – "Qəbələ" və "Neftçi" bu komandanı zirvədən sala bilər.
Ağdam klubunun heyətində zədəlilərin olması komandanın işini çətinləşdirir. Kapitan Rəşad Sadıqov və Nikolas Gelaşvili zədədən əziyyət çəkir. Onların oyuna çıxması sual altındadı. Bu isə "Qarabağ"ın oyununa mütləq şəkildə öz təsirini göstərəcək.
"Qarabağ"la yanaşı "Xəzər Lənkəran" da zədəli futbolçulardan əziyyət çəkir. Mustafa Dənizli bugünkü oyunda Adrian Pitin xidmətindən istifadə edə bilməyəcək. Cümə axşamı keçirilən məşqdə komandadan ayrı çalışan Slavik Alxasov və zədələnərək məşqi yarımçıq qoyan Zohair Benuahinin bu oyunda forma geyinməsi hələlik, məlum deyil. Qış transfer pəncərəsində çox da güclü transferlər etməyən "Xəzər Lənkəran" qələbə sayəsində 2 pillə birdən irəliləyə bilər. Komandaların ilk iki dövrədəki oyunlarında Qurbanovun yetirmələri rəqib qapısından 5 cavabsız top keçirib (2:0, 3:0). Bu dəfə həmin uğurlu seriyanın davam edib-etməyəcəyi maraqla gözlənilir.
Topaz Premyer Liqası
19-cu tur
1 fevral (şənbə)
17:00. Qarabağ – Xəzər Lənkəran
Hakimlər: Ramil Diniyev, Rza Məmmədov, Azər Əsgərov, Mahir Məmmədov.
Əlavə köməkçi hakimlər: Rauf Cabbarov, Əliyar Ağayev.
AFFA nümayəndəsi: Şaiq Həmidov.
Hakim-inspektor: Asim Xudiyev.
Bakı. Tofiq Bəhramov adına Respublika stadionu.
Turun digər oyunları sabah baş tutacaq.
| 1 | Qarabağ | 18 | 10 | 6 | 2 | 31 | 11 | +20 | 36 |
| 2 | Qəbələ | 18 | 11 | 2 | 5 | 27 | 16 | +11 | 35 |
| 3 | Neftçi | 18 | 10 | 4 | 4 | 27 | 19 | +8 | 34 |
| 4 | İnter | 18 | 8 | 3 | 7 | 27 | 21 | +6 | 27 |
| 5 | Bakı | 18 | 8 | 3 | 7 | 29 | 21 | +8 | 27 |
| 6 | Simurq | 18 | 6 | 7 | 5 | 19 | 14 | +5 | 25 |
| 7 | AZAL | 18 | 6 | 6 | 6 | 17 | 23 | –6 | 24 |
| 8 | XL | 18 | 5 | 7 | 6 | 16 | 24 | –8 | 22 |
| 9 | Rəvan | 18 | 1 | 6 | 11 | 9 | 32 | –23 | 9 |
| 10 | Sumqayıt | 18 | 1 | 4 | 13 | 11 | 32 | –21 | 7 |