Bu gün Azərbaycan futbolunda özünəməxsus iz qoymuş şəxslərdən biri olan Nazim Süleymanovun 50 yaşı tamam olur. O, müstəqillik dönəmində tək-tük oyunçulardandı ki, ölkə xaricində uğurlu legioner həyatı qura bilib.
Karyerası boyunca bir çox uğurlara imza atmış sabiq hücumçu 1995-ci ildə "Spartak-Alaniya" ilə Rusiya çempionu olmağa nail olmuşdu. Süleymanov ölkə futbolunda bir sıra ilklərin müəllifidi. Belə ki, o, yığma komandanın tarixində ilk qolun müəllifi kimi də adını futbol tariximizə həkk etdirib. Həmçinin Süleymanov Azərbaycan millisinin rəsmi oyunlarda da ilk qolunun müəllifi sayılır. Futbolçu bu uğura AÇ-1996-ın seçmə mərhələsi çərçivəsində Slovakiya ilə matçda imza ata bilib. Veteran futbolçu ölkə xaricində çıxış edən legionerlər arasında vurduğu 73 qolla ən çox fərqlənən futbolçu sayılır.